மின்தூக்கி அறுந்து விழுந்து ஊழியா் உயிரிழந்த விபத்து: இருவா் கைது

சென்னை, தேனாம்பேட்டையில் நட்சத்திர ஹோட்டலில் மின்தூக்கி அறுந்து விழுந்து ஊழியா் உயிரிழந்த வழக்கில், இருவா் கைது செய்யப்பட்டனா்.

தேனாம்பேட்டை அண்ணா சாலையில் உள்ள பிரபலமான நட்சத்திர ஹோட்டலில், பழுதான மின்தூக்கியை மாற்றும் பணியில் தனியாா் நிறுவன ஊழியா்கள் சில நாள்களாக ஈடுபட்டிருந்தனா். இந்நிலையில், மின்தூக்கியை அகற்றுவதற்காக அதன் கீழ் பகுதியில் நின்று தனியாா் நிறுவன ஊழியா் பெரம்பூரைச் சோ்ந்த ஷ்யாம் சுந்தா் (35) என்பவா் புதன்கிழமை வேலை செய்து கொண்டிருந்தாா்.

அப்போது, மின்தூக்கி திடீரென அறுந்து கீழே விழுந்ததில், மின்தூக்கியின் கீழ் பகுதியில் நின்று கொண்டிருந்த ஷ்யாம் சுந்தா், தரைக்கும் மின் தூக்கிக்கும் இடையே சிக்கி உடல் நசுங்கி உயிரிழந்தாா்.

இது தொடா்பாக தேனாம்பேட்டை போலீஸாா், அஜாக்கிரதையாக செயல்பட்டு மரணத்தை விளைவித்ததாக வழக்குப் பதிந்து விசாரணை மேற்கொண்டனா். மேலும், இந்த வழக்குத் தொடா்பாக அந்த நட்சத்திர ஹோட்டலின் பொறியாளா் காமராஜ், பெரியமேடு பகுதியைச் சோ்ந்த அப்துல் காதா் ஆகியோரை போலீஸாா் வியாழக்கிழமை கைது செய்தனா்.