கரூர் மரணங்கள்: குறுக்குக் கேள்விகள்; 2 நாள் விசாரணை? ஆஜராகும் விஜய்; தவெக-வை நெருக்கும் சிபிஐ?

கரூர் சம்பவத்தில் சிபிஐ தீவிர விசாரணையை மேற்கொண்டு வருகிறது. தவெகவின் முக்கிய நிர்வாகிகளை விசாரித்த சிபிஐ, விஜய்க்கும் சம்மன் அனுப்பியிருந்தது.

சிபிஐ முன்பு ஆஜராக டெல்லி புறப்பட்டுவிட்டார் விஜய். இந்நிலையில், விஜய்யைக் குறைந்தபட்சம் இரண்டு நாள்களாவது ஆஜராக வைப்பார்கள் எனக் கிசுகிசுக்கின்றனர் உளவுத்துறை வட்டாரத்தினர்.

தவெகவின் முக்கிய நிர்வாகிகளான என். ஆனந்த், ஆதவ் அர்ஜூனா, சி.டி.ஆர்.நிர்மல் குமார் ஆகியோர் டிசம்பர் கடைசி வாரத்தில் சிபிஐ முன்பு ஆஜராகியிருந்தனர். அவர்களை மூன்று நாள்களுக்கு சிபிஐ விசாரித்திருந்தது.

கரூரில் பாதுகாப்புப் பணியிலிருந்த சம்பந்தப்பட்ட அதிகாரிகளையும் சிபிஐ விசாரித்திருந்தது. ஏற்கனவே கரூருக்கு நேரில் வந்து சம்பவ இடத்தையும் தடயங்களையும் பார்வையிட்டு மக்களிடம் விசாரித்த சிபிஐ, சமீபத்தில் விஜய்யின் பிரசார பேருந்தையும் கரூருக்கு ஓட்டிச் சென்றிருந்தது. அங்கே அந்தப் பேருந்தை முழுமையாக ஆய்வு செய்திருந்தனர்.

இந்நிலையில், தவெக தலைவர் விஜய் சிபிஐ முன்பு ஆஜராகவிருக்கிறார். இதற்காக காலை 7 மணிக்கே தனி விமானத்தில் டெல்லிக்குப் புறப்பட்டிருக்கிறார். காலை 11 மணிக்கு விஜய் சிபிஐ அலுவலகத்தில் ஆஜராகவிருக்கிறார்.

இந்நிலையில், விஜய்யிடம் குறைந்தபட்சம் இரண்டு நாள்களுக்காகவது விசாரணை நடத்தப்படும் எனத் தகவல் சொல்கின்றனர் உளவுத்துறையினர்.

காவல்துறை அதிகாரிகள் மற்றும் தவெகவின் முக்கிய நிர்வாகிகள் கூறிய பதில்களை வைத்துக்கொண்டு விஜய்யிடம் குறுக்குக் கேள்விகளும் கேட்கப்படும் என்கின்றனர்.

கரூர் விவகாரத்தில் பாஜகவினர் விஜய்க்கு முழுமையாக ஆதரவு தெரிவித்தபோதும், அவர் பதிலுக்கு எந்தக் க்ரீன் சிக்னலையும் காட்டவில்லை. சிறப்புப் பொதுக்குழு ஒன்றைக் கூட்டி மீண்டும் தானே முதல்வர் வேட்பாளர் எனத் தீர்மானம் போட்டுக்கொண்டார்.

திமுகவின் எதிர்ப்பு வாக்குகளை ஓரணியில் இணைக்க நினைக்கும் பாஜகவின் கனவுக்கு விஜய் தடையாக இருப்பதால் சிபிஐ விசாரணையும் அதன் நடைமுறைகளும் விஜய்க்கு அத்தனை எளிதாக இருக்கப்போவதில்லை என்கின்றனர் அரசியலை உற்றுநோக்குபவர்கள்.