திருச்சி மாவட்டம், மணப்பாறையை அடுத்துள்ள துவரங்குறிச்சி அருகே அரசுப் பேருந்து வெள்ளிக்கிழமை 10 அடி பள்ளத்தில் இறங்கி விபத்துக்குள்ளாது.
துவரங்குறிச்சி பணிமனையில் இருந்து வெள்ளிக்கிழமை காலை புறப்பட்ட அரசு நகரப் பேருந்தை தோமையராஜ்(50) என்பவா் ஓட்டிவந்தாா். இந்த பேருந்து கோட்டையூா் சென்று அங்கிருந்து தெத்தூா், ஆலம்பட்டி, மருதம்பட்டி, அதிகாரம் வழியாக பள்ளி, கல்லூரி மாணவ, மாணவிகள் உள்பட சுமாா் 50-க்கும் மேற்பட்டோரை ஏற்றிக்கொண்டு திருச்சி - மதுரை தேசியநெடுஞ்சாலையில் துவரங்குறிச்சி பிரிவு சாலை அருகே வந்து கொண்டிருந்தது. அப்போது பேருந்தை ஓட்டுநா் திருப்ப முயன்றாா். இதில், கட்டுப்பாட்டை இழந்த பேருந்து சாலையின் நடுவில் இருந்த மையத் தடுப்பைத் தாண்டி அருகில் இருந்த சுமாா் 10 அடி பள்ளத்தில் முள்புதருக்குள் இறங்கியது. இதில் அதிா்ஷ்டவசமாக பயணிகள் சிறு காயங்களுடன் தப்பினா்.
அருகில் இருந்தவா்கள் உடனடியாக அவா்களை மீட்டு துவரங்குறிச்சி அரசு மருத்துவமனையில் முதலுதவி சிகிச்சைக்காக அனுமதித்தனா். மேலும், பள்ளி மாணவ, மாணவிகள் உள்பட 10-க்கு மேற்பட்டோருக்கு லேசான காயங்கள் ஏற்பட்டது. இது குறித்து துவரங்குறிச்சி காவல்துறையினா் விசாரணை மேற்கொண்டு வருகின்றனா்.
