'ஒன்னு நீ, இல்ல நான், நம்ம டீலிங் பக்காவா இருக்கணும்!'- திமுக, அதிமுக பற்றி விஜய் பேசிய வீடியோ வைரல்

நடந்து முடிந்த சட்டமன்றத் தேர்தலில் விஜய்யின் தமிழக வெற்றிக் கழகம் 108 இடங்களில் வென்றுள்ளது. விஜய் ஆட்சியமைக்க ஆளுநரிடம் உரிமை கோரியிருக்கிறார்.

ஆனால் அவர் தனிப்பெரும்பான்மையை நிரூபிக்க இன்னும் 6 பேரின் ஆதரவு தேவைப்படும் சூழல் உள்ளது.

இதனிடையே எதிரெதிர் துருவங்களான திமுக-வும் அதிமுக-வும் இணைந்து ஆட்சி அமைக்கக்கூடும் என்ற தகவல் அரசியல் வட்டாரத்தில் பெரும் பரபரப்பை ஏற்படுத்தி இருக்கிறது.

இந்நிலையில் திமுக - அதிமுக குறித்து விஜய் பிரசாரத்தில் பேசிய வீடியோ ஒன்று இணையத்தில் வைரலாகி வருகிறது.

அந்த வீடியோவில் பேசியிருக்கும் விஜய், " 'ஒன்னு நீ, இல்ல நான். நமக்குள்ள வேற யாரும் நடுவுல வந்திடக்கூடாது. நம்ம ரெண்டு பேரால மட்டும் தான் மக்களை ஈஸியா ஏமாத்த முடியும்.

இந்த விஜய் வந்தனால நமக்கு பொளப்பே போச்சு. மக்கள் விஜய்யை தான் நம்புறாங்க. நாம வெளியே அடிசுக்குற மாதிரி இருந்தாலும் உள்ள நம்ம டீலிங் பக்காவாக இருக்கணும்.

மக்களோட உணர்வுகளைப் பத்திலாம் கவலை இல்ல. மாத்தி மாத்தி ஆட்சிக்கு வந்தரலாம்'னு நினைக்கிறோம், அது நடக்காதுபோல இருக்கு.

அதனால SOP போட்டு நீ ஒரு பக்கம் தடுத்துரு. இன்னொரு பக்கம் அவன் மேல பழிப்போட்டு நானும் தடுத்து நிப்பாட்டிறேன். என்ன டீலிங் ஓகேவா' என்று இருகட்சிகளும் பேசிக்கொள்வது போல விஜய் பேசியிருக்கிறார்.

தற்போது திமுக அதிமுக இணைந்து ஆட்சி அமைப்பதாக வெளியாகும் தகவல்களை அடுத்து இந்த வீடியோ வைரலாகி வருகிறது.