TN 2026: "அரசியல் அறம் என்பது தியாகிகளால் உருவாக்கப்பட்டதுனு அவர் சொன்னார்" - நட்டி நடராஜ் பேட்டி

தமிழக சட்டமன்றத் தேர்தல் நெருங்கும் சூழலில் நட்டி நடராஜ் நடித்த 'டி.என். 2026 தங்க நட்சத்திரம்' என்ற படம் அரசியல் நையாண்டி படமாகக் கவனம் ஈர்த்திருக்கிறது.

சமீபத்தில் வெளியான அதன் டீஸரில் விஜய்யின் கெட்டப்பில் நட்டி தோன்ற, நடிகர்கள் தம்பி ராமையா, ரெடின் கிங்ஸ்லி, எம்.எஸ்.பாஸ்கர் எனப் பலரும் அரசியல்வாதிகளாக அதிரடி வசனங்கள் தெறிக்கின்றன.

தம்பி ராமையாவின் மகன் உமாபதி இயக்கியிருக்கும் இப்படம் இன்னும் சில நாள்களில் திரைக்கு வருகிறது. இந்நிலையில் படத்தின் ஹீரோவான நட்டியிடம் பேசினோம்.

``ஒரு விஷயத்தைத் தெளிவுபடுத்திக்க விரும்புறேன். இந்தப் படத்துல எந்தக் கட்சியையும் தாக்கல. எந்தத் தலைவரையும் குறைசொல்லலை. இது முழுக்க முழுக்க ஒரு காமெடி படம். படத்துல நான் வித்தியாசமான 5 கெட்டப்கள்ல வர்றேன். அதில் டீஸரில் வெளியான கெட்டப்பும் ஒண்ணு.

முதல் ஃபிரேமில் இருந்து கடைசி ஃபிரேம் வரை ஜனங்களை வாய் விட்டு சிரிக்க வைக்கற படமாக இருக்கும். என்னோட கேரக்டர் பெயர் குல்கந்த் குமார். வட நாட்டில் இருந்து இங்கே பஞ்சம் பிழைக்க வந்த ஒருவன் திடீரென ஸ்டார் ஆக, அதன் பிறகு தமிழ்நாட்டில் என்ன நடக்குது என்பதுதான் படத்தின் கதைக்கரு.

இந்தப் படத்தின் கதையை தம்பி ராமையா சார் சொல்றதுக்கு முன்னாடி, 'அரசியல் அறம் என்பது தியாகிகளால் உருவாக்கப்பட்டது'னு சொன்னதோடு நாட்டுக்காக தியாகம் செய்த தலைவர்கள் பத்தியும் சொன்னதோடு 'நமது பாடத்திட்டங்களிலேயே அரசியல் ஒரு பாடமாகக் கொண்டு வந்திருக்கணும்' என்ற இன்ட்ரோவோடு இந்தக் கதையைச் சொன்னார்.

குலுங்கி குலுங்கி சிரிச்சுக்கிட்டே கதையைக் கேட்டேன். அதன் பிறகு உடனடியாக ஷூட்டிங் கிளம்பிட்டோம். சென்னை, கோவை, திருப்பூர்னு விதவிதமான இடங்கள்ல ஷூட் செய்திருக்கோம்.

இதுக்கு முன் ஒரு ஏழெட்டு படங்கள் இயக்கின அனுபவம் கொண்டவர் மாதிரி உமாபதியின் டைரக்ஷன் இருந்தது. ஒவ்வொரு விஷயத்தையும் நுணுக்கமாகப் பார்க்கக்கூடியவர். எல்லா விஷயத்துக்குமே ரெஃபரன்ஸ் வச்சு, பார்த்து 'இது இப்படி வந்தால் நல்லா இருக்கும்'னு உதாரணத்தோடு விளக்கி வேலை வாங்கினதால, எனக்குமே அவர் இயக்கத்துல நடிச்சது எளிதா இருந்தது.

மறுபடியும் வலியுறுத்தி சொல்ற விஷயம், இந்தப் படத்தில் ஒரு தனி மனித தாக்குதலும் இல்லை. ஒரு குறிப்பிட்ட தலைவரைப் பத்தின படமோ கிடையாது. இந்தப் படம் முழுக்க முழுக்க காமெடி படம்'' எனச் சொல்லும் நட்டி, அடுத்து 'கருப்பு', 'இதயம்முரளி', 'திடுக்' ஆகிய படங்கள் கைவசம் வைத்திருக்கிறார்.