கொடநாடு வழக்கு: சாட்சியை மிரட்டியதாக தொடரப்பட்ட வழக்கு - இருவரை விடுவித்த நீதிமன்றம்; பின்னணி என்ன?

மறைந்த முன்னாள் முதல்வர் ஜெயலலிதா மற்றும் அவரின் தோழி சசிகலா ஆகியோருக்குச்‌ சொந்தமான கொடநாடு எஸ்டேட் பங்களாவில் கடந்த 2017 ம் ஆண்டு ஏப்ரல் மாதம் 23 ம் தேதி நள்ளிரவில் நடைபெற்ற கொலை, கொள்ளை தொடர்பாக ஊட்டியில் உள்ள நீலகிரி மாவட்ட நீதிமன்றத்தில் வழக்கு விசாரணை நடைபெற்று வருகிறது.

காவல்துறை தரப்பில் சி.பி.சி.ஐ.டி விசாரணை நடைபெற்று வருகிறது. இந்த வழக்கின் மிக முக்கிய சாட்சிகளில் ஒருவராக குற்றஞ்சாட்டப்பட்டவர்கள் ஊட்டியில் தங்கியதாக கூறப்படும் தனியார் காட்டேஜ் உரிமையாளர் சாந்தா என்பவரை பட்டியலில் இணைததனர்.

இந்த நிலையில், தங்களுக்கு எதிராக சாட்சி அளிக்கக்கூடாது என குற்றம்சாட்டப்பட்ட தரப்பினர்களான சயான் மற்றும் வாளையார் மனோஜ் ஆகியோர் தம்மை தொடர் கொண்டு மிரட்டியதாக 2020 - ம் ஆண்டு சாந்தா ஊட்டி பி1 காவல்நிலையத்தில் புகார் அளித்தார்.

இது தொடர்பான வழக்கு விசாரணை நீலகிரி மாவட்ட மகிளா நீதிமன்றத்தில் நடைபெற்று வந்தது. இந்த நிலையில், இந்த வழக்கில் இருந்து சயான் மற்றும் வாளையார் மனோஜ் ஆகிய இருவரையும் விடுவிப்பதாக மகிளா நீதிமன்றம் நேற்று தீர்ப்பளித்திருக்கிறது.

இது குறித்து பேசிய குற்றம்சாட்டப்பட்டவர்கள் தரப்பு வழக்குரைஞர்கள், "கொடநாடு வழக்கில் A1 , A2 - வாக சேர்க்கப்பட்டுள்ள சயான், வாளையார் மனோஜ் இருவரும் ஜாமீனில் வெளியே இருந்தால் முக்கிய மூளையாக செயல்பட்டவர்களுக்கு அச்சுறுத்தலாக இருக்கும் என்பதால்,

அப்போதிருந்த எடப்பாடி அரசு காவல்துறையை வைத்து பொய்யான இந்த மிரட்டல் வழக்கை ஜோடனை செய்தது. ஆனால், காவல்துறையால் அதற்கான சான்றுகளை நிரூபிக்க முடியவில்லை. உண்மைத்தன்மையை விசாரணை நடத்திய மகிளா நீதிபதி அவர்கள் இந்த வழக்கில் இருந்து இருவரையும் விடுதலை அளித்திருக்கிறார்" என்றனர்.