`ஆஸ்திரேலியாவை சிதறடித்த `அசல்' சம்பவக்காரன்' - யார் இந்த பதும் நிசாங்கா?

டி20 உலகக்கோப்பைத் தொடரின் நேற்றைய போட்டியில் ஆஸ்திரேலியாவை 8 விக்கெட் வித்தியாசத்தில் வீழ்த்தி இலங்கை அணி சூப்பர் 8 சுற்றுக்கு தகுதி பெற்றிருக்கிறது.

இந்தப் போட்டியில் ஆரம்பம் முதலே அதிரடி காட்டிய இலங்கை வீரர் பதும் நிசாங்கா 52 பந்துகளில் 10 பவுண்டரிகள் 5 சிக்சர்களை பறக்கவிட்டு சதமடித்து இந்த டி20 உலகக்கோப்பைத் தொடரின் முதல் சதத்தை பதிவு செய்து சாதனை படைத்திருக்கிறார்.

அதுமட்டுமின்றி ஜெயவர்த்தனேவிற்கு பிறகு இலங்கை டி20 உலகக்கோப்பையில் சதமடித்த 2- வது வீரர் என்ற சாதனையும் படைத்திருக்கிறார். இளம் வயதில் சாதனை படைத்த பதும் நிசாங்காவை பலரும் பாராட்டி வருகின்றனர்.

யார் இந்த பதும் நிசாங்கா?

இலங்கையில் உள்ள கல்லே(Galle) என்ற இடத்தில் பிறந்த பதும் நிசாங்கா (27) எளிய பின்னணியில் இருந்து வந்து இந்த இடத்தை எட்டிப் பிடித்திருக்கிறார்.

போதிய வசதிகள் இல்லாத சமயத்தில் கடற்கரை மணலில் பயிற்சி பெற்று தனது பேட்டிங் திறமையை நிசாங்கா வளர்த்துக்கொண்டிருக்கிறார்.

இலங்கை அணியில் இடம்பெறுவதற்கு முன் உள்ளூர் போட்டிகளில் அதிக ரன்களைக் குவித்து தனது திறமையை வெளிப்படுத்தி இருக்கிறார்.

2024-ல் ஆப்கானிஸ்தானுக்கு எதிராக 210 ரன்கள் எடுத்து, ஒருநாள் போட்டியில் இரட்டைச் சதம் அடித்த முதல் இலங்கை வீரர் என்ற வரலாற்றைப் படைத்திருக்கிறார்.

தனது முதல் டெஸ்ட் போட்டியிலேயே சதம் அடித்து, உலகின் கவனத்தை ஈர்த்திருக்கிறார்.

தற்போது டி20 உலகக்கோப்பையிலும் சதத்தை அடித்து அசத்தியிருக்கிறார். கடந்த சில ஆண்டுகளாக இலங்கை அணி தடுமாறிய போது, அந்த அணியைத் தாங்கிப் பிடித்த ஒரு தூணாக நிசாங்கா இருந்திருக்கிறார்.

எவ்வளவு அழுத்தமான சூழலிலும் பதற்றப்படாமல் ஆடுவது இவரது மிகப்பெரிய பலமாக இருக்கிறது.!