`ஆடின்னே இருப்போம்' - கடைசி வரை போராடிய தென்னாப்பிரிக்கா; சதத்துடன் மாஸ் காட்டிய கோலி - ஹைலைட்ஸ்

இந்தியா vs தென்னாப்பிரிக்கா ஒருநாள் போட்டி இன்று பிற்பகல் ராஞ்சியில் தொடங்கியது.

டாஸ் வென்ற தென்னாப்பிரிக்கா கேப்டன் எய்டன் மார்க்ரம் பவுலிங்கைத் தேர்வு செய்தார்.

அதன்படி முதலில் களமிறங்கிய இந்திய அணியில் ஜெய்ஸ்வால் 18 ரன்களில் ஏமாற்றம் தந்தாலும் அதன் பிறகு இணைந்த கோலி - ரோஹித் கூட்டணி, தென்னாப்பிரிக்கா பவுலிங்கை நாலாபுறமும் சிதறடித்தனர்.

இருவரும் அரைசதம் கடந்து ஆடிக்கொண்டிருந்த வேளையில் ரோஹித்தின் (47) விக்கெட்டின் மூலம் இக்கூட்டணியை உடைத்தார் மார்கோ யான்சென்.

நீண்ட நேரத்துக்குப் பிறகு கிடைத்த மொமன்ட்டமில் தென்னாப்பிரிக்கா பவுலர் ஓட்னீல் பார்ட்மேன், அடுத்தடுத்து களமிறங்கிய ருத்துராஜையும், வாஷிங்டன் சுந்தரையும் சொற்ப ரன்களில் அவுட்டாக்கி பெவிலியனுக்கு அனுப்பினார்.

ஆனாலும், அடுத்து களமிறங்கிய கேப்டன் கே.எல். ராகுல் கோலிக்கு ஒத்துழைக்க, நிதானமாக ஆடிக்கொண்டிருந்த கோலி ஒருநாள் கிரிக்கெட்டில் தனது 52-வது சதமடித்து 135 ரன்களில் அவுட்டானார்.

அவரைத்தொடர்ந்து ஜடேஜாவுடன் பார்ட்னர்ஷிப் போட்ட கே.எல். ராகுலும் அரைசதமடித்து 60 ரன்களில் அவுட்டானார். இறுதியாக 50 ஓவர்கள் முடிவில் இந்திய அணி 8 விக்கெட் இழப்புகளுக்கு 349 ரன்கள் குவித்தது.

பின்னர் 350 ரன்கள் என்ற கடினமான டார்கெட் நோக்கி இறங்கிய தென்னாப்பிரிக்கா அணிக்கு ஆரம்பத்திலேயே அதிர்ச்சி காத்திருந்தது.

ஆட்டத்தின் இரண்டாவது ஓவராக ஹர்ஷித் ராணா தான் வீசிய முதல் ஓவரிலேயே ரிக்கில்டன், டி காக் ஆகியோரை டக் அவுட் ஆக்கினார்.

அவர்களைத் தொடர்ந்து கேப்டன் மார்க்ரமும் 7 ரன்களில் அவுட்டாக 11 ரன்களுக்கு 3 விக்கெட்டுகளை இழந்து பரிதாப நிலைக்குச் சென்றது தென்னாப்பிரிக்கா.

இந்த நேரத்தில்தான் தென்னாப்பிரிக்காவின் சேவியராக இறங்கினார் மேத்யூ ப்ரீட்ஸ்கே. டோனி டி சோர்ஸி, டெவால்ட் பிரெவிஸ், மார்கோ யான்சென் ஆகியோருடன் 50+ பார்ட்னர்ஷிப் போட்டார் மேத்யூ ப்ரீட்ஸ்கே.

தென்னாப்பிரிக்காவுக்கு எல்லாம் சரியாகச் சென்றுகொண்டிருந்த நேரத்தில் குல்தீப் யாதவ், அரைசதங்களுடன் கிரீஸில் இருந்த மார்கோ யான்சென், மேத்யூ ப்ரீட்ஸ்கேயை ஒரே ஓவரில் அவுட்டாக்கினார்.

தென்னாப்பிரிக்கா 34 ஓவர்களில் 228 ரன்களுக்கு 7 விக்கெட்டுகளை இழக்க ஆட்டத்தில் இந்தியாவின் கை மீண்டும் ஓங்கியது.

இப்படியான சூழலில் டெய்ல் எண்டர்ஸை ஈஸியாக காலி செய்துவிட்டு ஆட்டத்தை சீக்கிரம் முடிக்கலாம் என்றிருந்த இந்திய பவுலர்களுக்கு தொல்லை கொடுக்க ஆரம்பித்தார் கார்பின் போஷ்.

பிரெனலன் சுப்ராயன், நந்த்ரே பர்கருடன் 40+ ரன்கள் பார்ட்னர்ஷிப் போட்டு அரைசதமும் அடித்தார்.

இறுதியாக கடைசி ஓவரில் தென்னாப்பிரிக்காவின் வெற்றிக்கு 18 ரன்கள் தேவை என்ற சூழல் உருவானது. ஆனால், தென்னாப்பிரிக்காவின் கைவசம் ஒரு விக்கெட் தான் இருந்தது.

67 ரன்களுடன் கிரீஸில் அச்சுறுத்திக் கொண்டிருந்த கார்பின் போஷ், அர்ஷ்தீப் சிங் பந்தை சிக்ஸ் அடிக்க முயன்றார். ஆனால், பந்தோ ரோஹித்தின் கைகளில் தஞ்சமடைய 17 ரன்கள் வித்தியாசத்தில் இந்தியா வென்றது.

சதமடித்த விராட் கோலிக்கு ஆட்ட நாயகன் விருது வழங்கப்பட்டது. இன்றைய போட்டி குறித்த உங்கள் கருத்தைக் கமென்ட்டில் பதிவிடுங்கள்