கோஹினூர் வைரம் இந்தியா திரும்புமா? பிரிட்டிஷ் மன்னரிடம் நியூயார்க் மேயர் வைத்த அதிரடி கோரிக்கை!

சுமார் 177 ஆண்டுகளுக்கு முன்பு இந்திய மண்ணிலிருந்து பிரிட்டிஷ் சாம்ராஜ்யத்தால் கொண்டு செல்லப்பட்ட கோஹினூர், மீண்டும் தாயகம் திரும்ப வேண்டுமென்ற குரல் இப்போது அமெரிக்க மண்ணிலிருந்து பலமாக ஒலித்துள்ளது.  

பிரிட்டிஷ் மகுடத்தின் உச்சியில் மின்னும் வைரத்தை விட, அந்த வைரத்தின் பின்னால் ஒளிந்திருக்கும் இந்தியாவின் நீண்டகால ஏக்கமும், போராட்டமும் இப்போது சர்வதேச அரசியலின் பேசுபொருளாக மாறியுள்ளது.

பிரிட்டிஷ் மன்னர் மூன்றாம் சார்லஸின் அமெரிக்கப் பயணத்தின் போது, இந்திய வம்சாவளியைச் சேர்ந்த நியூயார்க் நகர மேயர் ஜோஹ்ரான் மம்தானி விடுத்த கோரிக்கை சர்வதேச அளவில் பெரும் விவாதத்தைக் கிளப்பியுள்ளது.

நீண்டகாலமாகத் தொடரும் இந்த வரலாற்றுச் சிக்கலை, உலக நாடுகளின் சுதந்திரக் கொண்டாட்ட மேடையிலேயே மம்தானி துணிச்சலாக முன்வைத்துள்ளார். இந்த விவாதம் வெறும் ஒரு வைரத்தைப் பற்றியது மட்டுமல்ல, இது காலனித்துவ ஆட்சிக் காலத்தில் இந்தியா இழந்த கௌரவத்தையும் செல்வத்தையும் மீட்டெடுக்கும் முயற்சியாகும்.

கடந்த 1849-ஆம் ஆண்டு, 10 வயது சிறுவனான மகாராஜா துலீப் சிங்கிடமிருந்து பிரிட்டிஷ் ஈஸ்ட் இந்தியா கம்பெனியால் இந்த வைரம் ஒரு ஒப்பந்தத்தின் மூலம் லாகூரில் வைத்துப் பெற்றுக் கொள்ளப்பட்டது.  அதனால்தான், மன்னரைச் சந்திக்கும்போது "எங்கள் நாட்டின் அடையாளத்தை எங்களிடமே திருப்பித் தாருங்கள்" என்று கேட்கப்போவதாக அவர் உறுதியாகத் தெரிவித்தார்.

பிரிட்டிஷ் அரசு இந்த வைரத்தை ஒரு சட்டப்பூர்வமான பரிசாகவே இன்றும் கருதுவதால், இந்தியா பலமுறை கேட்டும் அதனைத் திருப்பித் தர மறுத்து வருகிறது. தற்போது லண்டன் கோபுரத்தின் பலத்த பாதுகாப்பிற்குள் இருக்கும் இந்த வைரம், பிரிட்டிஷ் பேரரசின் கடந்த கால ஆதிக்கத்தின் அடையாளமாகத் திகழ்கிறது. இந்தியா மட்டுமன்றி பாகிஸ்தான் மற்றும் ஆப்கானிஸ்தான் போன்ற நாடுகளும் இந்த வைரத்திற்கு உரிமை கோரி வரும் நிலையில், மம்தானியின் இந்தக் குரல், இந்த வைரத்தைச் சுற்றியுள்ள உலகளாவிய அரசியலை மீண்டும் ஒருமுறை விவாதப் பொருளாக்கியுள்ளது.

மம்தானியின் இந்தத் துணிச்சலான செயல், காலனித்துவ காலத்தில் எடுத்துச் செல்லப்பட்ட கலைப்பொருட்கள் அவற்றின் தாய்நாட்டிற்கே திரும்ப வேண்டும் என்ற நீதியின் குரலாகப் பார்க்கப்படுகிறது. கோஹினூர் வைரம் இந்தியாவுக்குத் திரும்புமா என்பது காலத்தின் கையில் இருந்தாலும், அதற்கான உரிமைக்குரல் இப்போது முன்பை விட மிகவும் அழுத்தமாக ஒலிக்கத் தொடங்கியுள்ளது.!