Vishal Garg அன்று 3 நிமிடத்தில் 900 பேரை பணியிலிருந்து நீக்கியவர்; இன்று அவரையே வெளியேற்றிய நிறுவனம்

டிசம்பர் 2021-ல், 3 நிமிட ஜூம் (Zoom) மீட்டீங்கில் 900 ஊழியர்களை ஒரே நேரத்தில் பணிநீக்கம் செய்து உலகளவில் பெரும் சர்ச்சைக்கு ஆளான இந்திய-அமெரிக்க தொழிலதிபர் விஷால் கார்க், தற்போது Better Home & Finance நிறுவனத்தின் CEO பதவியில் இருந்து நீக்கப்பட்டுள்ளார்.

இந்தியாவில் பிறந்து நியூயார்க்கில் வளர்ந்த விஷால் கார்க், ஸ்டெர்ன் பிசினஸ் பள்ளியில் பட்டம் பெற்ற பிறகு 'மைரிச்அங்கிள்' நிறுவனத்தைத் தொடங்கினார். அதைத் தொடர்ந்து, 2014-ல் 'பெட்டர்' நிறுவனத்தைத் தொடங்கினார்.

பாரம்பரிய அடமானக் கடன் முறைக்கு மாற்றாகத் தொடங்கப்பட்ட இந்நிறுவனம், தொற்றுநோய்க் காலத்தில் ரீஃபைனான்சிங் ஏற்றத்தின் போது 8 பில்லியன் டாலர் மதிப்பைப் பெற்றிருந்தது. ஆனால், 2021-ல் 900 ஊழியர்களை இரக்கமின்றி நீக்கிய சம்பவமும், அதைத் தொடர்ந்து எழுந்த கொந்தளிப்பும் நிறுவனத்தின் நற்பெயரைக் கடுமையாகப் பாதித்தன.

2022-க்குப் பிறகு நிறுவனம் 1.5 பில்லியன் டாலருக்கும் அதிகமான இழப்பைச் சந்தித்திருக்கிறது. விஷால் கார்க் தலைமையின் கீழ் நிறுவனத்தின் பங்குகள் 90%-க்கும் மேல் சரிந்திருக்கிறது.

மேலும், விஷால் கார்க்கின் முடிவெடுக்கும் திறன், குணம் மற்றும் நம்பகத்தன்மை ஆகியவற்றில் ஏற்பட்ட கவலைகள் காரணமாக மற்ற இயக்குநர்கள் அனைவரும் அவரை நீக்க ஒருமனதாக வாக்களித்துள்ளனர் எனக் கூறப்படுகிறது.

இது தொடர்பாக பேசிய விஷால் கார்க், ``2021-ல் 1.5 பில்லியன் டாலராக இருந்த நிறுவனத்தின் வருடாந்திர விற்பனை 2023-ல் 70 மில்லியன் டாலராக சரிந்து, தற்போதைய சந்தை மதிப்பு தோராயமாக 300 மில்லியன் டாலராக உள்ளது. செயற்கை நுண்ணறிவு (AI) தொழில்நுட்பம் மற்றும் ஹோம்-ஈக்விட்டி கடன்கள் மூலம் 2026-ல் வருவாய் 200 மில்லியனை எட்டும் என்ற நம்பிக்கை நிலவுகிறது.

லாபத்தை நெருங்கும் "5-யார்டு கோட்டில்" நிறுவனம் இருக்கும் தருணத்தில் நான் நீக்கப்பட்டுள்ளேன். எனது பதவியை மீண்டும் பெற வழக்கறிஞர்களை அமர்த்தியிருக்கிறேன். நிறுவனம் மீண்டும் லாபப் பாதைக்கு வரும் வரை ஆண்டுக்கு 1 டாலர் சம்பளத்தில் பணியாற்றத் தயார். சிறப்பு வாக்குரிமை கொண்ட பங்குதாரர்களின் ஆதரவு எனக்கு இருக்கிறது. நிறுவனத்தின் எதிர்காலம் இன்னமும் பிரகாசமாகவே உள்ளது." எனக் குறிப்பிட்டிருக்கிறார்.