இன்னும் 9 போட்டிகள்தான் இருக்கு; WTC இறுதிப் போட்டிக்கு இந்தியா முன்னேறுவதற்கான வழி என்ன?

உலக டெஸ்ட் சாம்பியன்ஷிப் தொடங்கப்பட்ட பிறகு முதல் இரண்டு எடிஷனில் (2019-21, 2021-23) இறுதிப் போட்டி வரை சென்ற இந்திய அணி.

கடந்த எடிஷனில் (2023-25) இறுதிப் போட்டிக்கு செல்ல சுலபமான வாய்ப்பிருந்தும் சொந்த மண்ணில் நியூசிலாந்திடம் 3 - 0 என தொடரை இழந்து அந்த வாய்ப்பைக் கடினமாக்கிக் கொண்ட இந்தியா, அதைத்தொடர்ந்து ஆஸ்திரேலியாவிடம் 3 - 1 எனப் பார்டர்-கவாஸ்கர் தொடரை இழந்ததால் இறுதிப்போட்டிக்கு முன்னேற முடியாமல் போனது.

இந்த நிலையில், தென்னாப்பிரிக்காவுடனான டெஸ்ட் தொடரில் 2 - 0 என இந்தியா ஒயிட் வாஷ் ஆனதால் உலக டெஸ்ட் சாம்பியன்ஷிப் இறுதிப் போட்டிக்கு முன்னேறுவதற்கான வாய்ப்பு சவாலானதாக மாறியிருக்கிறது.

நடப்பு எடிஷனில் (2025-27) இதுவரை இந்திய அணி 3 டெஸ்ட் தொடர்களில் ஆடியிருக்கிறது.

அதில், 9 டெஸ்ட் போட்டிகளில் (இங்கிலாந்து 5, வெஸ்ட் இண்டீஸ் 2, தென்னாப்பிரிக்கா 2) 4-ல் வெற்றியும், 4-ல் தோல்வியும், ஒன்றில் டிராவும் கண்டு புள்ளிப்பட்டியலில் 48.15 சதவிகித புள்ளிகளுடன் 5-வது இடத்துக்கு இறங்கியிருக்கிறது.

தென்னாப்பிரிக்காவுடனான தொடருக்கு முன்பாக புள்ளிப்பட்டியலில் 55.88 சதவிகித புள்ளிகளுடன் 3-வது இடத்தில் இருந்தது.

தற்போது 7 சதவிகித புள்ளிகள் குறைந்து 5-வது இடத்துக்கு இந்தியா இறங்கிவிட்டதால் இறுதிப் போட்டிக்கு செல்லும் வாய்ப்பு கடினமாகியிருக்கிறது.

நடப்பு எடிஷனில் இந்தியாவுக்கு இன்னும் 3 டெஸ்ட் தொடர்கள்தான் இருக்கிறது.

அடுத்தாண்டு ஆகஸ்ட்டில் இலங்கையில் 2 போட்டிகள் கொண்ட டெஸ்ட் தொடரிலும், அக்டோபரில் நியூசிலாந்தில் 2 போட்டிகள் கொண்ட டெஸ்ட் தொடரிலும், 2027 ஜனவரியில் சொந்த மண்ணில் ஆஸ்திரேலியாவுக்கெதிராக 5 போட்டிகள் கொண்ட டெஸ்ட் தொடரிலும் இந்தியா விளையாடவிருக்கிறது.

இந்த 9 டெஸ்ட் போட்டிகளில் குறைந்தபட்சம் 7 வெற்றி பெற்றால்தான் இந்தியாவால் இறுதிப் போட்டிக்கு முன்னேற முடியும். அதற்கும் மற்ற அணிகளின் முடிவுகள் அவசியம்.

9-க்கு 9-லும் வெற்றிபெற்றால் இறுதிப் போட்டிக்குச் செல்வது உறுதி. ஒருவேளை 2-க்கும் மேற்பட்ட டெஸ்ட் போட்டிகளில் தோல்வியடைந்தால் இறுதிப் போட்டி கனவை இந்தியா மூடிவைத்துவிடலாம்.

தற்போதைய நிலவரப்படி புள்ளிப்பட்டியலில் ஆஸ்திரேலியா 4 போட்டிகளில் 4 வெற்றியுடன் 100 சதவிகித புள்ளிகளுடன் முதலிடத்திலும், நடப்பு சாம்பியன் தென்னாப்பிரிக்கா 4 போட்டிகளில் 3-ல் வெற்றி, ஒன்றில் தோல்வியுடன் 75 சதவிகித புள்ளிகளுடன் இரண்டாவது இடத்திலும் இருக்கின்றன என்பது குறிப்பிடத்தக்கது.

இந்தியா இறுதிப்போட்டிக்கு செல்லுமா என்பது பற்றிய உங்களின் கருத்துக்களை கமெண்ட்டில் பதிவிடுங்கள்.