ஜனநாயகன் படத்தை சட்டவிரோதமாக ஒளிபரப்பிய உள்ளூர் தொலைக்காட்சி – உரிமையாளர் கைது, அலுவலகத்திற்கு சீல்!

நடிகர் விஜய் நடித்த ஜனநாயகன் திரைப்படம் மத்திய தணிக்கை சான்று பெறாமல் நிலுவையில் இருந்து வரும் நிலையில், சட்ட விரோதமாக ஆன்லைனில் கசிந்த விவகாரம் அதிர்ச்சியை ஏற்படுத்தியுள்ளது. இந்த நிலையில் கோவை மாவட்டம் கருமத்தம்பட்டி பகுதியில் ராசி பிரைம் மூவி என்ற உள்ளூர் சேனலில் நேற்று முன்தினம் ஜனநாயகன் திரைப்படம் சட்டத்திற்கு புறம்பாக வெளியிடப்பட்டுள்ளது. இது குறித்து த.வெ.க. கோவை புறநகர் கிழக்கு மாவட்ட துணைச் செயலாளர் மோகனப்பிரியா கருமத்தம்பட்டி காவல் நிலையத்தில் புகார் அளித்தார்.

இதன் பேரில் வழக்குப்பதிவு செய்த காவல் துறையினர், 2 தனிப்படைகள் அமைத்து விசாரணை நடத்தி வந்தனர்.விசாரணையில், மத்திய தணிக்கை குழுவின் சான்றுக்கு காத்திருக்கும் ஜனநாயகன் திரைப்படம் இணையத்தில் சட்டவிரோதமாக பகிரப்பட்ட லிங்க் மூலம், ராசி பிரைம் மூவி என்ற உள்ளூர் சேனலில் வெளியிடப்பட்டிருப்பது உறுதி செய்யப்பட்டது. இதையடுத்து அப்பகுதியை சேர்ந்த பழனிச்சாமி (44) என்பவரை காவல் துறையினர் கைது செய்து நீதிமன்ற காவலில் சிறையில் அடைத்தனர்.

மேலும், படத்தை சட்டவிரோதமாக வெளியிட பயன்படுத்தப்பட்ட கம்ப்யூட்டர், 5 ஹார்ட் டிஸ்க்கள்  உள்ளிட்ட மின்னணு சாதனங்கள் பறிமுதல் செய்யப்பட்டதோடு, சேனலின் நிறுவன அலுவலகத்திற்கும் சீல் வைக்கப்பட்டது. இதுபோல இணையத்தின் மூலம் திரைப்படங்கள் மற்றும் பிற பதிப்புரிமை கொண்ட உள்ளடக்கங்களை சட்டத்திற்கு புறம்பாக பகிர்வு செய்யும் நபர்களுக்கு எதிராக கடுமையான சட்ட நடவடிக்கை எடுக்கப்படும் என கோவை மாவட்ட காவல் துறையினர் எச்சரிக்கை விடுத்துள்ளனர்.