'முகங்களுக்கு முகவரி கொடுத்த இமயம்' - பாரதிராஜா அறிமுகப்படுத்திய நடிகர்கள், நடிகைகள் யார் யார்?

இயக்குநர் இமயம் பாரதிராஜா இன்று (ஜூன்.10) காலமானார். இவரின் மறைவிற்கு திரையுலக பிரபலங்கள் பலரும் இரங்கல் தெரிவித்து வருகின்றனர்.

1977-ம் ஆண்டு ரஜினி, கமல், ஸ்ரீதேவி இணைந்து நடித்த '16 வயதினிலேயே' படத்தின் வழியாக தமிழ் சினிமாவிற்கு இயக்குநராக அறிமுகமான பாரதிராஜா, கேமராவுக்குப் பின்னால் மட்டுமல்ல, கேமராவுக்கு முன்னால் நிற்கும் பல முகங்களுக்கு முகவரி கொடுத்தவர்.

தமிழ் சினிமா வரலாற்றில் அதிக அளவில் புதுமுகங்களை அறிமுகப்படுத்தி, அவர்களை உச்ச நட்சத்திரங்களாக மாற்றிய பெருமை பாரதிராஜாவுக்கு உண்டு. அந்தவகையில் அவர் அறிமுகப்படுத்திய நடிகர்கள், நடிகைகள் யார் யார் என்று பார்ப்போம்.

பாரதிராஜா அறிமுகப்படுத்திய நடிகைகள் யார் யார்?

ராதிகா சரத்குமார்: 'கிழக்கே போகும் ரயில்' (1978) படத்தின் மூலம் பாஞ்சாலியாக அறிமுகமானார். இன்று வரை தமிழ் சினிமாவின் தவிர்க்க முடியாத ஆளுமையாக இருக்கிறார்.

ராதா: 'அலைகள் ஓய்வதில்லை' (1981) திரைப்படத்தின் மூலம் அறிமுகமாகி, 80-களின் முன்னணி கதாநாயகியாக வலம் வந்தார்.

ரேவதி: 'மண் வாசனை' (1983) திரைப்படத்தில் முத்தழகாக அறிமுகமாகி, பின்னாளில் தேசிய விருது பெறும் அளவிற்கு அசாத்திய திறமையால் உயர்ந்தார்.

ரேகா: 'கடலோரக் கவிதைகள்' (1986) படத்தில் ஜெனிபர் டீச்சராக அறிமுகமாகி ரசிகர்களின் மனதைக் கொள்ளையடித்தார்.

ரஞ்சிதா: 'நாடோடித் தென்றல்' (1992) திரைப்படத்தின் மூலம் கதாநாயகியாக அறிமுகப்படுத்தப்பட்டார்.

பிரியாமணி: 'கண்களால் கைது செய்' (2004) படத்தின் மூலம் பாரதிராஜாவால் அறிமுகம் செய்யப்பட்டு, பின்னாளில் தேசிய விருது பெற்ற சிறந்த நடிகையாக உயர்ந்தார்.

பாரதிராஜா அறிமுகப்படுத்திய நடிகர்கள் யார் யார்?

கார்த்திக்: நடிகர் முத்துராமனின் மகனான இவரை 'அலைகள் ஓய்வதில்லை' (1981) படத்தின் மூலம் அறிமுகம் செய்து, தமிழ் சினிமாவிற்கு ஒரு 'நவரச நாயகனை' தந்தார்.

பாண்டியன்: 'மண் வாசனை' (1983) படத்தின் மூலம் கதாநாயகனாக திரையுலகில் காலடி எடுத்து வைத்தார்.

நெப்போலியன்: 'புது நெல்லு புது நாத்து' (1991) படத்தில் இவரை அறிமுகப்படுத்தினார்.

மனோஜ் பாரதிராஜா: தனது மகன் மனோஜை 'தாஜ்மஹால்' (1999) திரைப்படத்தின் மூலம் கதாநாயகனாக அறிமுகம் செய்தார்.

சுதாகர்: 'கிழக்கே போகும் ரயில்' படத்தில் ராதிகாவுக்கு ஜோடியாக அறிமுகமானார்.

தவிர குணச்சித்திர நடிகர்களாக ஜனகராஜ், வடிவுக்கரசி, நிழல்கள் ரவி, சந்திரசேகர் போன்ற பல திறமையான நடிகர்களைத் தனது படங்கள் மூலம் அடையாளப்படுத்தியவர் பாரதிராஜா என்பது குறிப்பிடத்தக்கது.!