'முதல் ஓவரிலேயே 3 விக்கெட்டுகள்; ஐ.பி.எல் வரலாற்றிலேயே நிகழாத சம்பவம்!' - யார் இந்த பிரபுல் ஹிங்கே?

ராஜஸ்தான் ராயல்ஸூக்கு எதிரான போட்டியில் சன்ரைசர்ஸ் அணிக்காக ஆடிய அறிமுக வீரர் பிரபுல் ஹிங்கே வீசிய முதல் ஓவரிலேயே 3 விக்கெட்டுகளை வீழ்த்தி அசத்தியிருக்கிறார்

ராஜஸ்தான் ராயல்ஸூக்கு எதிரான போட்டியில் ஹர்ஷல் படேல், உனத்கட் என சீனியர்களை பென்ச்சில் வைத்துவிட்டு அறிமுக வீரர்களான பிரபுல் ஹிங்கேவையும் சகிப் ஹூசைனையும் பௌலிங்கிற்கு பயன்படுத்தியது சன்ரைசர்ஸ். சன்ரைசர்ஸ் முதலில் பேட் செய்து 216 ரன்களை எடுத்திருந்தது. ராஜஸ்தான் சேஸை தொடங்கியது. ஜெய்ஸ்வாலும் சூர்யவன்ஷியும் ஓப்பனிங் இறங்கினார்கள்.

சூர்யவன்ஷி உச்சக்கட்ட பார்மில் இருக்கிறார். மும்பை, பெங்களூரு என எல்லா போட்டிகளிலும் அசத்தியிருந்தார். ஆனால், இங்கே பிரபுல் ஹிங்கே வீசிய இன்னிங்ஸின் முதல் ஓவரிலேயே வைபவ் சூர்யவன்ஷி டக் அவுட் ஆகினார். டைட்டான லெந்தில் ஷார்ட்டாக வீசிய பந்தை சரியாக கனெக்ட் செய்ய முடியாமல் அவுட் ஆகியிருந்தார். இதே ஓவரில் துருவ் ஜூரேல் மற்றும் ப்ரெட்டோரியஸின் விக்கெட்டுகளையும் ஹிங்கே வீழ்த்தினார்.

ஐ.பி.எல் வரலாற்றிலேயே இன்னிங்ஸின் முதல் ஓவரிலேயே எந்த பௌலரும் 3 விக்கெட்டுகளை வீழ்த்தியதே இல்லை. அப்படியொரு அசாத்திய சாதனையை அறிமுக வீரரான ஹிங்கே செய்திருந்தார். மேலும், ராஜஸ்தான் கேப்டன் ரியான் பராக்கின் விக்கெட்டையும் ஹிங்கே வீழ்த்தியிருந்தார்.

அறிமுக போட்டியிலேயே மிரட்டலான பெர்பார்மென்ஸை கொடுத்த ஹிங்கே, விதர்பா அணிக்காக ஆடி வரும் வேகப்பந்து வீச்சாளர். கடந்த சீசனில் ரஞ்சி போட்டியில் தமிழ்நாட்டுக்கு எதிராக ஹிங்கே பந்துவீசிய விதத்தை பார்த்து வியந்த வருண் ஆரோன் அவரை சன்ரைசர்ஸின் ட்ரையல்ஸூக்கு அழைத்திருந்தார். ட்ரையல்ஸில் சில Match Situation களில் ஹிங்கே சிறப்பாக வீச அவரை 30 லட்ச ரூபாய்க்கு வாங்கியது சன்ரைசர்ஸ் அணி. சீனியர் பௌலர்கள் சரியாக சோபிக்காததால் அறிமுக வீரரை நம்பி சன்ரைசர்ஸ் வாய்ப்பு கொடுத்தது. அந்த வாய்ப்பை ஹிங்கே ஆகச்சிறப்பாக பயன்படுத்திக் கொண்டிருக்கிறார்.