திருச்சி: ரூ. 5 லட்சம் கடன் தருவதாக கூறி ஆன்லைன் மோசடி!- ரூ. 8 லட்சத்தை இழந்த பெண்

திருச்சியை சேர்ந்த 40 வயது மதிக்கத்தக்க பெண்ணை கடந்த ஜூலை மாதம் 29 -ம் தேதி அடையாளம் தெரியாத நபர் ஒருவர் செல்போனில் அவரை தொடர்பு கொண்டார். அதில் பேசிய நபர் நான் தனியார் பைனான்ஸ் நிறுவனத்தைச் சேர்ந்தவன் என்றும், 5 லட்சம் ரூபாய் கடன் தருகிறோம் என்று கூறியுள்ளார். அவரது துண்டில் வார்த்தைகளை நம்பி, அவர் அதற்கான ஆவணங்களை அனுப்பி உள்ளார். அதன்பிறகு, மர்ம நபர்கள் கடன் தொகை பெறுவதற்கு பல்வேறு கட்டணங்களைக் செலுத்துமாறு கூறியுள்ளனர். இதன் காரணமாக அவர் பல்வேறு பரிவர்த்தனைகள் மூலம் அவர்கள் கூறிய வங்கி கணக்கிற்கு கணக்கில் ரூ. 8,31,367 வரை அந்த பெண் அனுப்பி உள்ளார்.

அதன்பிறகு, அவர்கள் மீண்டும் மீண்டும் பணம் கேட்டு உள்ளனர். இதனால் தான் ஏமாற்றப்பட்டதை உணர்ந்த அவர் ஆன்லைன் மூலம் திருச்சி சைபர் க்ரைம் போலீஸாரிடம் புகார் அளித்தார். அதன் பேரில் திருச்சி சைபர் கிரைம் போலீஸார் வழக்கு பதிவு செய்து, அந்த பெண்ணை ஏமாற்றிய நபர்கள் குறித்து விசாரணை மேற்கொண்டு வருகின்றனர். ரூ. 5 லட்சம் கடன் பெறுவதற்காக ரூ. 8 லட்சத்துக்கு மேல் ஆன்லைன் மூலம் பெண் ஒருவர் பணத்தை ஏமாந்துள்ளது பரபரப்பை ஏற்படுத்தியுள்ளது.