பாளையங்கோட்டையில் விளம்பர பதாகை பொருத்தும் பணியில் ஈடுபட்டிருந்த இளைஞா் மின்சாரம் பாய்ந்து உயிரிழந்தாா்.
திருநெல்வேலி மாவட்டம், கங்கைகொண்டான் கிருஷ்ணன் கோவில் தெருவைச் சோ்ந்தவா் ஆறுமுகம். இவரது மகன் பேச்சிமுத்து (30). திருநெல்வேலி மாநகரப் பகுதியில் உள்ள கடைகள், நிறுவனங்களை விளம்பரப்படுத்தும் வகையில் பிளக்ஸ் பேனா்கள் அச்சடித்து அவற்றை ஆங்காங்கே சாலை ஓரங்களில் பொருத்தும் பணியில் ஈடுபட்டு வந்தாா்.
பாளையங்கோட்டை குலவணிகா்புரம் ரயில்வே கேட் அருகே மரக்கதவுகள் விற்பனை செய்யும் கடைக்கான விளம்பர பேனரை இரும்பு குழாய்களில் பொருத்தும் பணியில் தனது நண்பருடன் ஈடுபட்டிருந்தாா் பேச்சிமுத்து. பின்னா் அந்த விளம்பர பேனரை சாலையின் ஒரு புறத்திலிருந்து மற்றொரு புறத்துக்கு எடுத்துச் செல்ல முயன்ாகக் கூறப்படுகிறது. அப்போது எதிா்பாராதவிதமாக மேலே சென்ற மின் கம்பியில் பிளக்ஸ் பேனரின் இரும்பு குழாய் உரசியது. இதில் 2 போ் மீதும் மின்சாரம் பாய்ந்தது. இதில் தூக்கி வீசப்பட்ட பேச்சிமுத்து படுகாயம் அடைந்தாா். மயங்கி விழுந்த அவரை சக தொழிலாளா்கள் மீட்டு, ஆம்புலன்ஸ் மூலம் அரசு மருத்துவக் கல்லூரி மருத்துவமனைக்கு அனுப்பி வைத்தனா். ஆனால் செல்லும் வழியிலேயே பேச்சிமுத்து உயிரிழந்தாா். அவரது நண்பா் லேசான காயத்துடன் உயிா் தப்பினாா்.
தீக்காயமடைந்த பெண் உயிரிழப்பு: பாளையங்கோட்டை இலந்தைகுளம் ரயில்வே பீடா் சாலையைச் சோ்ந்தவா் கணபதி. இவரது மனைவி ராஜேஸ்வரி (60). இவா் கடந்த 9-ஆம் தேதி வீட்டில் சமையல் செய்து கொண்டிருந்தபோது எதிா்பாராதவிதமாக அவா் மீது தீப்பற்றியது. அலறித் துடித்த அவரை அக்கம்பக்கத்தினா் மீட்டு, திருநெல்வேலி அரசு மருத்துவக் கல்லூரி மருத்துவமனையில் சோ்த்தனா். இந்த நிலையில் சிகிச்சை பலனின்றி ராஜேஸ்வரி உயிரிழந்தாா்.
இரு சம்பவங்கள் தொடா்பாகவும் பாளையங்கோட்டை போலீஸாா் வழக்குப் பதிவு செய்து விசாரணை நடத்தி வருகின்றனா்.
