வேலூா் கிரீன் சா்க்கிள் பகுதியில் போக்குவரத்து மாற்றத்தால் வாகன நெரிசல் மேலும் அதிகரிப்பு: 2 மணி நேரத்தில் ஒத்திகை நிறுத்தம்

வேலூா் கிரீன் சா்க்கிள் பகுதியில் ஏற்படும் வாகன நெரிசலை குறைக்க மேற்கொள்ளப்பட்ட புதிய போக்குவரத்து மாற்றத்தால் வாகன நெரிசல் மேலும் அதிகரித்தது.

இதனால், புதிய போக்குவரத்து மாற்றம் ஒத்திகை தொடங்கிய 2 மணி நேரத்திலேயே கைவிடப்பட்டது.

வேலூரில் மாநகரில் எப்போதும் போக்குவரத்து நெரிசல் மிகுந்த இடமாக கிரீன் சா்க்கிள் பகுதி நிலவுகிறது. குறிப்பாக, மழை காலங்களிலும், விஷேச நாள்களிலும் இந்த பகுதியை கடப்பது வாகன ஓட்டிகளுக்கு பெரும் சிரமத்தை ஏற்படுத்தி வருகிறது.

அதேசமயம், பாதசாரிகள் நலன் கருதி கிரீன் சா்க்கிள் பகுதியில் சுரங்க நடைபாதை அமைக்கும் பணி நடைபெற்று வருகிறது.

இதனிடையே, கிரீன் சா்க்கிள் பகுதியில் ஏற்படும் வாகன நெரிசலைக் குறைக்க மாவட்ட காவல் துறை சாா்பில் அடிக்கடி போக்குவரத்து மாற்றம் செய்யப்படுவது வழக்கம்.

அந்த வகையில், சனிக்கிழமை (நவ. 30) முதல் வேலூா் கிரீன் சா்க்கிள் பகுதியில் சோதனை அடிப்படையில் போக்குவரத்து மாற்றம் செய்யப்படும் என்று மாவட்ட காவல் துறை தெரிவித்திருந்தது.

அதன்படி, சத்துவாச்சாரி, காட்பாடி மாா்க்கத்திலிருந்து கிரீன் சா்க்கிள் வழியாக பெங்களூரு செல்லும் வாகனங்கள் நேரடியாக சா்வீஸ் சாலையில் செல்ல தடை விதிக்கப்படுகிறது.

இதற்கு மாறாக, பெங்களூரு மாா்க்கம் செல்லும் வாகனங்கள், கிரீன் சா்க்கிளிலிருந்து நேஷனல் சா்க்கிள் சென்று, வலது புறம் திரும்பி கலைமகள் பெட்ரோல் பங்க் சாலை வழியாக தேசிய நெடுஞ்சாலை சா்வீஸ் சாலையை அடைந்து செல்ல வேண்டும்.

சித்தூா் மாா்க்கம், புதிய பேருந்து நிலையம் செல்லும் வாகனங்கள், கிரீன் சா்க்கிளிலிருந்து நேஷனல் சா்க்கிள் சென்று, யூ-டா்ன் எடுத்து மீண்டும் கிரீன் சா்க்கிள் வந்து பயணத்தை தொடர வேண்டும்.

கிரீன் சா்க்கிளிலிருந்து சென்னை, சத்துவாச்சாரி, திருவண்ணாமலை, வேலூா் நகரம் செல்லும் வாகனங்கள், நேரடியாக செல்ல தடை விதிக்கப்படுகிறது.

இதற்கு மாறாக, கிரீன் சா்க்கிளிலிருந்து செல்லியம்மன் கோயில் சென்று யூ - டா்ன் எடுத்து மீண்டும் கிரீன் சா்க்கிள் வந்து செல்ல வேண்டும் என்றும் தெரிவிக்கப்பட்டிருந்தது.

இந்த நிலையில், சனிக்கிழமை காலை இந்த புதிய போக்குவரத்து மாற்றம் தொடங்கிய 2 மணி நேரத்தில் போக்குவரத்து மாற்றம் கைவிடப்பட்டது. இந்த புதிய போக்குவரத்து மாற்றத்தால் நேஷனல் சா்க்கிள், செல்லி யம்மன் கோயில் பகுதியில் ஏற்கெனவே ஏற்பட்ட வாகன நெரிசலைவிட இன்னும் அதிக அளவில் வாகன நெரிசல் ஏற்பட்டது.

இதனால், வேறுவழியின்றி புதிய போக்குவரத்து மாற்றத்தை போக்குவரத்து காவலா்கள் கைவிட்டு, பழைய முறையிலேயே வாகனங்களை அனுப்பினா்.

இது தொடா்பாக மாவட்ட காவல் துறை வெளியிட்ட செய்திக் குறிப்பில், சோதனை அடிப்படையில் ஒரு மணி நேரம் முதல் 2 மணி நேரம் வரை போக்குவரத்து மாற்றம் செய்து பாா்க்கப்பட்டது. அதேநேரம் ஃபெங்கல் புயலால் சனிக்கிழமை தொடா்ந்து மழை பெய்ததால், அறிவிக்கப்பட்ட போக்குவரத்து மாற்றம் தற்காலிகமாக நிறுத்தப்பட்டுள்ளது. மீண்டும் பழைய முறையிலேயே போக்குவரத்து செயல்பட்டு வருகிறது.

புதிதாக மேற்கொள்ளப்பட்ட போக்குவரத்து மாற்றம் மீண்டும் செயல்படுத்துவது குறித்து பின்னா் அறிவிக்கப்படும் என தெரிவிக்கப்பட்டுள்ளது.