அனிருத்தின் `DC' இசை சாதனை: உலக அளவில் டாப் 10 பட்டியலில் இடம்பிடித்த தமிழ்ப் பாடல்!

தமிழ் சினிமாவின் முன்னணி இசையமைப்பாளராகத் திகழ்கிறார், ‘ராக்ஸ்டார்’ அனிருத். தனது துள்ளலான இசையாலும், புதுமையான இசைக்கோப்புகளாலும் தொடர்ந்து உலக அளவில் கவனத்தை ஈர்த்துவருகிறார். அந்த வரிசையில், சமீபத்தில் அருண் மாதேஸ்வரன் இயக்கத்தில் உருவாகிவரும் ‘டிசி’ (DC) திரைப்படத்திலிருந்து வெளியான ‘ராகா ஆஃப் ரிவெஞ்ச்’ (Raga of Revenge) என்ற இசைத் துணுக்கு, சர்வதேச இசைத் தளங்களில் பெரும் அதிர்வலைகளை ஏற்படுத்தியுள்ளது.

இந்த இசைத் துணுக்கு வெளியான சில நாள்களிலேயே, உலகப்புகழ் பெற்ற இசையமைப்பாளர்கள் மற்றும் பாடல்களுக்கு இணையாக, ‘ஸ்பாட்டிஃபை’ (Spotify) தளத்தின் உலகளாவிய டாப் 10 பாடல்கள் பட்டியலில் 6-வது இடத்தைப் பிடித்து சாதனை படைத்துள்ளது. மே 22 முதல் மே 24 வரையிலான காலக்கட்டத்தில், உலகின் பல்வேறு நாடுகளைச் சேர்ந்த இசைப்பிரியர்கள் இந்தத் துணுக்கைக் கேட்டு மகிழ்ந்துள்ளனர்.

ஒரு மாநில மொழித் திரைப்படத்தின் பின்னணி இசை அல்லது பாடல், உலக அளவிலான டாப் 10 பட்டியலில் இடம்பெறுவது என்பது அவ்வளவு எளிதான காரியமல்ல. இந்தியப் பிராந்திய மொழித் திரைப்படம் ஒன்று, சர்வதேச அளவில் இத்தகைய பிரமாண்டமான வரவேற்பைப் பெற்றிருப்பது, தமிழ் திரையிசை உலகிற்கே பெருமை சேர்க்கும் விஷயமாகப் பார்க்கப்படுகிறது.

இந்த அபாரமான வெற்றி குறித்து தனது சமூக வலைதளப் பக்கத்தில் மகிழ்ச்சியைப் பகிர்ந்துள்ள அனிருத், "ஓர் இந்தியப் பிராந்திய மொழிப் பாடலை இவ்வளவு பெரிய உயரத்திற்கு எடுத்துச் சென்றது நீங்கள்தான். நமது வேர்களிலிருந்து உலக மேடை வரை இந்த வெற்றி உங்கள் அனைவருக்கும் சொந்தமானது" என்று தனது ரசிகர்களுக்கு உருக்கமாக நன்றி தெரிவித்துள்ளார்.

இயக்குநர் லோகேஷ் கனகராஜ் கதாநாயகனாக அறிமுகமாகும் இந்தப் படம், ரசிகர்களிடையே பெரும் எதிர்பார்ப்பை ஏற்படுத்தியுள்ளது. அனிருத்தின் இந்த உலகளாவிய வெற்றி, எதிர்காலத்தில் தமிழ் சினிமா இசையை இன்னும் பல உயரங்களுக்குக் கொண்டு செல்லும். தமிழ் இசையின் வீச்சு, எல்லைகளைக் கடந்து உலக அரங்கில் ஒலிக்கத் தொடங்கியிருப்பதற்கு ‘டிசி’ படத்தின் இந்த வெற்றி ஒரு மிகச்சிறந்த சான்றாகும்.