`டெஸ்ட் கிரிக்கெட்டே பிரதானம்!' நாட்டுக்காக விளையாட கம்மின்ஸுக்கு சுமார் 100 கோடியை கொட்டும் ஆஸி.,

சர்வதேச கிரிக்கெட் அரங்கில் டி20 லீக் போட்டிகளின் ஆதிக்கம் அதிகரித்து வரும் நிலையில், தங்கள் நாட்டு நட்சத்திர வீரர்களை தக்கவைத்துக் கொள்ள கிரிக்கெட் வாரியங்கள் புதிய உத்திகளை கையாண்டு வருகின்றன.

இதன் ஒரு பகுதியாக, ஆஸ்திரேலிய டெஸ்ட் மற்றும் ஒருநாள் கிரிக்கெட் அணியின் கேப்டன் பேட் கம்மின்ஸை தேசிய அணிக்காக தொடர்ந்து விளையாட வைக்கும் நோக்கில், அவருக்கு சுமார் 12 மில்லியன் அமெரிக்க டாலர் (இந்திய மதிப்பில் சுமார் ரூ.100 கோடி) மதிப்பிலான பிரம்மாண்ட நீண்ட கால ஒப்பந்தத்தை ஆஸ்திரேலிய கிரிக்கெட் வாரியம் (CA) வழங்கியுள்ளதாக தகவல் வெளியாகி உள்ளது.

சிட்னி மார்னிங் ஹெரால்டு பத்திரிகை வெளியிட்டுள்ள செய்தியின்படி, கம்மின்ஸுக்கு மூன்று ஆண்டுகள் நீடிக்கும் இந்த ஒப்பந்தத்தின் கீழ், ஆண்டுக்கு 4 மில்லியன் அமெரிக்க டாலர் ஊதியமாக வழங்கப்படும். இதில் முக்கியமாக, டெஸ்ட் கிரிக்கெட்டில் அவரது பங்களிப்பை உறுதி செய்வதே ஆஸ்திரேலிய வாரியத்தின் பிரதான நோக்கமாக உள்ளது. மேலும், இந்த ஒப்பந்தத்தின்படி, அவர் எத்தனை போட்டிகளில் விளையாடுகிறார் என்பதைப் பொறுத்து ஊதியம் நிர்ணயிக்கப்படாது என்றும், அவரது முழுமையான அர்ப்பணிப்பை பெறுவதே இலக்கு என்றும் கூறப்படுகிறது.

முன்னதாக, ஒரு ஐபிஎல் அணி, கம்மின்ஸ் ஆஸ்திரேலிய அணிக்காக விளையாடுவதை விட்டுவிட்டு, தங்களது உலகளாவிய டி20 லீக் அணிகளுக்காக விளையாட முன்வந்தால், அவருக்கு 10 மில்லியன் ஆஸ்திரேலிய டாலர் (சுமார் 6.6 மில்லியன் அமெரிக்க டாலர்) வரை வழங்க தயாராக இருப்பதாக செய்திகள் வெளியானது. இத்தகைய சூழலில்தான், தங்கள் கேப்டனை தக்கவைக்க ஆஸ்திரேலிய கிரிக்கெட் வாரியம் இந்த அதிரடி நடவடிக்கையை எடுத்துள்ளது.

இதுகுறித்து கிரிக்கெட் ஆஸ்திரேலியாவின் தலைவர் ஜேம்ஸ் ஆல்சாப் கூறுகையில், "நிச்சயமாக, ஆஸ்திரேலியாவின் சிறந்த வீரர்கள் நீண்ட கால பாதுகாப்பு மற்றும் சிறந்த ஊதியத்திற்கு தகுதியானவர்கள். அவர்கள் நீண்ட காலமாக அனைத்து வடிவங்களிலும் சிறப்பாக செயல்பட்டு அந்த உரிமையை சம்பாதித்துள்ளனர். பேட் கம்மின்ஸ், ஜோஷ் ஹேசில்வுட் போன்ற பல வடிவங்களில் விளையாடும் வீரர்களுக்கு சந்தையில் அதிக தேவை உள்ளது. எனவே, அவர்கள் ஆஸ்திரேலிய கிரிக்கெட்டில் தொடர்ந்து அர்ப்பணிப்புடன் இருப்பதை உறுதி செய்வது எங்கள் மிகப்பெரிய முன்னுரிமை," என்று குறிப்பிட்டார்.

பேட் கம்மின்ஸ் தற்போது ஐபிஎல் 2026 தொடரில் சன்ரைசர்ஸ் ஹைதராபாத் (SRH) அணியின் கேப்டனாக சிறப்பாக செயல்பட்டு வருகிறார். புதன்கிழமை பஞ்சாப் கிங்ஸ் (PBKS) அணிக்கு எதிராக நடைபெற்ற போட்டியில், ஹைதராபாத் அணி 33 ரன்கள் வித்தியாசத்தில் வெற்றி பெற்றது. இந்த போட்டியில் பந்துவீச்சில் சிறப்பாக செயல்பட்ட கம்மின்ஸ் ஆட்டநாயகன் விருதை வென்றார். போட்டிக்குப் பிறகு பேசிய அவர், "பஞ்சாப் ஒரு சிறந்த அணி. அவர்களுக்கு எதிராக எங்கள் பேட்ஸ்மேன்கள் நல்ல ஸ்கோரை எட்டியது அருமையாக இருந்தது. பந்துவீச்சிலும் நாங்கள் சிறப்பாக செயல்பட்டு வெற்றி பெற்றோம்" என்று தனது அணியின் செயல்பாட்டை பாராட்டினார்.