ஏலம், பரிசு, சம்பளம், ஆட்ட நாயகன்... IPL 2026-ல் வைபவ் சூரியவன்ஷி சம்பாதித்தது எவ்வளவு தெரியுமா?

ஐபிஎல் 2026 தொடர், ராயல் சேலஞ்சர்ஸ் பெங்களூரு அணியின் கோப்பைக் கனவை இரண்டாவது முறையாக நிறைவேற்றியிருந்தாலும், இந்தத் தொடரின் உண்மையான நாயகனாக ஜொலித்தது ராஜஸ்தான் ராயல்ஸ் அணியின் 15 வயது இளம் புயல் வைபவ் சூர்யவன்ஷிதான்.

கடந்த சீசனுக்கு முந்தைய மெகா ஏலத்தில் வெறும் ரூ. 1.10 கோடிக்கு வாங்கப்பட்ட இந்த இளம் வீரர், இந்த ஒரே சீசனில் தனது அபாரமான ஆட்டத்தின் மூலம் கோடிக்கணக்கில் சம்பாதித்து அனைவரையும் ஆச்சரியத்தில் ஆழ்த்தியுள்ளார்.

ராஜஸ்தான் ராயல்ஸ் அணிக்கு மிகக் குறைந்த விலையில் கிடைத்த ஒரு பொக்கிஷமாக வைபவ் சூர்யவன்ஷி நிரூபித்துள்ளார். இந்த சீசனில் அவருடைய சம்பளம் (retainer) ரூ. 1.10 கோடியாக இருந்தாலும், அவருடைய உண்மையான வருமானம் அதைவிடப் பன்மடங்கு அதிகம்.

தொடர் முழுவதும் சீரான ஆட்டத்தை வெளிப்படுத்திய அவர், மொத்தம் 776 ரன்கள் குவித்து ஆரஞ்சு தொப்பியைத் தட்டிச் சென்றார். மைதானத்தில் பந்துகளை நாலாபுறமும் சிதறடித்த இவரது ஆட்டம், ராஜஸ்தான் அணிக்கு பெரும் பலமாக அமைந்தது. இருப்பினும், இவரது தனிப்பட்ட சாதனை அணிக்குக் கோப்பையைப் பெற்றுத் தரவில்லை; ராஜஸ்தான் ராயல்ஸ் இறுதிப்போட்டிக்குத் தகுதிபெறத் தவறியது.

பரிசு மழையில் நனைந்த இளம் வீரர்!

அகமதாபாத்தில் உள்ள நரேந்திர மோடி ஸ்டேடியத்தில் நடைபெற்ற இறுதிப்போட்டிக்குப் பிறகு நடந்த பரிசளிப்பு விழாவில், வைபவ் சூர்யவன்ஷி மீது விருதுகளும், பரிசுமழையும் பொழிந்தன. ராயல் சேலஞ்சர்ஸ் பெங்களூரு அணி கோப்பையை வென்ற கொண்டாட்டங்களுக்கு மத்தியில், இந்த இளம் வீரர் பலரது கவனத்தை ஈர்த்தார். அவர் வென்ற முக்கிய விருதுகளும், பரிசுத்தொகைகளும் இதோ:

தொடரின் மிகவும் மதிப்புமிக்க வீரர் (MVP): ரூ. 15 லட்சம்

ஆரஞ்சு கேப் (அதிக ரன்கள்): ரூ. 10 லட்சம்

சீசனின் சூப்பர் ஸ்ட்ரைக்கர்: ரூ. 10 லட்சம் மற்றும் டாடா சியரா கார்

சீசனின் சூப்பர் சிக்ஸர்கள்: ரூ. 10 லட்சம் (72 சிக்ஸர்களுக்காக)

வளர்ந்து வரும் வீரர்: ரூ. 10 லட்சம்

வருமானக் கணக்கு இதுதான்!

அவருடைய ஆண்டு சம்பளமான ரூ. 1.10 கோடி மற்றும் விருதுகள் மூலம் கிடைத்த ரூ. 55 லட்சத்துடன் அவரது வருமானம் நின்றுவிடவில்லை. இந்த சீசனில் ராஜஸ்தான் அணிக்காக அவர் விளையாடிய 16 போட்டிகளுக்கும் தனித்தனியாக போட்டி ஊதியம் பெற்றுள்ளார்.

ஒரு போட்டிக்கு ரூ. 7.5 லட்சம் வீதம், போட்டி ஊதியமாக மட்டுமே அவர் ரூ. 1.20 கோடி ஈட்டியுள்ளார். இது தவிர, தொடரின்போது பலமுறை ஆட்டநாயகன் விருது, எலக்ட்ரிக் ஸ்ட்ரைக்கர், அதிக சிக்ஸர்கள் அடித்த வீரர் போன்ற விருதுகளையும் வென்றார். இந்த ஒவ்வொரு விருதுக்கும் தலா ரூ. 1 லட்சம் பரிசுத்தொகை கிடைத்தது. அனைத்தையும் சேர்த்தால், ஐபிஎல் 2026 சீசனில் மட்டும் வைபவ் சூர்யவன்ஷியின் மொத்த வருமானம் ரூ. 2.50 கோடியைத் தாண்டியுள்ளது. இது தவிர ரசிகர்களின் மனங்களையும் வென்றிருக்கிறார் இந்த சுட்டி குழந்தை. ஆனால் அது மதிப்பிட முடியாதது. !