Shah Rukh Khan: `கணவரை விட உங்களை நேசிக்கிறேன்!’ - ரசிகையின் பேச்சு; பக்குவமாக பதிலளித்த ஷாருக் கான்

திரைப்பிரபலங்கள் பொது நிகழ்ச்சிகளில் கலந்துகொள்ளும் போது ரசிகர்கள் உணர்ச்சிவசப்பட்டு பேசுவது வழக்கம். அப்படி வரும் எதிர்பாராத கேள்விகளுக்கும், கருத்துகளுக்கும் பிரபலங்கள் எப்படிப் பதிலளிக்கிறார்கள் என்பதுதான் அவர்களின் ஆளுமையை வெளிப்படுத்தும். அந்த வகையில், தனது ரசிகை ஒருவரின் அதீத அன்பின் வெளிப்பாட்டை ஷாருக் கான் நகைச்சுவையாகவும், அதே சமயம் மிகவும் நாகரிகமாகவும் கையாண்ட விதம் இணையதளவாசிகளின் மனதை வென்றுள்ளது.

சமீபத்தில் கர்நாடக மாநிலம், மங்களூருவில் ஒரு ரியல் எஸ்டேட் நிறுவனம் ஏற்பாடு செய்திருந்த நிகழ்ச்சியில் ஷாருக் கான் சிறப்பு விருந்தினராகக் கலந்து கொண்டார். அங்கு அவர் தனது ஹிட் பாடல்களுக்கு நடனமாடியும், ரசிகர்களுடன் உரையாடியும் மேடையை கலகலப்பாக்கினார்.

அப்போது கூட்டத்தில் இருந்த ஒரு பெண் ரசிகை சத்தமாக, "ஷாருக் கான், என் கணவரை விட நான் உங்களை அதிகம் காதலிக்கிறேன்" (I love you more than my husband) என்று கூறினார்.

ரசிகையின் இந்த வார்த்தைகளைக் கேட்டதும் சற்றும் யோசிக்காத ஷாருக் கான், "இதையெல்லாம் நீங்கள் என்னிடம் தனியாக அல்லவா சொல்லியிருக்க வேண்டும்" என்று நகைச்சுவையாகப் பதிலளித்தார். அவரது இந்தப் பதிலைக் கேட்டதும் அங்கிருந்த பார்வையாளர்கள் அனைவரும் சிரிப்பலையில் ஆழ்ந்தனர்.

பின்னர், நிலைமையை மிகவும் பக்குவமாக கையாண்ட அவர், "இது வெறும் பேச்சிற்காக சொல்லப்பட்ட வார்த்தை என்பது எனக்குத் தெரியும். உங்கள் உணர்வுகளை நான் புரிந்துகொள்கிறேன். உங்கள் கணவரும் இதைப் புரிந்துகொள்வார் என உறுதியாக நம்புகிறேன். உங்கள் அனைவரையும் நான் நேசிக்கிறேன். உங்கள் கணவரையும், குடும்பத்தினரையும் நான் நேசிக்கிறேன். உங்கள் கணவருக்கு நீங்கள் லவ் யூ சொல்லுங்கள். மிக்க நன்றி" என்று பெருந்தன்மையுடன் கூறி அந்த உரையாடலை அழகாக முடித்து வைத்தார்.

ரசிகர்களுடனான இந்த அன்பான பிணைப்பு ஒருபுறம் இருக்க, ஷாருக் கான் தற்போது தனது அடுத்தப் படமான 'கிங்' திரைப்படத்தின் வேலைகளில் பிஸியாக இருக்கிறார். டிசம்பர் 24, 2026 அன்று வெளியாகவுள்ள இப்படம் ஒரு அதிரடி ஆக்‌ஷன் திரைப்படமாக உருவாகிவருகிறது.

இதில் முதன்முறையாகத் தனது மகள் சுஹானா கானுடன் இணைந்து ஷாருக் கான் திரையைப் பகிர்கிறார். இவர்களுடன் அபிஷேக் பச்சன், தீபிகா படுகோனே போன்ற பல முன்னணி நட்சத்திரங்களும் நடிக்கின்றனர்.

ஒரு சூப்பர்ஸ்டாராக இருந்தாலும், தன்னைத் தேடி வரும் ரசிகர்களிடம் எவ்வித அகம்பாவமும் இன்றி எப்போதும் அன்போடும், நகைச்சுவை உணர்வோடும் பழகுவதுதான் ஷாருக் கானின் தனிச்சிறப்பு. "கணவரை விட உங்களை நேசிக்கிறேன்" என உணர்ச்சிவசப்பட்ட ரசிகைக்கு, நகைச்சுவையோடு பதிலளிக்க ஆரம்பித்து, குடும்பத்தின் மீதான மரியாதையோடு அவர் முடித்த விதம்தான் அவரை 'பாலிவுட்டின் கிங்' என நிரூபித்துள்ளது.