Byju's: அன்று BCCI ஸ்பான்சர்... இன்று சிங்கப்பூரில் சிறை! - பைஜூஸ் சாம்ராஜ்ஜியம் சரிந்தது எப்படி?

ஒரு சில வருடங்களுக்கு முன்னர் கூட, பைஜூஸ் (Byju's) நிறுவனத்தை யாராலும் அசைக்க முடியாது என்றுதான் எல்லோரும் நினைத்தார்கள். இந்திய கிரிக்கெட் அணியின் ஜெர்சியில் அதன் லோகோ கம்பீரமாக இடம்பெற்றிருந்தது. உலக முதலீட்டாளர்கள் வரிசையில் நின்று பணத்தைக் கொட்டினார்கள். தொழில்நுட்பம் கல்வியில் ஒரு புரட்சியை ஏற்படுத்தும் என்ற அதன் வாக்குறுதியை இந்தியப் பெற்றோர்கள் முழுமையாக நம்பினார்கள். 2022-ல் அதன் உச்சத்தில், நிறுவனத்தின் மதிப்பு 22 பில்லியன் டாலராக இருந்தது. அதன் நிறுவனர் பைஜூ ரவீந்திரன், இந்தியாவின் கொண்டாடப்பட்ட ஸ்டார்ட்அப் முகங்களில் ஒருவராக உயர்ந்தார்.

ஆனால் இன்றோ, அதே நிறுவனர் நீதிமன்ற உத்தரவுகளை மீறிய குற்றத்திற்காக சிங்கப்பூர் நீதிமன்றத்தால் ஆறு மாதங்கள் சிறைத்தண்டனை விதிக்கப்பட்டிருக்கிறார். இந்திய ஸ்டார்ட்அப் வரலாற்றின் மிகப்பெரிய பெருநிறுவன சரிவுகளில் இது ஒரு முக்கியமான அத்தியாயமாகப் பார்க்கப்படுகிறது.

கல்வி தொழில்நுட்பத் துறையில் ஒரு வெற்றிக் கதையாகத் தொடங்கியது, மெல்ல மெல்ல தாமதமான தணிக்கைகள், பெருகும் கடன்கள், கோபமடைந்த முதலீட்டாளர்கள், திவால் நடவடிக்கைகள், நிதி முறைகேடு குற்றச்சாட்டுகள், எல்லை தாண்டிய வழக்குகள் மற்றும் காணாமல் போன பணத்தைத் தேடும் உலகளாவிய வேட்டை என ஒரு சிக்கலான வலைக்குள் சிக்கிக்கொண்டது.

எப்படி இந்த சாம்ராஜ்ஜியம் சரிந்தது? விரிவாகப் பார்க்கலாம்.

ஏற்றம்: பெருந்தொற்று காலம் தந்த வளர்ச்சி, உலகளாவிய கனவுகள்

2011-ல் திங்க் & லேர்ன் பிரைவேட் லிமிடெட் (Think & Learn Pvt Ltd) என்ற பெயரில் தொடங்கப்பட்ட பைஜூஸ், இந்தியாவில் கல்வி மற்றும் போட்டித் தேர்வுகளுக்கு இருக்கும் முக்கியத்துவத்தைப் பயன்படுத்தி மிக வேகமாக வளர்ந்தது. அதன் நேரம் மிகச் சரியாக அமைந்தது என்றே சொல்ல வேண்டும்.

இந்தியாவில் ஸ்மார்ட்போன்கள் பரவி, ஆன்லைன் கற்றல் ஒரு முக்கியப் போக்காக மாறியபோது, பைஜூஸ் தன்னை கல்வியின் எதிர்காலமாக நிலைநிறுத்தியது. பிறகு வந்தது கோவிட்-19. பள்ளிகள் மூடப்பட்டன. மாணவர்கள் ஆன்லைனுக்கு மாறினார்கள். தேவை விண்ணைப் பிளந்தது. முதலீட்டாளர்கள் படையெடுத்தனர்.

பெரிய உலகளாவிய நிறுவனங்கள் பைஜூஸை ஆதரித்தன. அமெரிக்கா மற்றும் பிற சந்தைகளுக்கு ஆக்ரோஷமாக விரிவடைந்தது. ஆகாஷ் எஜுகேஷனல் சர்வீசஸ், கிரேட் லேர்னிங் மற்றும் எபிக் (Epic) உள்ளிட்ட நிறுவனங்களை மின்னல் வேகத்தில் வாங்கியது. இதற்காக மட்டும் கிட்டத்தட்ட 3 பில்லியன் டாலர்களைச் செலவழித்தது. பிரம்மாண்டமான விளம்பரங்கள், பிரபலங்களின் ஒப்புதல்கள், கிரிக்கெட் ஸ்பான்சர்ஷிப்கள் என நிறுவனம் எல்லா இடங்களிலும் நம்பிக்கையை வெளிப்படுத்தியது. ஆனால் இந்த வேகமான வளர்ச்சிக்கு அடியில், பிரச்சினைகள் அமைதியாக உருவாகிக்கொண்டிருந்தன.

கதையை மாற்றிய பில்லியன் டாலர் கடன்

நவம்பர் 2021-ல், பைஜூஸ் வெளிநாட்டு கடன் வழங்குநர்களிடமிருந்து 1.2 பில்லியன் டாலர் என்ற மிகப்பெரிய தொகையைக் கடனாகப் பெற்றது. அப்போது, இது இந்திய ஸ்டார்ட்அப்கள் உலக அரங்கில் தடம் பதித்ததற்கான ஒரு அடையாளமாகக் கொண்டாடப்பட்டது. ஆனால், அந்தக் கடன்தான் பின்னர் பைஜூஸின் சரிவுக்கு மையப்புள்ளியாக மாறும் என யாரும் எதிர்பார்க்கவில்லை.

இந்த நிதியானது வளர்ச்சிக்கும் விரிவாக்கத்திற்கும் பயன்படுத்தப்படும் என்று நிறுவனம் கூறியது. ஆனால், கடன் கொடுத்தவர்களுக்கு நிறுவனத்தின் நிர்வாகம் மற்றும் வெளிப்படைத்தன்மை குறித்து கவலைகள் வரத் தொடங்கின. பைஜூஸ் தனது தணிக்கை செய்யப்பட்ட நிதிநிலை அறிக்கைகளைத் தாக்கல் செய்வதில் தாமதம் செய்தபோது நிலைமை மோசமானது. வருவாயை அங்கீகரிக்கும் நடைமுறைகள் குறித்து கேள்விகள் எழுந்தன. தாமதமான தாக்கல் குறித்து பெருநிறுவன விவகாரங்கள் அமைச்சகம் விளக்கம் கேட்டதாகக் கூறப்படுகிறது.

இறுதியாக நிதியாண்டு 21-க்கான (FY21) நிதிநிலை அறிக்கை வெளிவந்தபோது, அது பல முதலீட்டாளர்களை அதிர்ச்சியில் ஆழ்த்தியது. நஷ்டம் சுமார் 4,588 கோடி ரூபாயாகப் பெருகியிருந்தது. நம்பிக்கை சரியத் தொடங்கியது. தணிக்கையாளர்கள் விலகியது, ஒரு நிறுவனத்திற்கு ஏற்படும் மிக மோசமான சிக்னல்களில் ஒன்றாகும்.

டிலாய்ட் (Deloitte) நிறுவனம், நிதிநிலை அறிக்கைகள் தாமதம் மற்றும் தகவல் தொடர்பு இல்லாததைக் காரணம் காட்டி தணிக்கையாளர் பதவியில் இருந்து விலகியது. பின்னர், BDO குளோபல் நிறுவனத்தின் இந்தியக் கிளையும் விலகியது. முதலீட்டாளர்களுக்கும் கடன் கொடுத்தவர்களுக்கும் இது ஒரு பெரிய அபாய சங்கு.

கடன் கொடுத்தவர்கள் குற்றச்சாட்டு

2022-ன் இறுதியிலும் 2023-ன் தொடக்கத்திலும், பைஜூஸ் மற்றும் கடன் கொடுத்தவர்களுக்கு இடையிலான உறவு முற்றிலுமாக முறிந்தது. கடன் நிபந்தனைகளை நிறுவனம் மீறியதாகக் கடன் கொடுத்தவர்கள் குற்றம் சாட்டினர். பின்னர் வந்த குற்றச்சாட்டுதான் இந்தச் சண்டையின் போக்கையே மாற்றியது.

கடனுடன் தொடர்புடைய சுமார் 533 மில்லியன் டாலர்கள் முறையான அறிவிப்பு இல்லாமல் வேறு இடத்திற்கு மாற்றப்பட்டதாகக் கடன் கொடுத்தவர்கள் கூறினர். சட்ட வழக்குகள் உடனடியாகப் பல நாடுகளுக்குப் பரவியது. அமெரிக்காவில் உள்ள டெலாவேர் மற்றும் நியூயார்க்கில் நீதிமன்றத்தில் வழக்குகள் வெடித்தன. கடன் கொடுத்தவர்கள் தங்களை ஆக்ரோஷமாக நடத்துவதாக பைஜூஸ் குற்றம் சாட்டியது. மறுபுறம், நிறுவனம் சொத்துக்களை மறைத்து, வெளிநாடுகளுக்கு நிதியை மாற்றுவதாகக் கடன் கொடுத்தவர்கள் குற்றம் சாட்டினர்.

பின்னர் மற்றொரு அதிர்ச்சி குற்றச்சாட்டு எழுந்தது. 500 மில்லியன் டாலருக்கும் அதிகமான தொகையை கடன் கொடுத்தவர்களிடமிருந்து மறைத்து மாற்றுவதற்காக இங்கிலாந்தைச் சேர்ந்த OCI லிமிடெட் என்ற லாஜிஸ்டிக்ஸ் நிறுவனம் பயன்படுத்தப்பட்டதாக நீதிமன்ற ஆவணங்கள் கூறின. இந்த பணம் பல நிறுவனங்கள் வழியாகப் பயணித்து, இறுதியாக பைஜூஸ் செயல்பாடுகளுடன் தொடர்புடைய சிங்கப்பூர் நிறுவனம் ஒன்றுக்குச் சென்றதாகக் கூறப்பட்டது.

Byju's |

சிங்கப்பூரில் புதிய களம்

அமெரிக்க நீதிமன்றங்களில் இந்த வழக்குகள் நடந்துகொண்டிருந்தபோதே, சிங்கப்பூர் மற்றொரு முக்கிய சட்டப் போராட்டக் களமாக மாறியது. கத்தார் முதலீட்டு ஆணையத்தின் ஒரு துணை நிறுவனம், பைஜூ ரவீந்திரனுடன் தொடர்புடைய நிறுவனங்களின் சொத்து பரிமாற்றங்கள் தொடர்பான சட்ட நடவடிக்கையைத் தொடங்கியது.

இந்த வழக்கு, ஆகாஷ் எஜுகேஷனல் சர்வீசஸ் நிறுவனப் பங்குகளை வாங்குவது தொடர்பான நிதி ஏற்பாடுகளிலிருந்து உருவானதாகக் கூறப்படுகிறது. சிங்கப்பூர் நீதிமன்றங்கள் சொத்து விவரங்கள் மற்றும் உரிமை ஆவணங்கள் தொடர்பான உத்தரவுகளைப் பிறப்பித்தன. ஏப்ரல் 2024 முதல் பிறப்பிக்கப்பட்ட பல உத்தரவுகளுக்கு ரவீந்திரன் இணங்கத் தவறிவிட்டார் என்று நீதிமன்றம் கண்டறிந்ததாக ஊடகங்கள் செய்தி வெளியிட்டன. இதுவே தற்போது வந்துள்ள தீர்ப்புக்குக் காரணம்: நீதிமன்ற அவமதிப்புக்காக ஆறு மாதங்கள் சிறைத்தண்டனை.

இந்தியாவில் திவால்

உலகளாவிய சட்டப் போராட்டங்கள் தீவிரமடைந்த நிலையில், இந்தியாவிலும் பிரச்சினைகள் வெடித்தன. ஜூலை 2024-ல், தேசிய நிறுவன சட்ட தீர்ப்பாயத்தின் (NCLT) பெங்களூரு கிளை, திங்க் & லேர்ன் நிறுவனத்திற்கு எதிரான திவால் நடவடிக்கைகளை ஏற்றுக்கொண்டது. நிறுவனத்தின் உலகளாவிய கடன்களுடன் ஒப்பிடும்போது, இதற்குக் காரணமாக இருந்தது ஒரு சிறிய தொகை: இந்திய கிரிக்கெட் கட்டுப்பாட்டு வாரியத்திற்கு (BCCI) செலுத்த வேண்டிய சுமார் 158 கோடி ரூபாய் நிலுவைத் தொகை. ஒரு காலத்தில் பைஜூஸின் சந்தைப்படுத்தல் சக்தியின் அடையாளமாக இருந்த அதே கிரிக்கெட் ஸ்பான்சர்ஷிப் ஒப்பந்தம், அதன் திவால் நடவடிக்கைகளுக்கு ஒரு காரணமாக மாறியதுதான் மிகப்பெரிய முரண்.

மதிப்பு சரிவு மற்றும் எதிர்காலம்

நீதிமன்ற வழக்குகள் பெருகிய அதே நேரத்தில், நிறுவனத்தின் செயல்பாட்டுச் சிக்கல்களை மறைக்க முடியவில்லை. ஊழியர்கள் சம்பளம் தாமதமாவதாகப் புகார் கூறினர். பல அணிகளில் ஆட்குறைப்பு நடவடிக்கைகள் பரவின. பல போர்டு உறுப்பினர்கள் ராஜினாமா செய்தனர். ஒரு காலத்தில் 22 பில்லியன் டாலராக இருந்த பைஜூஸின் மதிப்பு மிகக் கடுமையாகச் சரிந்தது. சில முதலீட்டாளர்கள் நிறுவனத்தின் மதிப்பை 1 பில்லியன் டாலருக்கும் குறைவாக மதிப்பிட்டதாகக் கூறப்படுகிறது. ஃபோர்ப்ஸ் பத்திரிகை இறுதியில் பைஜூ ரவீந்திரனின் நிகர மதிப்பை பூஜ்ஜியமாகக் குறைத்தது.

பைஜூஸின் வீழ்ச்சி இப்போது ஒரு ஸ்டார்ட்அப்பின் தோல்வியாக மட்டும் பார்க்கப்படவில்லை. இது இந்திய ஸ்டார்ட்அப் சூழலில் உள்ள ஆக்ரோஷமான விரிவாக்கம், கடன் சார்ந்த வளர்ச்சி மற்றும் பலவீனமான நிர்வாகம் பற்றிய ஒரு எச்சரிக்கை கதையாக மாறியுள்ளது. ஒரு காலத்தில் உலகக் கல்வியை மறுவரையறை செய்வதாக உறுதியளித்த நிறுவனம், இன்று பல நாடுகளில், பல நீதிமன்றங்களில் போராடி வருகிறது. இந்திய ஸ்டார்ட்அப் புரட்சியின் முகமாக ஒரு காலத்தில் கொண்டாடப்பட்ட அதன் நிறுவனர், இப்போது சிங்கப்பூரில் சிறைத்தண்டனையையும், அமெரிக்காவில் வழக்குகளையும், இந்தியாவில் திவால் நடவடிக்கைகளையும் எதிர்கொள்கிறார். இந்தக் கதை இன்னும் முடிவடையவில்லை என்பது தான் சோகம்.