இண்டிகோ விமானத்துக்குள் பறந்த புறா; விரட்டி பிடித்த பணிப்பெண்கள் - வைரல் வீடியோவின் பின்னணி என்ன?

மத்திய அரசு கொண்டு வந்துள்ள புதிய விதிமுறைகளால் இண்டிகோ விமான சேவை ஏற்கனவே நாடு முழுவதும் கடந்த ஒரு வாரமாக பாதிக்கப்பட்டுள்ளது.

இதனால் பயணிகள் முன்பதிவு செய்திருந்த ரூ.600 கோடிக்கும் அதிகமான பணத்தை இண்டிகோ நிறுவனம் திரும்ப கொடுத்திருக்கிறது.

இந்நிலையில் பெங்களூரு விமான நிலையத்தில் இருந்து வதோதராவிற்கு புறப்பட இண்டிகோ விமானம் ஒன்று தயாராகிக்கொண்டிருந்தது. பயணிகள் வந்து இருக்கையில் அமர்ந்து கொண்டிருந்தனர். அந்நேரம் திடீரென புறா ஒன்று விமானத்திற்குள் நுழைந்துவிட்டது.

அந்த புறா உள்ளே நுழைந்தவுடன் எப்படி வெளியில் செல்வது என்று தெரியாமல் அங்கும் இங்கும் பறந்து கொண்டிருந்தது.

புறாவை பிடிக்க விமான பணிப்பெண்களும், ஊழியர்களும் ஓடினர். அனைவருக்கும் புறா தண்ணி காட்டி ஓடிக்கொண்டிருந்தது.

விமான பணிப்பெண்களோடு சேர்ந்து சில பயணிகளும் புறாவை பிடிக்க முயன்றனர். விமான ஊழியர்கள் புறாவை ஓடி ஓடி பிடிக்க முயற்சி செய்ததை பயணிகள் தங்களது மொபைல் போனில் வீடியோ எடுத்தனர்.

எப்படியோ போராடி புறாவை வெளியில் விரட்டினர். அந்த வீடியோவை ஒருவர் தனது இன்ஸ்டாகிராம் பக்கத்தில் பகிர்ந்துள்ளார். அந்த வீடியோ வைரலாகி இருக்கிறது.

அதனை பார்த்த நெட்டிசன்கள் பலரும் ஜோக்காக தங்களது கருத்துக்களை பகிர்ந்துள்ளனர். ஒருவர் தனது பதிவில், புறா 900 கிலோமீட்டர் வேகத்தில் பறக்க முடிவு செய்துவிட்டதாக குறிப்பிட்டு இருந்தார்.

இண்டிகோ ஏர்லைன்ஸ் கடந்த ஒரு வாரத்தில் ஆயிரக்கணக்கான விமான சேவைகளை ரத்து செய்து இருக்கிறது. நேற்று 650 சேவைகளை ரத்து செய்திருந்தது.

பைலட்களுக்கு மத்திய அரசு கொண்டு வந்த புதிய விதிகளை சரியாக கணிக்க தவறிவிட்டதாக இண்டிகோ விமான நிர்வாகம் ஒப்புக்கொண்டுள்ளது.

புதிய விதிகளுக்கு தக்கபடி விமானங்களை இயக்க சரியாக திட்டமிடாதது குறித்து இண்டிகோ நிறுவனத்திற்கு மத்திய அரசு விளக்கம் கேட்டு நோட்டீஸ் அனுப்பி இருக்கிறது.

அதோடு இண்டிகோ விமான சேவை பாதித்து இருப்பதால் விமான கட்டணம் வெகுவாக அதிகரித்து இருக்கிறது. இதனால் விமான கட்டணத்திற்கு மத்திய அரசு புதிய கட்டுப்பாடு விதித்து இருக்கிறது. வரும் 10-ம் தேதிக்குள் விமான சேவை சரியாகிவிடும் என்று இண்டிகோ ஏர்லைன்ஸ் உறுதியளித்து இருக்கிறது.