Salman Khan: "யார் இவர்கள் எல்லாம்? இவர்கள் என்ன ஏ.ஐ நிபுணர்களா?" - சல்மான் கான்...
நெல்லை: படிக்கட்டில் இறந்து கிடந்த சிசு; கர்ப்பத்தை மறைத்து இளம்பெண்ணுக்கு திருமணம் - நடந்தது என்ன?
நெல்லை மாவட்டம், பாளையங்கோட்டை அருகிலுள்ள அரியகுளம் பகுதியைச் சேர்ந்தவர் வெங்கடேஷ். கொத்தனார் வேலை செய்து வருகிறார். இவருக்கும் தாழையூத்து அருகிலுள்ள ஏரான்குடியைச் சேர்ந்த பிச்சம்மாள் என்பவருக்கும் கடந்த 13-ம் தேதி திருமணம் நடைபெற்றது. திருமணமான அன்றிரவே அரியகுளத்திலுள்ள மணமகன் வெங்கடேஷின் வீட்டிற்கு வந்தனர்.

மறுநாள் 14-ம் தேதி காலை பிச்சம்மாளுக்கு திடீரென கடுமையான வயிற்றுவலியும், ரத்தப்போக்கும் ஏற்பட்டது. வீட்டின் கழிவறையில் அதிகளவில் ரத்தம் இருந்ததைக் கண்டு வெங்கடேஷின் சகோதரி பிச்சம்மாளிடம் விசாரித்தபோது தனக்கு வயிற்றுவலி இருப்பதாகக் கூறியுள்ளார். இதனையடுத்து பிச்சம்மாளை பாளையங்கோட்டையில் உள்ள ஒரு தனியார் மருத்துவமனைக்கு அழைத்துச் சென்றனர்.
இதற்கிடையில் வெங்கடேஷின் வீட்டுப் படிக்கட்டில் இறந்த நிலையில் சிசுவின் உடல் கிடந்துள்ளது. இதைப்பார்த்த வெங்கடேஷின் உறவினர்கள், திருமணத்திற்கு முன்பே பிச்சம்மாள் கருவுற்று 5 மாதங்கள் இருந்திருக்ககூடும். இந்த உண்மையை மறைத்து பிச்சம்மாளை திருமணம் செய்து வைத்துவிட்டதாக பிச்சம்மாள் வீட்டார் மீது குற்றம் சாட்டினர்.
திருமணத்திற்கு முன்பே கர்ப்பமானதை மறைத்தும், ஏமாற்றியும் திருமணம் செய்து வைத்ததால் இதுகுறித்து உரிய விசாரணை நடத்த வேண்டும் என வெங்கடேஷ், நெல்லை தாலுகா காவல் நிலையத்தில் புகார் அளித்தார்.

இதுகுறித்து போலீஸார், “இந்த சம்பவத்தில் இறந்த நிலையில் சிசுவின் உடல் மீட்கப்பட்டது. நெல்லை அரசு மருத்துவக்கல்லூரி மருத்துவமனையில் பிரேதப் பரிசோதனைக்கு அனுப்பப்பட்டுள்ளது. திருமணமான இளம்பெண் மற்றும் அவரின் பெற்றோரிடம் விசாரணை நடந்து வருகிறது. முழு விசாரணைக்குப் பிறகு நடவடிக்கை எடுக்கப்படும்” என்றார்.



















