'25 வருடத்திற்குப் பின் அபிராமியுடன் நடித்திருக்கிறேன், முதன்முதலில் அவரை சந்தித்தபோது.!'- அர்ஜுன்

சுபாஷ் கே ராஜ் இயக்கத்தில் அர்ஜூன், அபிராமி, ப்ரீத்தி முகுந்தன் நடிப்பில் வெளியாக இருக்கும் படம் `ப்ளாஸ்ட்'.

இப்படம் மே 28ஆம் தேதி வெளியாகவுள்ள நிலையில், இப்படத்தின் செய்தியாளர் சந்திப்பு நேற்று (மே.18) நடைபெற்றது.

இந்த நிகழ்ச்சியில் பேசிய அர்ஜூன், " ‘ப்ளாஸ்ட்’ நிஜமாகவே ப்ளாஸ்ட் ஆக இருக்கும்.

நான் எத்தனையோ ரோல் செய்திருந்தாலும் இந்த மாதிரி ஒரு ரோல் இப்போதுதான் முதன்முறையாக செய்கிறேன். என்னுடைய இயக்குநருக்கு முதல் நன்றியைச் சொல்லிக் கொள்கிறேன்.

25 வருடத்திற்குப் பின் அபிராமியுடன் இணைந்து நடித்திருக்கிறேன். முதன்முதலில் அவரைச் சந்தித்தபோது மலையாளத்தில் மட்டும்தான் பேசுவார்.

உடைந்த தமிழ்தான் அவருக்குப் பேச வரும். இப்போது தமிழில் அசத்துகிறார். இந்தப் படத்தில் கடினமாக உழைத்து நடித்திருக்கிறார்" என்று பேசிய அவர் முதல்வர் விஜய்க்கு வாழ்த்து தெரிவித்திருக்கிறார்.

"வரலாறு காணாத வெற்றியோடு, சாதனையாளர்கள் பட்டியலில் முன்வரிசையில் இருக்கும், எனது நண்பரான மாண்புமிகு தமிழக முதலமைச்சர் விஜய்க்கு எனது மனமார்ந்த வாழ்த்துகளை தெரிவித்துக் கொள்கிறேன்” என்று வாழ்த்தியிருக்கிறார்.