RCB: "ஹாட்ரிக் கப் அடிக்கிறதுக்கு ஐடியா பண்ணப் போறோம்!" - உற்சாகத்தில் ரஜத் பட்டிதார்

ஐ.பி.எல் இறுதிப்போட்டியில் குஜராத் அணியை வீழ்த்தி பெங்களூரு அணி சாம்பியன் ஆகியிருக்கிறது. தொடர்ந்து இரண்டாவது முறையாக கோப்பையை வென்றிருக்கும் பெங்களூரு அணியின் கேப்டன் ரஜத் பட்டிதார் பத்திரிகையாளர் சந்திப்பில் மகிழ்ச்சி பொங்கப் பேசியிருக்கிறார்.

ரஜத் பட்டிதார் பேசியதாவது, ''நான்கைந்து சீசன்களில் ஆடிவிட்டேன். ஆண்டி ப்ளவரை ஆகச்சிறந்த பயிற்சியாளர்களில் ஒருவர் என்றே மதிப்பிடுவேன். போட்டிகளில் ஆடும் வீரர்களை மட்டும் அல்ல, ஆடாமல் வெளியில் இருக்கும் புதிய வீரர்களைக் கூட அவர் நன்றாகக் கவனித்துக் கொள்வார். அவர்களோடும் அதிக நேரத்தைச் செலவிடுவார்.

கடந்த ஆண்டு எங்கள் மீது நிறைய அழுத்தம் இருந்தது. இந்தச் சீசனில் அப்படியில்லை. இந்தச் சீசன் முழுக்க நாங்கள் ஆதிக்கம் செலுத்தினோம். அணி நிர்வாகமும் வீரர்களும் என்னை முழுமையாக நம்பினார்கள். அதற்கான வெற்றி இது.

இரண்டு முறை கோப்பையை வென்றுவிட்டோம். இப்போது கொண்டாட்டத்தில் இருக்கிறோம். ஆனால், சீக்கிரமே மூன்றாவது கோப்பையை வெல்வதை நோக்கி வேலை செய்ய ஆரம்பித்து விடுவோம்.

நான் கடந்த காலத்தையும் எதிர்காலத்தையும் பற்றி அதிகம் யோசிப்பதில்லை. நிகழ்காலத்தில் அணிக்காக என்ன செய்ய முடியும் என்றே நினைக்கிறேன். வெற்றி, தோல்விகளைப் பற்றி எனக்கு கவலை இல்லை. என்னுடைய 100% திறனை ஆட்டத்தில் வெளிப்படுத்த முடிகிறதா என்பதே முக்கியம்.

சமீபமாக ஆர்.சி.பி அணியின் கலாசாரம் மாறியிருக்கிறது. வீரர்களின் மனநிலை மாறியிருக்கிறது. பயிற்சியாளர் குழுவுக்குதான் முழு க்ரெடிட்டையும் கொடுக்க வேண்டும். அவர்கள் எல்லா வீரர்களையும் ஒரே மாதிரியாக மதிக்கிறார்கள்.

விராட் கோலியைப் பற்றி வர்ணிக்க வார்த்தைகளே இல்லை. அவர் ஒவ்வொரு முறையும் அசாத்தியங்களை நிகழ்த்திக் கொண்டிருக்கிறார். அவரிடமிருந்து கிரிக்கெட் மற்றும் கிரிக்கெட்டைத் தாண்டி நிறைய கற்றுக்கொள்கிறோம். வலைப்பயிற்சியின்போது கூட ஒரு போட்டியில் ஆடுவதைப் போலத்தான் கோலி ஆடுவார். அந்த ஆற்றல்தான் எனக்கான இன்ஸ்பிரேஷன்.

கடந்த சீசனின் வெற்றிக்குப் பிறகு எங்களின் ரசிகர்கள் சிலரை இழந்தோம். ரசிகர்கள்கூட அல்ல, அவர்கள் எங்களின் குடும்பத்தினர். இந்தக் கோப்பையை எங்களின் ரசிகர்களுக்குச் சமர்பிக்கிறேன்'' என்றார்.