பேட்மிண்டன் முதல் பவர் லிஃப்டிங் வரை... ஆசிய பாரா விளையாட்டுகளில் தமிழகத்தின் முத்திரை!

ஆசிய பாரா விளையாட்டுப் போட்டிகளில் தமிழகத்தைச் சேர்ந்த வீரர்கள் இந்தியாவுக்குப் பெருமை சேர்த்து வருகின்றனர். பேட்மிண்டன், டேபிள் டென்னிஸ், பவர் லிஃப்டிங் எனப் பல்வேறு போட்டிகளில் தமிழக வீரர்களின் சாதனைகள் இந்தப் போட்டிகளில் கவனம் பெற்றுள்ளன.

பேட்மிண்டனில் சிவராஜன் சோலைமலை

ஜப்பானின் ஐச்சி-நகோயாவில் நடைபெற்று வரும் 2026 ஆசிய பாரா விளையாட்டுப் போட்டிகளில், பேட்மிண்டனில் தமிழகத்தைச் சேர்ந்த சிவராஜன் சோலைமலை வெள்ளிப் பதக்கம் வென்றுள்ளார். ஆடவர் இரட்டையர் SH6 பிரிவில் கிருஷ்ணா நாகருடன் இணைந்து களமிறங்கிய சிவராஜன், இந்தியாவுக்காக இந்தப் பதக்கத்தை வென்றுள்ளார்.

இந்தச் சாதனையைப் பாராட்டிய தமிழ்நாடு முதலமைச்சர், சிவராஜனுக்கு ரூ.50 லட்சம் ஊக்கத்தொகை அறிவித்துள்ளார். சர்வதேச அரங்கில் அவரது தொடர் பங்களிப்புக்கு இந்த வெற்றி மேலும் ஒரு மைல்கல்லாக அமைந்துள்ளது.

டேபிள் டென்னிஸில் தமிழக வீரர்கள்

டேபிள் டென்னிஸில் தமிழகத்தைச் சேர்ந்த ஜெஹான் டோராப் மதன், பேபி சஹானா ரவி ஆகியோர் வெண்கலப் பதக்கங்களை வென்றுள்ளனர்.

ஆடவர் ஒற்றையர் Class 1 பிரிவில் ஜெஹான் டோராப் மதன் வெண்கலப் பதக்கத்தைப் பெற்றார். சென்னையைச் சேர்ந்த இவர், சாலை விபத்தில் ஏற்பட்ட பாதிப்புக்குப் பிறகு பாரா டேபிள் டென்னிஸில் கவனம் செலுத்தத் தொடங்கி, தற்போது ஆசிய அளவிலான போட்டியில் பதக்கம் வென்று சாதித்துள்ளார்.

மகளிர் ஒற்றையர் Class 9 பிரிவில் பேபி சஹானா ரவி வெண்கலம் வென்றுள்ளார். இந்தப் பிரிவில் இந்தியாவுக்காக ஆசிய பாரா விளையாட்டுப் போட்டிகளில் பதக்கம் வென்ற முதல் வீராங்கனை என்ற சிறப்பையும் அவர் பெற்றுள்ளார்.

இருவரின் சாதனைகளையும் பாராட்டிய தமிழ்நாடு அரசு, தலா ரூ.30 லட்சம் ஊக்கத்தொகை அறிவித்துள்ளது.

பவர் லிஃப்டிங்கில் கஸ்தூரி ராஜாமணி

பவர் லிஃப்டிங்கில் தமிழகத்தைச் சேர்ந்த கஸ்தூரி ராஜாமணி வெள்ளிப் பதக்கம் வென்று அசத்தியுள்ளார். மகளிர் 67 கிலோ எடைப் பிரிவில் பங்கேற்ற அவர், தனது இறுதி முயற்சியில் 108 கிலோ எடையைத் தூக்கி இரண்டாவது இடத்தைப் பிடித்தார்.

42 வயதான கஸ்தூரி ராஜாமணியின் இந்த வெற்றி, இந்தியாவின் பாரா பவர் லிஃப்டிங் அணியின் பதக்கப் பங்களிப்பில் முக்கிய இடம்பிடித்துள்ளது.

இறுதிப்போட்டியை எட்டிய துளசிமதி

தமிழகத்தைச் சேர்ந்த துளசிமதி முருகேசனும் பேட்மிண்டனில் தொடர்ந்து கவனம் ஈர்த்து வருகிறார். மகளிர் இரட்டையர் SL3-SU5 பிரிவில் மனசி ஜோஷியுடன் இணைந்து விளையாடிய அவர், அரையிறுதியில் சீன வீராங்கனைகளை வீழ்த்தி இறுதிப்போட்டிக்கு முன்னேறியுள்ளார்.

கலப்பு இரட்டையர் SL3-SU5 பிரிவிலும் நிதேஷ் குமாருடன் இணைந்து இறுதிப்போட்டிக்கு முன்னேறியுள்ளார். இதனால், இந்தப் பிரிவில் இந்தியாவுக்கு குறைந்தபட்சம் வெள்ளிப் பதக்கம் உறுதியாகியுள்ளது.

பேட்மிண்டன், டேபிள் டென்னிஸ், பவர் லிஃப்டிங் என வெவ்வேறு விளையாட்டுப் பிரிவுகளில் தமிழக வீரர்கள் பதக்கங்களை வென்றிருப்பது குறிப்பிடத்தக்கது. ஆசிய பாரா விளையாட்டுப் போட்டிகள் தொடர்ந்து நடைபெற்று வரும் நிலையில், தமிழக வீரர்களின் சாதனைகள் இந்திய அணியின் பதக்கப் பயணத்துக்குப் பங்களித்து வருகின்றன.