IND vs NZ: "இந்தப் பயணம் எனக்கு அவ்வளவு எளிதானதாக இல்லை"- அபிஷேக் சர்மா எமோஷனல்

அகமதாபத்தில் இன்று (மார்ச்.8) நடைபெற்ற டி20 உலகக்கோப்பைத் தொடரின் இறுதிப்போட்டியில் நியூசிலாந்து அணியை 96 ரன்கள் வித்தியாசத்தில் இந்திய அணி வீழ்த்தி வெற்றி வாகையை சூடி இருக்கிறது.

இந்த வெற்றியின் மூலம் இந்திய அணி மூன்றாவது முறையாக உலகக்கோப்பையை முத்தமிட்டிருக்கிறது.

இன்றைய ஆட்டத்தில் அரைசதம் அடித்து இந்திய அணியின் வெற்றிக்கு அபிஷேக் சர்மா முக்கிய பங்காற்றியிருந்தார்.

போட்டிக்கு பிறகு பேசிய அபிஷேக் சர்மா, "கேப்டன் மற்றும் பயிற்சியாளர் இருவரும் என் மீது பெரிய நம்பிக்கை வைத்திருந்தார்கள். இப்படியொரு பெரிய தருணத்தில் நான் இருந்ததில்லை. ஆனால், அனைவரும் என் மீது நம்பிக்கையோடு இருந்தார்கள்.

இந்தப் பயணம் எனக்கு அவ்வளவு எளிதானதாக இல்லை. கடந்த ஒரு வருடமாக நான் சிறப்பாக ஆடியிருந்தேன். ஆனால், உலகக்கோப்பையில் ஆரம்ப போட்டிகளில் நான் சிறப்பாக ஆடவில்லை.

தொடரின் இடையில் கொஞ்சம் எமோஷனலாக இருந்தேன். கேப்டன் மற்றும் பயிற்சியாளரிடம் பேசினேன். அவர்கள்தான் என்னால் போட்டிகளை வென்று கொடுக்க முடியும் என நம்பிக்கையூட்டினார்கள்" என்றிருக்கிறார்.

தொடர்ந்து பேசிய திலக் வர்மா, " கடந்த ஒன்றரை வருடமாக அணிக்காக எந்த பொசிசனிலும் இறங்கி பேட்டிங் ஆட பயிற்சி பெற்றிருந்தோம். அணிக்கு தேவையான நேரத்தில் பேட்டிங் ஆட தயாராக இருந்தோம்.

பீல்டிங்கில் நாங்கள் இன்று சிறப்பாக செயல்பட்டோம் என்று சொல்லமாட்டேன். ஆனால், சில நல்ல கேட்ச்களை பிடித்தோம். அடுத்த சில நாட்களுக்கு முழுமையாக பார்ட்டிதான். பார்ட்டியை முடித்துவிட்டு ஐ.பி.எல் இல் சந்திப்போம்" என்றிருக்கிறார்.