Tax: ``இந்திய பொருள்களுக்கு 50% வரி" - மெக்சிகோ அறிவிப்பால் அதிக பாதிப்பு யாருக்கு?

ரஷ்யாவிடமிருந்து எண்ணெய் வாங்குவது உள்ளிட்ட பல்வேறு காரணங்களால் இந்தியா மீது அமெரிக்க அதிபர் ட்ரம்ப் கூடுதல் வரி, அபராதம் என விதித்திருந்தது விவாதமான நிலையில், இப்போது மெக்சிகோவும் இந்தியா மீது 50% வரி விதித்திருக்கிறது.

இது தொடர்பாக வெளியான தகவலில், மெக்ஸிகோவுடன் முறையான வர்த்தக ஒப்பந்தம் இல்லாத நாடுகளிலிருந்து இறக்குமதி செய்யப்படும் 1,400 க்கும் மேற்பட்ட தயாரிப்புகளுக்கு வரிகளை உயர்த்தும் புதிய கட்டண முறைக்கு மெக்சிகோ அதிபர் கிளாடியா ஷீன்பாம் ஒப்புதல் அளித்திருக்கிறார்.

கார் ஏற்றுமதி சந்தையில் தென்னாப்பிரிக்கா, சவூதி அரேபியாவுக்குப் பிறகு மூன்றாவது இடத்தில் இருக்கும் நாடு இந்தியா. எனவே, மெக்சிகோவின் ஆசிய நாடுகளின் இறக்குமதிகள் மீதான வரி ஒப்புதல், இந்திய வாகன உற்பத்தியாளர்களை அதிகம் பாதிக்கும் எனக் கூறப்படுகிறது.

மெக்சிகோவின் 50 சதவீதம் வரை வரிகளை உயர்த்தும் முடிவு, வோக்ஸ்வாகன் மற்றும் ஹூண்டாய் உள்ளிட்ட முக்கிய இந்திய கார் ஏற்றுமதியாளர்களின் 1.8 பில்லியன் டாலர் (தோராயமாக 14,940 கோடி) மதிப்புள்ள ஏற்றுமதிகளை பாதிக்கும்.

அதனால், மெக்சிகோவின் கட்டண நடவடிக்கையைத் தடுக்க வேண்டும் என இந்தியத் தரப்பை வலியுறுத்த கார் ஏற்றுமதி தொழில்துறை முயற்சித்து வருவதாகவும் தகவல் வெளியாகியிருக்கிறது.

கார் ஏற்றுமதி:

டிரேடிங் எகானமிக்ஸ் வழங்கியிருக்கும் தகவலின்படி, 2025-ம் ஆண்டில் இந்தியா $5.63 பில்லியன் டாலர் (ரூ5,085 கோடி) மதிப்புள்ள பொருட்களை ஏற்றுமதி செய்திருக்கிறது. ஏற்றுமதி செய்யப்பட்ட பொருள்களில் வாகனங்களே அதிகம். 2025ம் ஆண்டில் இந்தியா மெக்சிகோவிற்கு ஏற்றுமதி செய்த பொருட்களில், வாகன ஏற்றுமதியின் மதிப்பு மட்டும் $1.86 பில்லியன் டாலர். அதற்கு அடுத்தடுத்த இடங்களில்தான்

• மின்சாரம், மின்னணு உபகரணங்கள் - $612.38 மில்லியன் டாலர்

• இயந்திரங்கள், அணு உலைகள், பாய்லர்கள் - $560.87 மில்லியன் டாலர்

• கரிம இரசாயனங்கள் - $388.04 மில்லியன் டாலர்

• அலுமினியம் - $386.03 மில்லியன் டாலர்

• மருந்து பொருட்கள் - $211.20 மில்லியன் டாலர்

இது தொடர்பாக பேசிய ஸ்கோடா ஆட்டோ நிறுவனத் தலைவர் பியூஷ் அரோரா, ``இந்தியா பல ஆண்டுகளாக வலுவான ஏற்றுமதி தளமாக இருந்து வருகிறது. எங்கள் நிறுவனம் மட்டும் இங்கிருந்து 40 க்கும் மேற்பட்ட நாடுகளுக்கு ஏற்றுமதி செய்கிறது.

நாங்கள் ஏற்றுமதி செய்யும் நாடுகளில் மெக்சிகோ முக்கியமான ஏற்றுமதி சந்தைகளில் ஒன்று. அங்கு அதிகரித்து வரும் தேவை, எங்கள் தயாரிப்பின் மீதான ஈர்ப்பு ஆகியவை அதற்கு முக்கிய காரணம்" என்றார்.

மெக்ஸிகோவிற்கு இந்தியாவின் மொத்த கார் ஏற்றுமதியில் ஸ்கோடா ஆட்டோ கிட்டத்தட்ட 50% ஏற்றுமதி செய்கிறது, அதைத் தொடர்ந்து ஹூண்டாய், நிசான் மற்றும் சுஸுகி ஆகியவை அடுத்த இடங்களைப் பிடிக்கின்றன என்பது குறிப்பிடத்தக்கது.