"முதல்வராகும் அனைத்து தகுதிகளும் சரத்குமாருக்கு உள்ளன" - நயினார் நாகேந்திரன் பாராட்டு

நடிகரும் பாஜக நிர்வாகியுமான சரத்குமாரின் பிறந்தநாள் விழா திருநெல்வேலியில் நேற்று ( ஜூலை.25) நடைபெற்றது.

இந்த விழாவில், பாஜக மாநிலத் தலைவர் நயினார் நாகேந்திரன், நாம் தமிழர் கட்சி ஒருங்கிணைப்பாளர் சீமான் உள்ளிட்டோர் கலந்துகொண்டனர்.

நிகழ்ச்சி மேடையில் பேசிய நயினார் நாகேந்திரன், "சரத்குமாருக்கு 72 வயதானாலும் அவர் எண்ணத்தாலும், செயலாலும் அவரது வயது 27-தான்.

மாப்பிள்ளை சீமான் உள்பட அனைவரும் ஒரே மேடையில் அமர்ந்து இருப்பதைப் பார்க்கும்போது அழகாகத்தான் உள்ளது.

இரண்டு மாதங்களுக்கு முன்பு இந்த மேடை இதே மாதிரி இருந்திருந்தால் தமிழகத்தின் அரசியல் நிலைமை என்னவாகி இருக்கும்? இனிமேல் எப்படி இருக்கிறது என்று பார்க்கலாம்.

சிலர் எடுத்த எடுப்பில் முதலமைச்சராகி விடுகிறார்கள். இப்போது கலிகாலம் நடந்து கொண்டிருக்கிறது. ஆனால், முதலமைச்சராக அனைத்து தகுதிகளும் சரத்குமாருக்கு உள்ளன.

இங்கு யாரை எங்கு வைக்க வேண்டுமோ அங்கு வைக்காமல் விட்டுவிடுவார்கள். ஒரு நயா பைசா இல்லாமல் தேசிய கட்சியில் சரத்குமார் தன்னை இணைத்துக் கொண்டுள்ளார்.

நிச்சயமாக தேசிய அளவிலான பதவிகள் அவரைத் தேடி வரும். லட்சக்கணக்கான மக்களைக் கொள்ளை கொண்டவர். ஒரு சமுதாயத்தில் உள்ளவர்களுக்கு மட்டும் ரசிகர் என்று கூறினால் நான் ஏற்றுக் கொள்ள மாட்டேன்” என்று பேசியிருக்கிறார்.