விண்ணை முட்டும் Space X பங்குகள்; பிரம்மாண்ட IPO - முதல் ட்ரில்லியனராகும் விளிம்பில் எலான் மஸ்க்?

விண்வெளிப் பயண வரலாற்றில் மட்டுமல்ல, உலகப் பங்குச் சந்தை வரலாற்றிலும் ஒரு புதிய அத்தியாயத்தை எழுதியிருக்கிறது எலான் மஸ்க்கின் ஸ்பேஸ்எக்ஸ் நிறுவனம். இதுவரை கண்டிராத பிரம்மாண்டமான ஒரு பொதுப் பங்கு வெளியீடு (IPO) மூலம், உலகையே தன்பக்கம் திருப்பியிருக்கிறது.

இந்த IPO, ஸ்பேஸ்எக்ஸை உலகின் மிகப்பெரிய பொது நிறுவனங்களின் பட்டியலில் சேர்த்துள்ளதுடன், அதன் நிறுவனர் எலான் மஸ்க்கை உலகின் முதல் ட்ரில்லியனர் என்ற வரலாற்றுச் சாதனைக்கு மிக அருகில் கொண்டு சென்று நிறுத்தியுள்ளது.

வியாழக்கிழமை அந்நிறுவனம் வெளியிட்ட அறிக்கையின்படி, ஒரு பங்கிற்கு 135 டாலர் என விலை நிர்ணயம் செய்யப்பட்டு, 555.6 மில்லியன் பங்குகள் மூலம் சுமார் 75 பில்லியன் டாலர்களை ஸ்பேஸ்எக்ஸ் திரட்டியுள்ளது. இந்தத் தொகை, 2019-ம் ஆண்டில் சவுதி அராம்கோ திரட்டிய 29.4 பில்லியன் டாலர்களை விட இரண்டு மடங்கிற்கும் அதிகம் என்பது இதன் பிரம்மாண்டத்திற்குச் சான்றாகும். மேலும், இந்த ஒப்பந்தத்தின் ஒரு பகுதியாக, கூடுதலாக 83.3 மில்லியன் பங்குகளை அதே விலையில் விற்கும் உரிமையை வங்கிகளுக்கு ஸ்பேஸ்எக்ஸ் வழங்கியுள்ளது. இது முழுமையாகப் பயன்படுத்தப்பட்டால், திரட்டப்படும் மொத்தத் தொகை 86 பில்லியன் டாலராக உயரும்.

இந்த IPO-விற்கு கிடைத்த வரவேற்பு நம்பமுடியாததாக இருந்தது. கிடைக்கப்பெற்ற பங்குகளை விட நான்கு மடங்கு அதிகமான தேவை இருந்ததாக ப்ளூம்பெர்க் செய்தி நிறுவனம் தெரிவித்துள்ளது. IPO விலையின்படி, ஸ்பேஸ்எக்ஸின் சந்தை மதிப்பு 1.77 ட்ரில்லியன் டாலராக கணக்கிடப்பட்டுள்ளது. இது, மஸ்க்கின் மற்றொரு நிறுவனமான டெஸ்லாவை விடவும் அதிகம். இதன்மூலம், ஸ்பேஸ்எக்ஸ் உலகின் முதல் 10 மதிப்புமிக்க நிறுவனங்களின் பட்டியலில் கம்பீரமாக நுழைந்துள்ளது.

இந்த மாபெரும் வெற்றிக்கு பின்னால் இருப்பது யார்? சந்தேகமே இல்லாமல், எலான் மஸ்க்கின் தீவிர விசுவாசிகளான சில்லறை முதலீட்டாளர் சமூகம்தான். அவர்களுக்காக ஒதுக்கப்பட்ட 20% பங்குகளை விடப் பன்மடங்கு அதிகமாக, சுமார் 100 பில்லியன் டாலர்களுக்கும் மேல் அவர்கள் பங்குகளை வாங்க ஆர்டர் செய்ததாக தகவல்கள் தெரிவிக்கின்றன.

ஆனால், இந்த கொண்டாட்டங்களுக்கு மத்தியில் எச்சரிக்கை மணியும் ஒலிக்கத்தான் செய்கிறது. மூத்த முதலீட்டாளரான ஜேம்ஸ் சானோஸ், "இது வெறும் நம்பிக்கைகள் மற்றும் கனவுகளின் IPO" என்று கடுமையாக விமர்சித்துள்ளார். லாபத்தையே ஈட்டாத ஒரு நிறுவனத்தின் அடிப்படை வலிமையை விட, மஸ்க் மீதான ஆர்வமும், செயற்கை நுண்ணறிவு (AI) மீதான மோகமுமே இந்த IPO-வை இயக்குகிறது என்பது அவரது வாதம். "செவ்வாய்க் கிரகத்தில் காலனிகள், நிலவில் தொழிற்சாலைகள், விண்வெளியில் தரவு மையங்கள் என எந்தக் கதையையும் நீங்கள் உருவாக்கலாம். இந்த மதிப்பீட்டை நியாயப்படுத்த இது போன்ற கற்பனைக் கதைகள் தேவைப்படுகின்றன," என்கிறார் அவர்.

இருப்பினும், ஸ்பேஸ்எக்ஸின் எதிர்காலம் அதன் ராக்கெட் மற்றும் செயற்கைக்கோள் சேவைகளைத் தாண்டி, செயற்கை நுண்ணறிவை மையமாகக் கொண்டிருப்பதே இந்த மாபெரும் மதிப்பீட்டிற்குக் காரணம். கடந்த ஆறு மாதங்களில், ராக்கெட் ஏவும் நிறுவனமாக இருந்த ஸ்பேஸ்எக்ஸ், ஒரு AI ஜாம்பவானாக தன்னை உருமாற்றிக் கொண்டுள்ளது. கூகுள் மற்றும் ஆந்த்ரோபிக் போன்ற நிறுவனங்களுக்கு மாதத்திற்கு 2.17 பில்லியன் டாலர் மதிப்பிலான கம்ப்யூட்டிங் உள்கட்டமைப்பு சேவைகளை வழங்கும் ஒப்பந்தங்கள், அதன் வருவாயின் முக்கிய ஆதாரமாக மாறவிருக்கின்றன.

இந்த IPO மூலம், எலான் மஸ்க்கின் நிகர சொத்து மதிப்பு சுமார் 275 பில்லியன் டாலர் உயர்ந்து, 970 பில்லியன் டாலரை எட்டும் என ப்ளூம்பெர்க் பில்லியனர்கள் குறியீடு கணக்கிட்டுள்ளது. ட்ரில்லியனர் என்ற இலக்கை அடைய இன்னும் சில பில்லியன்கள் மட்டுமே தேவை. வர்த்தகத்தின் முதல் நாளில் பங்குகள் வெற்றிகரமாகச் செயல்பட்டால், அந்த வரலாற்று மைல்கல்லை அவர் எட்டுவது நிச்சயம் என்கிறார்கள்.

கோல்ட்மேன் சாக்ஸ், மோர்கன் ஸ்டான்லி, பேங்க் ஆஃப் அமெரிக்கா உள்ளிட்ட 23 வங்கிகள் இந்த IPO-வை முன்னின்று நடத்துகின்றன. ஸ்பேஸ்எக்ஸ் நிறுவனம், 'SPCX' என்ற குறியீட்டில் நாஸ்டாக் மற்றும் நாஸ்டாக் டெக்சாஸ் பங்குச் சந்தைகளில் வெள்ளிக்கிழமை வர்த்தகத்தைத் தொடங்கும் என எதிர்பார்க்கப்படுகிறது. இது செயற்கை நுண்ணறிவு துறையில் வரவிருக்கும் ஆந்த்ரோபிக் மற்றும் ஓபன்ஏஐ போன்ற நிறுவனங்களின் IPO-க்களுக்கு ஒரு முன்னோட்டமாகவும் பார்க்கப்படுகிறது.