Doctor Vikatan: பீரியட்ஸின் முதல் நாளில் அளவுக்கதிக ப்ளீடிங்... சாதாரணமானதா, பிரச்னையா?

Doctor Vikatan: என் வயது 38. இரண்டு குழந்தைகள் இருக்கிறார்கள். கடந்த ஒரு வருடமாக எனக்கு பீரியட்ஸின்போது முதல் நாளன்று ப்ளீடிங் மிக அதிகமாக இருக்கிறது.

பெரிய நாப்கின்கள் நான்கு உபயோகிக்க வேண்டியிருக்கிறது. இரண்டாவது நாள் ஓரளவு குறைகிறது. மூன்றாவது நாள் அதைவிடக் குறைகிறது. இது சாதாரணமானதுதானா அல்லது கவலைப்பட வேண்டிய விஷயமா?
- Bhavani Priya, விகடன் இணையத்திலிருந்து

பதில் சொல்கிறார், கோவை, கிணத்துக்கடவைச் சேர்ந்த மகப்பேறு மருத்துவர் ஸ்ரீதேவி.

35 வயதைக் கடந்த பெண்களில் பலருக்கும் பீரியட்ஸ் சுழற்சி மற்றும் தன்மையில் மாற்றங்கள் ஏற்படலாம். பெரும்பாலும் இந்த அறிகுறிகள் சாதாரணமானவையாகவே இருக்கலாம். உதாரணத்துக்கு, உங்களுக்கு ப்ளீடிங் அதிகமிருக்கிறது... ஆனால், ஒரு மணி நேரத்துக்கொரு முறை நாப்கின் மாற்றும் அளவுக்கு இல்லை, ப்ளீடிங் கட்டிகளாக வெளியேறவில்லை.

அதாவது பத்து ரூபாய் நாணயத்தைவிட பெரிய அளவில் கட்டிகள் வெளியேறவில்லை, அதீத களைப்பு, மயக்கம், தலைச்சுற்றல், அனீமியா எனப்படும் ரத்தச்சோகை போன்ற பிரச்னைகள் எல்லாம் இல்லை என்றால் இதைச் சாதாரணமானதாகவே எடுத்துக்கொள்ளலாம்.

அதுவே, அடிக்கடி பெரிய நாப்கின்கள் மாற்றும் அளவுக்கு ப்ளீடிங் ஆகிறது, கட்டிகளாக வெளியேறுகிறது, மற்ற அறிகுறிகளையும் உணர்கிறீர்கள் என்றால் மருத்துவ ஆலோசனை அவசியம். 35 ப்ளஸ் வயதில் எந்தெந்தக் காரணங்களால் ப்ளீடிங் அதிகமாக இருக்கலாம் என்று தெரிந்துகொள்ள வேண்டும்.

முதல் காரணம், ஹார்மோன் சமநிலையின்மையாக இருக்கலாம். முதலில் தைராய்டு பரிசோதனை செய்து பாருங்கள். வழக்கமாக மெனோபாஸுக்கு முந்தைய 'பெரி மெனோபாஸ்' அறிகுறிகள், 40 ப்ளஸ் வயதில்தான் ஆரம்பிக்கும்.

அப்போது அதிக ப்ளீடிங் ஆவது, இரண்டு, மூன்று மாதங்கள் பீரியட்ஸே வராமலிருப்பது போன்ற பீரியட்ஸ் தொடர்பான பிரச்னைகளும் ஆரம்பிக்கும். உங்களுக்கு 38 வயது என்று குறிப்பிட்டிருப்பதால், இந்த அறிகுறி, முன்னதாகவே வரும் பெரிமெனோபாஸ் அறிகுறியாகவும் இருக்கலாம்.

கர்ப்பப்பையில் புற்றுநோய் அல்லாத கட்டிகள் இருக்கும்போது அவற்றை 'ஃபைப்ராய்டு' (Fibroids) என்று சொல்வோம். அதற்கான பரிசோதனையும் செய்து பார்க்க வேண்டும்.  'அடினோமயோசிஸ்' (Adenomyosis)  என்ற பிரச்னையாகவும் இருக்கலாம்.  அடினோமயோசிஸ் என்றால் கரப்பப்பை வழக்கத்தைவிட சற்று வீங்கியிருப்பது.

பெண்களுக்கு ஒவ்வொரு மாதவிடாயின்போதும் எண்டோமெட்ரியம் என்கிற லைனிங் உதிர்ந்து வெளியே வருகிறது. அதைத்தான் மாதவிடாய் சுழற்சி என்கிறோம். சில பெண்களுக்கு இந்த எண்டோமெட்ரியமானது, கரப்பப்பையின் தசைகளுக்கு நடுவில் வளர ஆரம்பிக்கும். அதுதான் அடினோமயோசிஸ். இதையும் மருத்துவப் பரிசோதனையில் உறுதிசெய்து கொள்ள வேண்டும்.

உங்களுடைய பிரச்னைக்கு இதுவரை எந்தச் சோதனையும் செய்யவில்லை என்றால் முதலில் மருத்துவ ஆலோசனையோடு அல்ட்ரா சவுண்டு ஸ்கேன் செய்து பாருங்கள். ப்ளீடிங் அதிகமிருக்கும்போது ஹீமோகுளோபின் குறையலாம். ஹீமோகுளோபின் அளவை செக் செய்யுங்கள். கர்ப்பப்பை வாய்ப் புற்றுநோய்க்கான 'பாப் ஸ்மியர்' பரிசோதனையையும் செய்து பாருங்கள். 

30 வயதுக்கு மேலான பெண்கள், 3 வருடங்களுக்கொரு முறை இந்த டெஸ்ட்டை செய்து பார்க்க வேண்டியது அவசியம். எனவே, நீங்கள் பிளட் டெஸ்ட், ஹார்மோன் டெஸ்ட், ஸ்கேன், பாப்ஸ்மியர் போன்றவற்றைச் செய்து பாருங்கள். இவை எல்லாம் நார்மலாக இருந்தால் பயப்படத் தேவையில்லை. 

உங்களுடைய லைஃப்ஸ்டைல் எப்படி இருக்கிறது என்பதும் முக்கியம். சரியாகத் தூங்குகிறீர்களா, சரிவிகித உணவுகளைச் சாப்பிடுகிறீர்களா, அதிகம் டிராவல் செய்கிறீர்களா என்றெல்லாம் பாருங்கள். ஸ்ட்ரெஸ்ஸைக் கட்டுப்படுத்தப் பழகுங்கள். இவை எல்லாம் சரிசெய்யப்பட்டாலே உங்கள் பீரியட்ஸ் பிரச்னை சரியாகும்.

உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.