Nagam App: வீட்டிற்குள் நுழையும் பாம்புகளைப் பிடிக்க தமிழக அரசின் செயலி; பயன்படுத்துவது எப்படி?
Admin
- 6 hours ago
தமிழ்நாடு மாநில வனவிலங்கு ஆணையம், பாம்புகளைப் பாதுகாப்பாக மீட்கவும், மக்களிடையே விழிப்புணர்வு ஏற்படுத்தவும் "நாகம்" என்ற பெயரில் புதிய மொபைல் செயலியை அறிமுகப்படுத்தியுள்ளது.
இந்தச் செயலி, மனிதர்களுக்குப் பாதிப்பு ஏற்படுத்தாமல் பாம்புகளை இயற்கையான வாழிடங்களுக்கு மாற்றுவதற்கு உதவுவதை முதன்மை நோக்கமாகக் கொண்டுள்ளது.
செயலியின் முக்கிய அம்சங்கள்
"நாகம்" செயலி, பயனர்களுக்கு எளிமையான மற்றும் பயனுள்ள அம்சங்களை வழங்குகிறது
பொதுமக்கள் தங்கள் பகுதியில் பாம்புகளைக் கண்டால், செயலி மூலம் உடனடியாக வனவிலங்கு அதிகாரிகளுக்குத் தகவல் அனுப்பலாம். இதற்கு பாம்பின் புகைப்படம், இருப்பிடம் மற்றும் கண்டறியப்பட்ட நேரம் ஆகியவற்றைப் பதிவு செய்ய வேண்டும்.
இந்தச் செயலியில் தமிழ்நாட்டில் காணப்படும் பல்வேறு பாம்பு இனங்கள் பற்றிய விவரங்கள், புகைப்படங்கள் மற்றும் அவற்றின் பண்புகள் பற்றிய தகவல்கள் உள்ளன. இது பயனர்களுக்கு பாம்பு விஷமுள்ளதா? இல்லையா? என்பதை அறிய உதவுகிறது.
பாம்புக் கடி ஏற்பட்டால், உடனடியாகச் செய்ய வேண்டிய முதலுதவி முறைகள் பற்றிய விரிவான வழிகாட்டுதல்களும் இந்தச் செயலியில் உள்ளன.
பயனரின் இருப்பிடத்திற்கு அருகிலுள்ள மருத்துவமனைகளின் பட்டியல் மற்றும் தொடர்பு எண்கள் இந்தச் செயலியில் கிடைக்கின்றன.
பாம்புகள் பதுங்கும் இடங்கள், அவற்றை எவ்வாறு தவிர்ப்பது, மற்றும் பாம்புகளைக் கொல்லாமல் பாதுகாப்பது குறித்த தகவல்கள் இந்தச் செயலியில் வழங்கப்பட்டுள்ளன.
பாம்புகள் இயற்கை சூழலில் முக்கிய பங்கு வகிக்கின்றன. ஆனால், பொதுமக்களிடையே பாம்புகள் குறித்த அச்சமும், தவறான புரிதல்களும் நிலவுகின்றன.
'நாகம்' செயலி மூலம், பாம்புகளைப் பாதுகாப்பாக மீட்பதோடு, மக்களுக்கு அவை குறித்துச் சரியான விழிப்புணர்வை ஏற்படுத்த முயல்வதாக வனவிலங்கு அதிகாரிகள் கூறியிருக்கின்றனர்.
பாம்புகளைக் கொல்வதற்குப் பதிலாக, அவற்றை இயற்கையான வாழிடங்களுக்கு மாற்றுவதற்கு இந்தச் செயலி உதவியாக இருக்கும் என்று நம்புகின்றனர்.
"நாகம்" செயலி ஆண்ட்ராய்டு மற்றும் ஐஓஎஸ் தளங்களில் இலவசமாகப் பதிவிறக்கம் செய்யக் கிடைக்கிறது. இது தமிழ், ஆங்கிலம் உள்ளிட்ட மொழிகளில் பயன்படுத்தப்படும் வகையில் வடிவமைக்கப்பட்டுள்ளது.
செயலியைப் பயன்படுத்த, பயனர்கள் தங்கள் மொபைல் எண்ணைப் பயன்படுத்திப் பதிவு செய்ய வேண்டும், பின்னர் அவர்களது இருப்பிடத்தை அடிப்படையாகக் கொண்டு தகவல்களைப் பெறலாம் எனத் தெரிவிக்கப்பட்டுள்ளது.
