மேஜர் ரவி முதல் அஞ்சலி நாயர் வரை! - கேரளா சட்டமன்ற தேர்தலில் போட்டியிட்டிருக்கும் திரைப்பிரபலங்கள்

கேரளாவில் சட்டமன்ற தேர்தல் வாக்குப்பதிவு நடைபெற்று வருகிறது. 3 மணி வரையிலான நிலவரப்படி, 62 சதவீத வாக்குகள் பதிவாகி இருக்கின்றன.

அனைத்து மாநிலங்களிலும் ஒவ்வொரு தேர்தலிலும் நடிகர்கள் பலரும் புதிதாக அரசியலுக்குள் களமிறங்குவார்கள்.

அரசியல் கட்சியின் விடுக்கும் அழைப்பின் காரணமாக நடிகர்கள் சிலர் அரசியலுக்கு வருவார்கள்.

இல்லையெனில், மக்களிடம் இருக்கும் பிரபலத்தின் மூலம் வாக்கு சேகரித்துவிடலாம் என்கிற ஆர்வத்துடனும் சிலர் வருவார்கள்.

அப்படி இம்முறையும் நடிகர்கள் பலரும் புதிதாக களமிறங்கி, தேர்தலில் போட்டியிட்டிருக்கிறார்கள். அவர்கள் யார் யார்? எந்தெந்த தொகுதியில் அவர்கள் போட்டியிட்டிருக்கிறார்கள் என்பதை இங்குப் பார்ப்போமா...

என்.டி.ஏ கூட்டணியில் இடம்பெற்றிருக்கும் டிவெண்டி 20 கட்சி இம்முறை நான்கு சினிமா பிரபலங்களையும் ஒரு சோசியல் மீடியா பிரபலத்தையும் தேர்தலில் களமிறக்கியிருக்கிறது.

இக்கட்சி சார்பாக, தாமரை சின்னத்தில் திருப்பூணித்துரா தொகுதியில் போட்டியிட்டிருக்கிறார் நடிகை அஞ்சலி நாயர். நடிகை லக்ஷ்மி ப்ரியா, பெரும்பாவூர் தொகுதியில் போட்டியிட்டிருக்கிறார்.

நடிகை வீணா நாயர் எட்டுமானூர் தொகுதியில் போட்டியிட்டிருக்கிறார். சோசியல் மீடியா பிரபலமான ப்ரோமி குரியாகோஸ் அங்கமாலி தொகுதியில் போட்டியிட்டிருக்கிறார்.

முன்னாள் ராணுவ அதிகாரியும், திரைப்பட இயக்குநருமான மேஜர் ரவி இம்முறை தேர்தல் அரசியலுக்குள் குதித்திருக்கிறார். பாலக்காடு மாவட்டத்திலுள்ள ஒட்டப்பாலம் தொகுதியில் இவர் வேட்பாளராகக் களமிறங்கியிருக்கிறார்.

பிரபல நகைச்சுவை நடிகரான ரமேஷ் பிஷாரடி காங்கிரஸ் சார்பாக பாலக்காடு தொகுதியில் போட்டியிட்டிருக்கிறார். நடிகர் சுதீர் கரமனா, இடதுசாரி ஜனநாயக முன்னணி (LDF) ஆதரவுடன் சுயேச்சை வேட்பாளராகத் திருவனந்தபுரத்தில் போட்டியிட்டிருக்கிறார்.

இவர்களைத் தாண்டி சில பிக் பாஸ் பிரபலங்கள், தொலைக்காட்சி முகங்களிலும் இம்முறை கேரளா சட்டமன்ற தேர்தலில் போட்டியிட்டிருக்கிறார்கள்.