2022-23 நிதியாண்டில் அரசியல் கட்சிகளுக்கு ரூ. 200 கோடி நன்கொடை: திமுக உள்ளிட்ட 5 கட்சிகள் வசம் 91%

அரசியல் கட்சிகளுக்கு பல்வேறு தரப்பினரிடமிருந்து 2022-23 நிதியாண்டில் ரூ. 200 கோடிக்கும் மேல் நன்கொடை கிடைத்திருப்பது ஜனநாயக சீா்திருத்தத்துக்கான சங்கம் (ஏடிஆா்) ஆய்வறிக்கை மூலம் தெரியவந்துள்ளது.

இதில், பாரத ராஷ்டிர சமிதி, ஒய்.எஸ்.ஆா். காங்கிரஸ், தெலங்கு தேசம் கட்சி (டிடிபி), ,திமுக மற்றும் இந்திய கம்யூனிஸ்ட் (சிபிஐ) ஆகிய 5 கட்சிகளுக்கு மட்டும் 90.56 சதவீத நன்கொடை கிடைத்துள்ளது.

ரூ. 20,000-க்கும் மேல் நன்கொடை தருபவா்களின் விவரங்களை அரசியல் கட்சிகள் வெளியிடுவது அவசியம். அதன்படி, தோ்தல் ஆணையத்திடம் அரசியல் கட்சிகள் சமா்ப்பித்த 2022-23 நிதியாண்டுக்கான நன்கொடை விவரங்களின் அடிப்படையில் இந்த ஆய்வறிக்கையை ஏடிஆா் வெளியிட்டுள்ளது. அதில் கூறியிருப்பதாவது:

மொத்தம் 57 மாநில கட்சிகள் உள்ள நிலையில், தோ்தல் ஆணையம் நிா்ணயித்த கால வரையறைக்குள் 18 கட்சிகள் மட்டுமே நன்கொடை விவரங்களைச் சமா்ப்பித்துள்ளன. 17 கட்சிகள் நிா்ணயிக்கப்படட கால வரையறையைக் கடந்து 2 முதல் 164 நாள்கள் வரை தாமதமாக விவரங்களைச் சமா்ப்பித்துள்ளன. பிஜு ஜனதா தளம், ஜம்மு-காஷ்மீா் தேசிய மாநாட்டு கட்சி உள்பட 7 கட்சிகள் நன்கொடை பெறவில்லை என அறிவித்துள்ளன.

ரூ. 216.765 கோடி: 28 அரசியல் கட்சிகள் 2,119 நன்கொடைகள் மூலமாக ரூ. 216.765 கோடி நன்கொடையைப் பெற்றுள்ளன.

இதில் அதிகபட்சமாக சந்திரசேகர ராவின் பாரத ராஷ்டிர சமிதி கட்சிக்கு 47 நன்கொடைகள் மூலமாக ரூ. 154.03 கோடி கிடைத்துள்ளது. இதற்கு அடுத்து ஜெகன் மோகன் ரெட்டியின் ஒய்எஸ்ஆா் காங்கிரஸ் கட்சிக்கு ரூ. 16 கோடியும், ஆந்திரத்தில் ஆளும் சந்திரபாபு நாயுடுவின் தெலுங்கு தேசம் கட்சிக்கு ரூ. 11.92 கோடி கிடைத்துள்ளது. இதற்கு அடுத்த இடங்களில் திமுக, சிபிஐ கட்சிகள் உள்ளன. இதன்படி, மொத்த நன்கொடையில் இந்த 5 கட்சிகளுக்கு மட்டும் 90.56 சதவீத நன்கொடை கிடைத்துள்ளது.

பன்மடங்கு அதிகரிப்பு... சில கட்சிகளுக்கு முந்தைய ஆண்டைக் காட்டிலும் மிக அதிக நன்கொடை கிடைத்துள்ளது. குறிப்பாக ஜாா்க்கண்டில் ஆளும் ஹேமந்த் சோரனின் ஜாா்க்கண்ட் முக்தி மோா்ச்சா கட்சிக்கான நன்கொடை முந்தைய ஆண்டைக் காட்டிலும் 3,685 சதவீதம் உயா்ந்துள்ளது.

ஜனநாயக ஜனதா கட்சிக்கு 1,997 சதவீதமும், தெலுங்கு தேசம் கட்சிக்கு 1,795 சதவீதம் நன்கொடை உயா்ந்துள்ளது.

அதே நேரம், அகிலேஷ் யாதவின் சமாஜவாதி கட்சிக்கு கிடைத்த நன்கொடையானது முந்தைய ஆண்டைக் காட்டிலும் 99.1 சதீவதம் சரிந்துள்ளது. அதுபோல, சிரோமணி அகாலி தளம் கட்சிக்கு 89.1 சதவீதம் சரிந்துள்ளது.

விவரங்கள் மறைப்பு: சில அரசியல் கட்சிகள் முழுமையான விவரங்கள் இன்றி நன்கொடை விவரங்களை வெளியிட்டுள்ளன. 5 அரசியல் கட்சிகள் ரூ. 96.2 லட்சம் நன்கொடைக்கான விவரங்களை நன்கொடையாளா்களின் நிரந்தர கணக்கு எண் விவரம் இல்லாமல் வெளியிட்டுள்ளன.

ரூ. 3.36 கோடி நன்கொடைக்கு நன்கொடையாளரின் முகவரி விவரங்கள் இடம்பெறவில்லை. மொத்தத்தில் 204 நன்கொடைகள் மூலம் கிடைத்த ரூ. 165.73 கோடிக்கு நன்கொடையாளா்களின் முழுமையான விவரங்களை அரச்யில் கட்சிகள் சமா்ப்பிக்கவில்லை.

தில்லி முதலிடம்... கட்சிகளுக்கு அளிக்கப்பட்ட மொத்த நன்கொடையில் ரூ. 169.2 கோடி பெரு நிறுவனங்கள் சாா்பில் வழங்கப்பட்டுள்ளன. தனி நபா்கள் மூலம் ரூ. 45.24 கோடி அளிக்கப்பட்டுள்ளது.

பாரத ராஷ்டிர சமிதி கட்சிக்கு அதிகபட்சம் 40 பெரு நிறுவனங்கள் மூலம் மட்டும் ரூ. 138.97 கோடி நன்கொடை கிடைத்துள்ளது.

அதிக நன்கொடை பங்களிப்பை பொருத்தவரை தில்லி முதலிடம் வகிக்கிறது. தில்லியிலிருந்து ரூ. 107.09 கோடி கட்சிகளுக்கு அளிக்கப்பட்டுள்ளன. இதற்கு அடித்தபடியாக தெலங்கானாவிலிருந்து ரூ. 62.99 கோடியும், ஆந்திரத்திலிருந்து ரூ. 8.39 கோடியும் நன்கொடை அளிக்கப்பட்டுள்ளன.