Anime Awards 2026 மேடையில் 'நேஷனல் க்ரஷ்'; உலகமே வியக்கும் ராஷ்மிகா மந்தனாவின் அடுத்த அதிரடி!

ஜப்பான் தலைநகர் டோக்கியோவில் மே 23, 2026 அன்று 10-வது க்ரஞ்சிரோல் குளோபல் அனிமே விருதுகள் (Crunchyroll Anime Awards 2026) விழா நடைபெறவுள்ளது.

உலகெங்கிலும் உள்ள அனிமே (ஜப்பானிய அனிமேஷன்) ரசிகர்களால் கொண்டாடப்படும் மிகப்பெரிய விருது விழாவான இந்த `குளோபல் அனிமே விருதுகள் 2026'-ல் இந்திய நடிகை ராஷ்மிகா மந்தனா விருது வழங்குநராக (Presenter) கலந்துகொள்ளவுள்ளார்.

இவருடன் இணைந்து உலகப் புகழ்பெற்ற கனடிய பாப் பாடகர் `தி வீக்கெண்ட்' (The Weeknd) உள்ளிட்ட பல சர்வதேச பிரபலங்களும் இந்த விழாவில் விருதுகளை வழங்கவுள்ளனர்.

ராஷ்மிகாவுக்கான கௌரவம் என்ன?

இதற்கு முன்பு 2024-ம் ஆண்டு டோக்கியோவில் நடந்த அனிமே விருது விழாவில், விருது வழங்கிய முதல் இந்தியர் என்ற வரலாற்றுச் சாதனையை ராஷ்மிகா படைத்திருந்தார். 2026-ல் அவர் மீண்டும் அழைக்கப்பட்டுள்ளது, சர்வதேச அரங்கில் அவருக்கான இடம் நிரந்தரமாகி வருவதைக் காட்டுகிறது.

இந்த விருது விழாவை நடத்தும் க்ரஞ்சிரோல் (Crunchyroll) நிறுவனம், ராஷ்மிகாவை அதிகாரபூர்வமாக `இந்தியாவின் செல்லப்பிள்ளை’ (India's Sweetheart) என்று வர்ணித்து பெருமைப்படுத்தியுள்ளது.

இந்த நிகழ்வு ஏன் மதிப்பு மிக்கது?

உலகளவில் கோடிக்கணக்கான ரசிகர்களைக் கொண்ட `தி வீக்கெண்ட்' (The Weeknd) போன்ற இசை ஜாம்பவான்களுடன் ஒரே மேடையைப் பகிர்ந்துகொள்வது ஒரு மாபெரும் அங்கீகாரமாகும். இது வெறும் ஒரு சினிமா விருது விழா அல்ல.

சினிமா, இசை, மற்றும் அனிமேஷன் எனப் பல கலை வடிவங்கள் சங்கமிக்கும் ஒரு சர்வதேசப் பெருவிழா. இதில் இந்தியா சார்பாக ராஷ்மிகா முன்னிறுத்தப்படுவது இந்தியத் திரையுலகிற்கே பெருமை சேர்க்கும்.

ராஷ்மிகா நிஜ வாழ்க்கையிலேயே ஒரு தீவிர அனிமே ரசிகை. அனிமே கதைகளில் உள்ள ஆழமான உணர்வுகள் மற்றும் கற்பனைத்திறன் குறித்து அவர் பலமுறை பொதுவெளியில் பேசியுள்ளார். எனவே, அவரது பங்கேற்பு வெறும் பெயரளவிலான ஒன்றாக இல்லாமல், உண்மையான ஈடுபாட்டைக் குறிக்கிறது.

அனிமே விருதுகளின் சிறப்புகள்

இது குளோபல் அனிமே விருதுகளின் 10-வது ஆண்டு விழா. டோக்கியோவில் உள்ள புகழ்பெற்ற `கிராண்ட் பிரின்ஸ் ஹோட்டல் ஷின் டகனாவா'-வில் இந்த விழா பிரமாண்டமாக நடைபெறவுள்ளது.

இந்த ஆண்டு `Dan Da Dan Season 2', 'My Hero Academia Final Season', 'The Apothecary Diaries Season 2' போன்ற உலகப்புகழ் பெற்ற அனிமே தொடர்கள் விருதுகளுக்காகப் பரிந்துரைக்கப்பட்டுள்ளன.

ஜப்பானிய நடிகைகள், மெக்ஸிகன் பாடகர்கள், ஆஸ்திரேலியக் கலைஞர்கள் எனப் பல நாடுகளைச் சேர்ந்தவர்கள் விருது வழங்குநர்களாகக் கலந்துகொள்ளும் ஒரு பன்முகத்தன்மை கொண்ட விழா இது.

ராஷ்மிகாவின் ரசிகர் பட்டாளம்

'தி வீக்கெண்ட்' மற்றும் ராஷ்மிகா இருவரின் ரசிகர் பட்டாளமும் இணையும்போது, சமூக வலைத்தளங்களிலும் உலகளாவிய ஊடகங்களிலும் ராஷ்மிகா மாபெரும் பேசுபொருளாக மாறுவார். குறிப்பாக, ஜப்பான் மற்றும் ஆசிய நாடுகளில் அவரது புகழ் மேலும் பல மடங்கு அதிகரிக்கும்.

ராஷ்மிகா தற்போது 'மைசா' (Myssa) படத்தில் கோண்டு பழங்குடியினத்தைச் சேர்ந்த ஒரு போர்வீரராக நடித்து வருகிறார். இது தவிர 'காக்டெய்ல் 2' மற்றும் 'ரணபாலி' போன்ற படங்களும் வரிசையில் உள்ளன. இந்த உலகளாவிய அங்கீகாரம், அவரது அடுத்தடுத்த படங்களுக்கு சர்வதேச அளவில் மிகப்பெரிய கவனத்தைப் பெற்றுத்தரும்.

பாலிவுட் அல்லது தென்னிந்திய சினிமா வட்டத்தைத் தாண்டி, உலகளாவிய பாப் கலாசாரத்தில் இந்தியப் பிரதிநிதித்துவத்தின் முகமாக ராஷ்மிகா தன்னை நிலைநிறுத்திக் கொண்டுள்ளார்.