H-1B விசா போர்: இந்தியத் திறமையையும் வழிபாட்டு முறையையும் குறிவைக்கிறதா அமெரிக்கா?

ஹைதராபாத்தின் ஒரு கிராமத்தில், 500 ஆண்டுகள் பழமையான ஒரு கோயிலைச் சுற்றி லட்சக்கணக்கான இளைஞர்கள் ஓடிக்கொண்டிருக்கிறார்கள்.அவர்கள் கால்களில் வேகம் இல்லை, ஆனால் கண்களில் ஒரு மாபெரும் 'அமெரிக்கக் கனவு' இருக்கிறது. "விசா கடவுள்" என்று உலகமே போற்றும் சில்கூர் பாலாஜியின் இந்த அமைதியான சன்னதிதான், இப்போது அமெரிக்காவின் அதிகார மையமான வாஷிங்டனை அதிரவைக்கும் ஒரு சர்ச்சைப் புயலாக மாறியிருக்கிறது.

அமெரிக்க செனட்டர் எரிக் ஷ்மிட் வீசிய ஒரு ஒற்றை 'ட்வீட்', இந்தியத் தொழில்நுட்ப உலகையே கொந்தளிக்கச் செய்திருக்கிறது. இந்தியர்கள் அமெரிக்க விசா வாங்குவதை ஏதோ ஒரு திறமையான போட்டி போலப் பார்க்காமல், அதை ஒரு திட்டமிட்ட "விசா மாஃபியா" (Visa Cartel) வேலை என்று அவர் வர்ணித்திருப்பதுதான் வேடிக்கையின் உச்சம்.

"மைக்ரோசாஃப்ட், கூகுள் போன்ற நிறுவனங்கள் அமெரிக்கர்களைத் துரத்திவிட்டு, இந்தியர்களுக்கு சிவப்புச் கம்பளம் விரிப்பது ஒரு மிகப்பெரிய சதி" என்று அவர் சீறியுள்ளார்.

2025-ஆம் ஆண்டிற்கான விசா ஒதுக்கீட்டில் 70 சதவீதத்திற்கும் அதிகமான இடங்களை இந்திய மென்பொறியாளர்கள் பெற்றுள்ளது அமெரிக்க அரசியல் வட்டாரத்தில் விவாதங்களை உருவாக்கியுள்ளது. இந்தியத் திறமையாளர்களின் இந்தச் சாதனையை ஒரு ஆரோக்கியமான போட்டியாகக் கருதாமல், சில்கூர் பாலாஜி கோயிலின் வழிபாட்டு முறைகளுடன் தொடர்புபடுத்திப் பேசுவது ஒரு மாறுபட்ட கருத்தாக்கத்தையே முன்வைக்கிறது.

எவ்வித உண்டியல் வசதியோ, ஆடம்பரமோ இன்றி மக்களின் நம்பிக்கையை மட்டுமே மையமாகக் கொண்டு இயங்கும் ஒரு பழமையான கோயிலின் பாரம்பரிய நடைமுறைகளை, மற்றொரு கோணத்தில் அணுகுவது இந்திய கலாச்சாரம் மற்றும் மரபுகள் குறித்த விவாதங்களை மீண்டும் ஒருமுறை உலக அரங்கில் கவனிக்க வைத்துள்ளது.

இந்தியர்களின் அறிவாற்றலையும் ஆன்மீகத்தையும் குறிவைத்து நடத்தப்படும் இந்தத் தாக்குதல் ஒரு எச்சரிக்கை மணி. "எங்கள் உழைப்பு மைக்ரோசாஃப்டிலும் இருக்கும், எங்கள் பிரார்த்தனை பாலாஜியிடமும் இருக்கும்" என்று இந்தியர்கள் பதிலடி கொடுத்து வருகின்றனர்.

விசா என்பது வெறும் காகிதம் அல்ல, அது ஒரு இந்தியனின் கனவு; அதை ஒரு செனட்டரின் குறுகிய அரசியல் கண்ணோட்டம் இழிவுபடுத்துவதை ஒருபோதும் ஏற்க முடியாது என்பதே ஒட்டுமொத்த இந்தியர்களின் குரலாக ஒலிக்கிறது.