மது போதையில் போலீஸாரை தாக்கிய போதை கும்பல்; சிகிச்சையிலிருந்த ஊர்காவல் படை வீரர் உயிரிழப்பு!

அரியலூர் மாவட்டம் செந்துறை அருகே உள்ள தளவாய் காவல் நிலையத்தில், ராஜாகண்ணு போலீஸாகவும், வெங்கடேசன் (47) ஊர்க்காவல் படை வீரராகவும் பணி புரிந்தனர். இருவரும் இரவு நேரத்தில் ரோந்து பணியில் ஈடுபடுவது வழக்கம். அதன்படி கடந்த 30ம் தேதி இரவு ரோந்து பணியில் ஈடுபட்டுள்ளனர். அப்போது, தளவாய் காவல் நிலையத்தில் இருந்து 100 மீட்டர் தொலைவில் மெயின் ரோட்டில் உள்ள லாரி செட் முன்பு அமர்ந்து சிலப்பனுர் கிராமத்தை சேர்ந்த மதிவாணன், தாமரைக்கண்ணன், பரிதி ஆகிய மூவரும் மது குடித்துள்ளனர்.

இதைப் பார்த்த ராஜகண்ணுவும், வெங்கடேசனும் ராத்திரி 12 மணி ஆகி விட்டது, இன்னும் மது குடித்து கொண்டுள்ளீர்கள் உடனே இங்கிருந்து வீட்டுக்கு கிளம்ப வேண்டும், நாங்க திரும்பி வரும் போது மூணு பேரும் இங்க இருக்க கூடாது என்று எச்சரித்து விட்டு சென்றனர். இதைத் தொடர்ந்து ரோந்தை முடித்து விட்டு அதிகாலை 2 மணி அளவில் இருவரும் திரும்பி வந்துள்ளனர். அப்போது, விநாயகர் கோயில் அருகில் உள்ள மரப்பட்டறை சந்தில் அமர்ந்து மூவரும் மது குடிப்பதை தொடர்ந்துள்ளனர்.

இதைப் பார்த்த போலீஸார், ஏற்கனவே வீட்டுக்கு கிளம்புங்கனு சொல்லிட்டு போன பிறகும் போகாமல் இன்னும் குடிச்சிட்டு இருக்கீங்க என்று கேட்டுள்ளனர். நிலை கொள்ளாத போதையில் இருந்த மூவரும் நாங்க இங்கு உட்கார்ந்து குடிப்போம், உங்களால என்ன செய்ய முடியுமோ செஞ்சிக்கங்க என்று கூறி சண்டை போட்டதுடன் இரண்டு போலீஸாரையும் மரியாதை குறைச்சலாக பேசியுள்ளனர்.

இதையடுத்து ராஜாகண்ணு காவல் நிலையத்தில் உள்ள போலீஸாருக்கு இது குறித்து தகவல் கொடுத்துள்ளார். இதையடுத்து, மூன்று பேரும் போலீஸ் ராஜாகண்ணு, ஊர்காவல் படை வீரர் வெங்கடேசனையும் கடுமையாக தாக்கியுள்ளனர். அப்போது வெங்கடேசன், போலீஸ் மீது கை வைக்கிறீங்களா? என்று கேட்க, போலீஸ்னா பயமா என்று கேட்டதுடன் வெங்கடேசன் முகம் மற்றும் தலையில் அடித்துள்ளனர். வலி தாங்காமல் வெங்கடேசன் கத்தியும் கேட்காமல் தொடர்ந்து அடிக்க அப்படியே மயங்கி விழுந்து விட்டார். ராஜாகண்ணுவை அவரது இரு கைகளையும் முறுக்கி அடித்துள்ளனர்.

இந்நிலையில், ஸ்டேஷனிலிருந்து சம்பவ இடத்துக்கு வந்த போலீஸார் தாக்குதலுக்குள்ளான இருவரையும் மீட்டு மருத்துவமனையில் சிகிச்சைக்கு சேர்த்தனர். ஆபத்தான நிலையில் தஞ்சாவூர் அரசு மருத்துவக் கல்லூரி மருத்துவமனையில் சிகிச்சை பெற்று வந்த வெங்கடேசன் சிகிச்சை பலன் அளிக்காமல் உயிரிழந்தார். போலீஸாரை தாக்கிய மூவரும் ஏற்கெனவே கைது செய்யப்பட்டுள்ளது குறிப்பிடத்தக்கது.