MESSI : அசாத்திய ஹாட்ரிக்; அசத்திய மெஸ்ஸி! - உலகக் கோப்பையில் இமாலய சாதனை படைத்த சாதனை!

நீண்ட கால எதிர்பார்ப்புக்குப் பிறகு FIFA உலகக் கோப்பை கால்பந்து 2026 தொடர் விறுவிறுப்பாகத் தொடங்கியுள்ள நிலையில், இன்று அமெரிக்காவின் கேன்சாஸ் சிட்டி மைதானத்தில் நடந்த குரூப் 'ஜே' (Group J) போட்டியில் அர்ஜென்டினா மற்றும் அல்ஜீரியா அணிகள் மோதின.

ஒட்டுமொத்த கால்பந்து ரசிகர்களின் கண்கள் மைதானத்தின் மீது இருந்த வேளையில், அர்ஜென்டினா அணியின் கேப்டனும் உலகப் புகழ்பெற்ற ஜாம்பவானுமான லியோனல் மெஸ்ஸி அசாத்தியமான ஆட்டத்தை வெளிப்படுத்தி ஹாட்ரிக் கோல் அடித்து சாதனை படைத்துள்ளார். அவரது இந்த அசுரத்தனமான ஆட்டத்தின் மூலம் அர்ஜென்டினா அணி அல்ஜீரியாவை வீழ்த்தி (3-0) அபார வெற்றி பெற்றுள்ளது.

போட்டி தொடங்கிய முதல் நிமிடத்திலிருந்தே அர்ஜென்டினா அணி ஆட்டத்தை முழுமையாகத் தன் கட்டுப்பாட்டில் வைத்திருந்தது. போட்டியின் முதல் பாதியிலேயே எதிரணியின் தடுப்பு அரணை மிக அழகாக உடைத்த மெஸ்ஸி, தனது முதல் கோலை அடித்து அர்ஜென்டினா அணிக்கு முன்னிலை தேடித்தந்தார். அல்ஜீரிய வீரர்களால் மெஸ்ஸியின் வேகத்திற்கு ஈடுகொடுக்கவே முடியவில்லை.

தொடர்ந்து நடந்த இரண்டாம் பாதியிலும் மெஸ்ஸியின் ஆதிக்கம் குறையவே இல்லை. சக வீரர்கள் கடத்தித் தந்த பந்துகளை மிக நேர்த்தியாக கோல் கம்பத்திற்குள் அனுப்பி, அடுத்தடுத்து இரண்டு கோல்களை அடித்து தனது ஹாட்ரிக் சாதனையைப் பதிவு செய்தார்.

இந்த ஹாட்ரிக் கோல் உலகக் கோப்பை கால்பந்து வரலாற்றின் பல முக்கிய உலக சாதனைகளை ஒரே நாளில் ஒட்டுமொத்தமாக மாற்றி எழுதியுள்ளது. உலகக்கோப்பை தொடர்களில் மெஸ்ஸியின் ஒட்டுமொத்த கோல்களின் எண்ணிக்கை 16 ஆக உயர்ந்தது, இதன் மூலம் உலகக் கோப்பை வரலாற்றில் அதிக கோல்கள் அடித்த ஜெர்மனியின் மிரோஸ்லாவ் குளோசின் வரலாற்றுச் சாதனையை அவர் சமன் செய்துள்ளார்.

மேலும், 2006 முதல் தற்போது 2026 வரை மொத்தம் 6 வெவ்வேறு உலகக் கோப்பை தொடர்களில் விளையாடிய உலகின் முதல் மற்றும் ஒரே கால்பந்து வீரர் என்ற அசாத்திய சரித்திர சாதனையை மெஸ்ஸி படைத்துள்ளார். அத்துடன் சர்வதேச கால்பந்து வரலாற்றில் தனது நாட்டின் சார்பாக 200 போட்டிகளில் விளையாடிய 3-வது வீரர் என்ற சாதனையையும் தனது கணக்கில் சேர்த்துள்ளார்.

இந்த அசாத்திய வெற்றியின் மூலம் அர்ஜென்டினா அணி புள்ளிப் பட்டியலில் தனது ஆதிக்கத்தைத் தொடங்கியுள்ளது. போட்டி முடிந்த பிறகு பேசிய மெஸ்ஸி, `உலகக் கோப்பைத் தொடரை ஒரு வெற்றித் துடிப்புடன் தொடங்குவது எப்போதும் முக்கியம்' என்றும், `இந்த வெற்றி ஒட்டுமொத்த அணியின் கூட்டு உழைப்பிற்கு கிடைத்த பரிசு' என்றும் பெருமிதத்துடன் கூறினார். மெஸ்ஸியின் இந்த அதிரடியான ஃபார்ம், இந்த முறையும் அர்ஜென்டினா கோப்பையை வெல்லும் என்ற பலத்த நம்பிக்கையை அதன் ரசிகர்களிடையே ஏற்படுத்தியுள்ளது.