''எனது கதையில் நம்பிக்கை வைத்து...'' ரிலீஸாகும் ஜேசன் சஞ்சய் - சந்தீப் கிஷனின் 'சிக்மா' திரைப்படம்

தவெக தலைவர் விஜய்யின் மகன் ஜேசன் சஞ்சய் 'சிக்மா' படத்தின் மூலம் இயக்குநராக அறிமுகமாகிறார்.

சந்தீப் கிஷன் நடிக்கும் இப்படத்தில் டான்ஸ் மாஸ்டர் ராஜு சுந்தரம், சம்பத் ராஜ் உள்ளிட்ட பலர் நடித்திருக்கின்றனர். லைகா நிறுவனம் தயாரிக்கும் இப்படத்திற்குத் தமன் இசையமைத்திருக்கிறார்.

இப்படத்தின் படப்பிடிப்பு சில மாதங்களுக்கு முன்பே முடிவடைந்திருந்தது. படத்தின் இறுதிக்கட்ட பணிகள் நடந்து வரும் நிலையில், தற்போது படத்தின் ரிலீஸ் தேதியை அறிவித்திருக்கிறார்கள். ஜூலை 31-ஆம் தேதி இத்திரைப்படம் வெளியாகவிருக்கிறது.

ரிலீஸ் குறித்து ஜேசன் சஞ்சய், “‘சிக்மா’ எனக்கு மிகவும் சிறப்பான மற்றும் மறக்க முடியாத பயணமாக இருந்தது.

எனது கதையில் நம்பிக்கை வைத்துத் தொடர்ந்து ஆதரவு அளித்த லைகா புரொடக்ஷன்ஸ் நிறுவனத்தின் தயாரிப்பாளர் சுபாஸ்கரனுக்கு மனமார்ந்த நன்றி.

அர்ப்பணிப்புடன் செயல்பட்ட நடிகர்கள் மற்றும் தொழில்நுட்பக் குழுவினருடன் பணியாற்றியது மிகுந்த மகிழ்ச்சி.

ஜூலை 31-ஆம் தேதி ‘சிக்மா’வை ரசிகர்களிடம் கொண்டு செல்ல ஆவலுடன் காத்திருக்கிறோம். விரைவில் படம் குறித்தான மேலும் பல சுவாரசியமான அப்டேட்ஸ் பகிர இருக்கிறோம்" எனத் தெரிவித்திருக்கிறார்.

இத்திரைப்படம் பற்றி லைகா நிறுவனத்தின் தலைவர் தமிழ்குமரன், "'சிக்மா’ திரைப்படத்தின் வெளியீட்டு தேதி ஜூலை 31 என அதிகாரப்பூர்வமாக அறிவிப்பதில் மிகுந்த மகிழ்ச்சி அடைகிறோம்.

படம் மிகவும் சிறப்பாக உருவாகியுள்ளது. ரசிகர்களுக்கு இந்தப் படம் நிச்சயம் மறக்க முடியாத அனுபவமாக இருக்கும் என்று நம்புகிறோம்.

இயக்குநராக அறிமுகமாகும் ஜேசன் சஞ்சய் மிகுந்த தெளிவுடனும் அர்ப்பணிப்புடனும் இந்தப் படத்தை அணுகியுள்ளார்." எனக் கூறியிருக்கிறார்.