தவெக-வுடன் கூட்டணிக்கு தயாராகும் என்.ஆர்.காங்கிரஸ்? - ரங்கசாமியின் `கிரீன்’ சிக்னலால் தவிக்கும் பாஜக

`கோதாவரி கோட்டைக் கிழி...’

புதுச்சேரி 2021 சட்டப்பேரவைத் தேர்தலில் என்.ஆர்.காங்கிரஸ் கட்சியுடன் கூட்டணி அமைத்து வெற்றிபெற்ற பா.ஜ.க, முதல்வர் ரங்கசாமி தலைமையிலான அமைச்சரவையிலும் பங்கெடுத்தது.

அடுத்து வந்த 2024 நாடாளுமன்றத் தேர்தல் வரை பா.ஜ.க-வுடன் இணக்கமாக இருந்த முதல்வர் ரங்கசாமி, அதன்பிறகு `கோதாவரி கோட்டைக் கிழி… நீங்க நல்லா இருக்கீங்களா, நாங்களும் நல்லா இருக்கோம்…' என்ற ரீதியில் இடைவெளியை கடைப்பிடிக்க ஆரம்பித்தார்.

அதற்குக் காரணம் ஆளுநர் மூலம் `செக்' வைக்கும் பா.ஜ.க ஃபார்முலா. நாடாளுமன்றத் தேர்தல் முடிந்த உடனேயே முதல்வர் ரங்கசாமியிடம் சட்டமன்றத் தேர்தலுக்கான கூட்டணிப் பேச்சுவார்த்தையை தொடங்க முயற்சித்தது பா.ஜ.க. ஆனால் அதற்கு சிறிதும் பிடி கொடுக்காமல் பா.ஜ.க தரப்பை இழுத்தடித்து வந்தார் ரங்கசாமி.

எப்படியாவது கூட்டணியை இறுதி செய்துவிட வேண்டும் என்று கடந்த ஆண்டு இறுதியில் புதுச்சேரிக்கு படையெடுத்த மத்திய அமைச்சர்களை, `கோதாவரி' பாணியிலேயே டீல் செய்தார் முதல்வர் ரங்கசாமி.

அதன்பிறகு கடந்த பிப்ரவரி மாதம் காரைக்கால் வந்த மத்திய உள்துறை அமைச்சர் அமித்ஷாவை சந்தித்துவிட்டு வெளியே வந்த முதல்வர் ரங்கசாமி அங்கிருந்த செய்தியாளர்களிடம், `தேசிய ஜனநாயகக் கூட்டணியில் தொடர்கிறோம்' என்று கூறிவிட்டுச் சென்றார்.

அதையடுத்து புதுச்சேரியில் நடைபெற்ற  என்.டி.ஏ கூட்டணி ஆலோசனைக் கூட்டத்திற்குப் பிறகு செய்தியாளர்களைச் சந்தித்த பா.ஜ.க-வின் மேலிடப் பொறுப்பாளர் நிர்மல்குமார் சுரானா, `எங்கள் கூட்டணியில் முக்கியமான கட்சி என்.ஆர்.காங்கிரஸ்தான். அதேசமயம்,  இன்னும் சில கட்சிகளை ஒருங்கிணைத்து தேர்தலை சந்திக்க இருக்கிறோம்.

`ரங்கசாமிக்கு என்ன பிரச்னை ?’

அந்த வகையில் லட்சிய ஜனநாயகக் கட்சி எங்கள் கூட்டணிக்குள் வருகிறது. அவர்கள் கூட்டணிக்கு வருவதற்கு முதல்வர் ரங்கசாமி அதற்கு எதிர்ப்பு தெரிவிக்கவில்லை. இந்த தேர்தலில் என்.ஆர்.காங்கிரஸ் 16 தொகுதிகளிலும், கூட்டணி கட்சிகளுடன் பா.ஜ.க 14 தொகுதிகளிலும் போட்டியிடும்" என்று கூறியிருந்தார்.

ஆனால் பா.ஜ.க-வின் இந்தக் கருத்தை என்.ஆர்.காங்கிரஸ் உறுதிப்படுத்தவில்லை. குறிப்பாக, தேர்தலுக்கு முன்பே மாநில அந்தஸ்து குறித்த அறிவிப்பு இருக்க வேண்டும். அத்துடன் `லாட்டரி' ஜோஸ் சார்லஸ் மார்ட்டின் கூட்டணிக்குள் வருவதில் எனக்கு விருப்பமில்லை' என்று பா.ஜ.க தரப்பில் அழுத்தமாக தெரிவித்திருந்தார் முதல்வர் ரங்கசாமி. ஆனால், `எங்களுக்கான 14 தொகுதிகளில்தான் ல.ஜ.க-வுக்கு ஒதுக்கப் போகிறோம்.

அதில் உங்களுக்கு என்ன பிரச்னை?' என்ற ரீதியில் கேள்வி எழுப்பிய பா.ஜ.க, மாநில அந்தஸ்து குறித்த பேச்சை கவனமாக தவிர்த்தது. இந்த நிலையில்தான் நேற்று முன் தினம் இரவு ஏனாமில் இருந்து திரும்பிய முதல்வர் ரங்கசாமி, அமைச்சர் லட்சுமி நாராயணன், அரசு கொறடா ஏ.கே.டி ஆறுமுகம், என்.ஆர்.காங்கிரஸ் பொதுச் செயலாளர் என்.எஸ்.ஜே ஜெயபால் உள்ளிட்ட முக்கிய நிர்வாகிகளை அழைத்து ஆலோசனை செய்தார்.

அப்போது, `மாநில அந்தஸ்து பற்றி அவர்கள் எதையும் பேச மறுக்கிறார்கள். ல.ஜ.க கூட்டணிக்குள் வருவதற்கு நாம் எதிர்ப்பு தெரிவிக்கவில்லை என்று அவர்களாகவே கூறுகிறார்கள். இவர்கள் சொன்னதை நம்பி புதுச்சேரிக்கு மாநில அந்தஸ்து பெற்றுத் தருவோம் என்று கடந்த தேர்தலில் மக்களுக்கு வாக்குறுதி கொடுத்தோம்.

`என்.டி.ஏ கூட்டணியில் இருந்து ரங்கசாமி வெளியேறினால்...’

அடுத்த தேர்தலே வந்துவிட்டது. மக்களை நாம் எப்படி எதிர்கொள்வது ? அவர்களுக்கு `லாட்டரி' மார்ட்டின் குரூப் முக்கியம் என்றால் நாம் தனித்துப் போட்டியிடுவோம்' என்று புலம்பித் தீர்த்திருக்கிறார்.

அதையடுத்து இரவோடு இரவாக தனியார் விடுதியில் காத்திருந்த பா.ஜ.க-வினரை சந்தித்த என்.ஆர்.காங்கிரஸ் நிர்வாகிகள், முதல்வரின் கருத்தைக் கூறினார்கள்.

ஆனால், `லட்சிய ஜனநாயகக் கட்சி எங்கள் கூட்டணியில்தான் இருக்கும்' என்று ஆவேசமாகக் கூறியது பா.ஜ.க தரப்பு. அதனால் கூட்டணிப் பேச்சுவார்த்தை தோல்வியில் முடிந்தது. வேட்புமனு தாக்கல் செய்வதற்கு இன்னும் ஒருசில நாட்களே இருக்கும் நிலையில், கூட்டணிப் பேச்சுவார்த்தை முடியாததால் இரண்டு தரப்பும் ஏக டென்ஷனில் இருக்கின்றன.

இந்த நிலையில், `பா.ஜ.க-வுடனான கூட்டணியில் என்.ஆர்.காங்கிரஸ் கட்சியின் நிலைப்பாடு என்ன ? கூட்டணியில் தொடர்கிறீர்களா ?' என்ற கேள்வியுடன் என்.ஆர்.காங்கிரஸின் பொதுச் செயலாளர் என்.எஸ்.ஜே ஜெயபாலிடம் பேசினோம். அதற்கு, `தேசிய ஜனநாயகக் கூட்டணிக்குள் ல.ஜ.க வருவதை என்.ஆர்.காங்கிரஸ் விரும்பவில்லை.

பா.ஜ.க அந்த விவகாரத்தில் உறுதியாக இருந்தால், எங்கள் தலைவருடன் ஆலோசனை செய்து அடுத்தக்கட்டம் குறித்து முடிவெடுப்போம்' என்றார். தொடர்ந்து, `த.வெ.க-வுடன் என்.ஆர்.காங்கிரஸ் கூட்டணி அமைக்குமா ?' என்று நாம் எழுப்பிய கேள்விக்கு, `அதற்கான வாய்ப்புகள் நிறைய இருக்கின்றன' என்று முடித்துக் கொண்டார். இதுகுறித்துப் பேச பா.ஜ.க மாநிலத் தலைவர் வி.பி.ராமலிங்கத்தை தொடர்பு கொண்டோம். ஆனால், `அவர் தொடர்பு எல்லைக்கு அப்பால் இருப்பதாக' கூறியது அவரது செல்போன்.

என்.ஆர்.காங்கிரஸுடனான மோதலால், `என்.டி.ஏ கூட்டணியில் இருந்து ரங்கசாமி வெளியேறினார் என்றால் நாங்கள் போட்டியிடவே மாட்டோம்' என்று பா.ஜ.கவின் முக்கிய நிர்வாகிகள் சிலரே வெளிப்படையாக கூறியிருக்கின்றனர். அதையடுத்து ரங்கசாமியை சமாதானப்படுத்த முயற்சி செய்து வருகிறது பா.ஜ.க தரப்பு.