T20 WC: ஆஸ்திரேலியா ஆல் அவுட்; சம்பவம் செய்த ஜிம்பாப்வே! - கொழும்புவில் என்ன நடந்தது?

கொழும்புவில் நடந்த போட்டியில் ஆஸ்திரேலிய அணியை வீழ்த்தி அதிர்ச்சியளித்திருக்கிறது ஜிம்பாப்வே அணி.

டாஸை ஆஸ்திரேலிய அணியே வென்றிருந்தது. முதலில் பந்துவீசப்போவதாக அறிவித்தது. கொழும்பு மைதானம் கொஞ்சம் மெதுவான மைதானம். சராசரி ஸ்கோரே 150-160 க்குள்ளாகத்தான் இருக்கும். இதை புரிந்து வைத்துக் கொண்டு ஜிம்பாப்வே அணி கால்குலேட்டிவாக ஆடியிருந்தது.

பென்னட்டும் மருமணியும் ஓப்பனர்கள்.

160 மார்க்கை எட்டினால் போதும் என்கிற மனநிலையில் நிதானமாக ஆடினர். பவர்ப்ளேக்குள் ஆஸ்திரேலிய அணி வார்சூயிஸ், மேக்ஸ்வெல், நேதன் எல்லீஸ் என 5 பௌலர்களை பயன்படுத்தியது. ஆனாலும் விக்கெட் கிடைக்கவில்லை. முதல் விக்கெட்டுக்கு இந்த கூட்டணி 61 ரன்களை சேர்த்தது. மருமணி அவுட் ஆனவுடன் ரியான் பர்ல் உள்ளே வந்தார். அடுத்ததாக ராசா. எல்லாருமே நிலைமையையும் சூழலையும் உணர்ந்து சௌகரியமாக ஒரு டார்க்கெட்டை எட்ட வேண்டும் என்கிற மனநிலையுடனேயே ஆடினர். விளைவு, ஜிம்பாப்வே அணி 20 ஓவர்களில் 2 விக்கெட்டுகளை மட்டுமே இழந்து 169 ரன்களை எட்டியது. பென்னட் அரைசதத்தை அடித்திருந்தார்.

ஆஸ்திரேலியாவுக்கு டார்கெட் 170. பவர்ப்ளே முடிவதற்குள்ளாகவே 4 விக்கெட்டுகளை இழந்து அதிர்ச்சி கொடுத்தது ஆஸ்திரேலியா. முசரபாணியும் எவன்ஸூம் விக்கெட் வேட்டை நடத்தினர். கீரனும் டிம் டேவிட்டும் டக் அவுட் ஆகினர். ஆஸ்திரேலிய அணி 29-4 என தடுமாறியது.

இதன்பிறகு கூட்டணி சேர்ந்த ரென்சாவும் மேக்ஸ்வெல்லும் அணியை சரிவிலிருந்து மீட்டனர். இருவரும் இணைந்து 77 ரன்களை சேர்த்தனர். ஆனால், இவர்களாலும் ஆட்டத்தை முடிக்க முடியவில்லை. ஜிம்பாப்வேயின் ஸ்பின்னர்கள் சுழல் ஜாலம் நடத்தினர். வேகப்பந்து வீச்சாளர்கள் நக்கிள் பால் போன்ற வேரியேஷன்களில் கலக்கினர். மேக்ஸ்வெல் 31ரன்களில் பர்லின் பந்தில் போல்டாகினார்.

கடைசி 5 ஓவர்களில் ஆஸ்திரேலியாவுக்கு 56 ரன்கள் தேவை. 5 விக்கெட்டுகள் கையில் இருந்தது. ஆனால், இந்த 5 ஓவர்களை மசகட்சா, முசரபாணி, க்ரீமர் போன்றோர் லாவகமாக வீச, ஜிம்பாப்வேயின் பீல்டிங்கும் தீவிரமாக இருந்தது.

இதனால் ஆஸ்திரேலிய அணி தொடர்ந்து விக்கெட்டுகளை இழந்து 146 ரன்களுக்கு ஆல் அவுட் ஆனது. 23 ரன்கள் வித்தியாசத்தில் ஜிம்பாப்வே வென்றது.

2007 ஆம் ஆண்டு டி20 உலகக்கோப்பையிலும் ஜிம்பாப்வே ஆஸ்திரேலியாவை வீழ்த்தியிருந்தது குறிப்பிடத்தக்கது.