Doctor Vikatan: நிமோனியா காய்ச்சல்.... ஒருவரிடமிருந்து மற்றவருக்குப் பரவுமா?

Doctor Vikatan: வீட்டில் ஒருவருக்கு நிமோனியா (Pneumonia) காய்ச்சல்  வந்தால் அது குடும்பத்தில் உள்ள மற்றவர்களுக்கும் பரவுமா...  பரவாமலிருக்க என்ன செய்ய வேண்டும்?

பதில் சொல்கிறார், சென்னையைச் சேர்ந்த, நுரையீரல் சிகிச்சை சிறப்பு மருத்துவர் வந்தனா.

வீட்டில் ஒருவருக்கு நிமோனியா காய்ச்சல் வந்தால், அந்தக் குடும்பத்தில் உள்ள மற்றவர்களுக்கும் அது நிச்சயம் பரவும். இந்தக் காய்ச்சலை ஏற்படுத்தக்கூடிய இந்தப் பாக்டீரியாவும் சரி, வைரஸ்களும் எளிதில் பரவக்கூடியவை (highly contagious).

பாதிக்கப்பட்ட நபர் இருமும்போதோ அல்லது தும்மும்போதோ, அவர்களுடைய சுவாசத் துளிகள் (respiratory droplets) காற்றில் பரவுகின்றன. அதன் மூலம் அந்தக் கிருமிகளும் காற்றில் பரவுகின்றன. அதனால், அது எளிதாக மற்ற குடும்ப உறுப்பினர்களுக்கும், அருகில் உள்ளோருக்கும் பரவக்கூடும். 

அதுமட்டுமல்லாமல், பாதிக்கப்பட்டவர்கள் பயன்படுத்தும் கப்புகள் (cups), பாத்திரங்கள் (utensils) அல்லது அவர்கள் பயன்படுத்தும் டிஷ்யூ (tissues) மூலமாகவும் இந்தத் தொற்றுகள் (infections) பரவுவதற்கு வாய்ப்பு உள்ளது.

நிமோனியா காய்ச்சல் என்றில்லை, எந்த வகையான வைரஸ் தொற்றோ (viral infection), பாக்டீரியா தொற்றோ வந்திருப்பவர்கள் தும்மும்போதும் இருமும்போதும் அவர்களுடைய மூக்கையும் வாயையும் மூடிக் கொள்ள வேண்டியது ரொம்ப ரொம்ப முக்கியம். 

கைகுட்டை (handkerchief) பயன்படுத்துவதும் அல்லது குறைந்தது கையை வைத்து மறைப்பதும், உடனே கையைக் கழுவுவதும்  முக்கியம். நோய்வாய்ப்பட்டிருக்கும் காலங்களில் சமூக இடைவெளியைக் கடைப்பிடிப்பது (social distancing) ரொம்பவே முக்கியம். 

அவர்களைத் தனிமைப்படுத்திக் கொள்வது, குறைந்தபட்சம் ஒரு வாரமாவது தனிமைப்படுத்திக் கொள்வதும் நல்லதுதான். அந்த நேரத்தில் அவர்கள் பயன்படுத்தும் பாத்திரங்கள், தட்டுகள், உடைகள் போன்றவற்றையுமே தனியே வைத்திருப்பதும் முறைப்படி சுத்தப்படுத்துவதும் மிக அவசியம்.

உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.