Jio Hotstar: 'த்ரிடம்', 'லிங்கம்' - இம்மாத ஜியோ ஹாட்ஸ்டார் லைன் அப்-கள் என்னென்ன?

ஜூன் மாத ரிலீஸாக அடுத்தடுத்து ஜியோ ஹாட்ஸ்டார் தளத்தில் படங்களும், சீரிஸ்களும் வரவிருக்கின்றன. ஷேன் நிகமின் 'த்ரிடம்', யோகி பாபுவின் 'கெணத்த காணோம்', கதிரின் 'லிங்கம்' வெப் சீரிஸ் என இம்மாதத்திற்கான ஹாட்ஸ்டார் லைன் அப்-களை இங்கு பார்ப்போம்.

த்ரிடம் (Dridam):

ஷேன் நிகம் முதன்மை கதாபாத்திரத்தில் நடித்திருக்கும் இப்படத்தில் தினேஷ் பிரபாகர், கிருஷ்ணா பிரபா, மேத்யூ வர்கீஸ், சானியா பாத்திமா உள்ளிட்டோர் முக்கியக் கதாபாத்திரங்களில் நடித்துள்ளனர்.

இப்படம், மே 8-ம் தேதி திரையரங்குகளில் வெளியானது. ஜியோ ஹாட்ஸ்டார் ஓடிடி தளத்தில் இப்படம் ஜூன் 12-ம் தேதி வெளியாகிறது.

கெணத்தைக் காணோம் (Kenatha Kaanom):

யோகி பாபு நடித்திருந்த இப்படம் மார்ச் 13-ம் தேதி திரையரங்குகளில் வெளியானது. லவ்லின் சந்திரசேகர், ரேச்சல் ரெபெக்கா, ஜார்ஜ் மரியான் உள்ளிட்ட பலர் இந்தப் படத்தில் நடித்துள்ளனர். ஜியோ ஹாட்ஸ்டார் தளத்தில் இப்படம், வருகிற ஜூன் 15-ம் தேதி வெளியாகிறது.

சேவ் தி டைகர்ஸ் சீசன் 3 (Save The Tigers Season 3)

'சேவ் தி டைகர்ஸ்' வெப் சீரிஸின் முதல் இரண்டு சீசன்களுக்குக் கிடைத்த வரவேற்பைத் தொடர்ந்து மூன்றாவது சீசன் ஜூன் 19-ம் தேதி ஜியோ ஹாட்ஸ்டார் தளத்தில் வெளியாகிறது. பிரியதர்ஷி புலிகொண்டா, அபினவ் கோமடம், கிருஷ்ணா சைதன்யா, ஜோர்டார் சுஜாதா, பவானி கங்கிரெட்டி, தேவயானி சர்மா, வெண்ணிலா கிஷோர் ஆகியோர் மூன்றாவது சீசனில் நடித்திருக்கிறார்கள்.

துக்ரா கே மேரா பியார் சீசன் 2 (Thukra Ke Mera Pyaar Season 2):

'துக்ரா கே மேரா பியார்' சீரிஸின் இரண்டாவது சீசனில் சஞ்சிதா பாஷு மற்றும் தவல் தாக்கூர் முதன்மை பாத்திரங்களில் நடிக்க, அனிருத் தவே, பாலக் ஜெயின் மற்றும் புனீத் சிங் ஆகியோர் முக்கியக் கதாபாத்திரங்களில் நடித்துள்ளனர்.

இந்த சீரிஸ் ஜூன் 19-ம் தேதி ஜியோ ஹாட்ஸ்டார் தளத்தில் வெளியாகிறது.

லிங்கம் (Lingam):

கதிர், திவ்யா பாரதி, பூர்ணிமா ரவி, சத்யா மற்றும் போஸ் வெங்கட் ஆகியோர் முக்கியக் கதாபாத்திரங்களில் நடித்திருக்கும் இந்த சீரிஸை எழுத்தாளர் லக்‌ஷ்மி சரவணக்குமார் இயக்கியிருக்கிறார். இந்த சீரிஸ் ஜூன் 26-ம் தேதி வெளியாகிறது.