அபாய கட்அவுட்கள்; நடைபாதை பேனர்கள்; உத்தரவை மீறும் உடன்பிறப்புகள்! - உதயநிதி பர்த்டே காட்சிகள்

நவம்பர் 27 ஆம் தேதியான இன்று துணை முதல்வரும் திமுகவின் இளைஞரணி தலைவருமான உதயநிதி ஸ்டாலின் தனது 48 வது பிறந்தநாளை கொண்டாடுகிறார். அறிவாலயத்தில் வெகு விமர்சையாக கொண்டாட்டங்கள் நடைபெற்று வரும் நிலையில், சென்னை நகரின் முக்கியமான பகுதிகளில் போக்குவரத்துக்கு இடையூறாகவும் பாதசாரிகளுக்கு ஆபத்தை விளைவிக்கும் வகையில் திமுகவினரால் கட் அவுட்களும் பேனர்களும் வைக்கப்பட்டிருப்பது மக்களும் பெரும் சிரமத்தை கொடுத்திருக்கிறது.

அடுத்த ஆண்டு சட்டமன்றத் தேர்தல் நடைபெறவிருக்கும் நிலையில், வழக்கமாக அன்பகத்தில் பிறந்தநாள் நிகழ்ச்சிகளை நடத்தும் உதயநிதி ஸ்டாலின் முதல் முறையாக அறிவாலயத்தில் வெகு விமர்சையாக தனது பிறந்த நாளை கொண்டாடிவருகிறார். தமிழகம் முழுவதும் பல்வேறு மாவட்டங்களில் திமுக தொண்டர்கள் உதயநிதியின் பிறந்தநாள் விழாக்களை நடத்தி வருகின்றனர்.

உதயநிதிக்கு பிறந்தநாள் வாழ்த்து கூறும் வகையில் திமுகவினர் சென்னை மாநகரின் பெரும்பாலான பகுதிகளில் பேனர்களையும் கட் அவுட்களையும் வைத்திருக்கின்றனர். பொது இடங்களில் பாதசாரிகளுக்கும் போக்குவரத்துக்கும் இடையூறு ஏற்படுத்தும் வகையில் பேனர், கட் அவுட், கொடிகள் போன்றவற்றை வைக்கக்கூடாது என நீதிபதிகள் பல்வேறு வழக்குகளில் அறிவுறுத்தியிருக்கின்றனர்.

திமுகவின் அமைப்புச் செயலாளர் ஆர்.எஸ்.பாரதியும் கடந்த டிசம்பரில்,'இனி கட்சி நிகழ்ச்சிகளுக்காக பொது இடங்களில் பேனர்கள் கட் அவுட்களை வைப்பதை தவிர்க்க வேண்டும்.' என திமுக நிர்வாகிகளுக்கும் தொண்டர்களுக்கும் உத்தரவிட்டு ஒரு அறிக்கையை வெளியிட்டிருந்தார்.

நீதிமன்றத்தின் தீர்ப்புகள், சொந்தக் கட்சியின் அறிவுறுத்தல் என எதையும் பொருட்படுத்தாமல் உதயநிதியின் பிறந்த நாளுக்காக திமுகவினர் ஆபத்தான முறையில் வைத்திருக்கும் கட் அவுட்கள் பல இடங்களில் மக்களுக்கு அசௌகரியத்தை ஏற்படுத்தியிருக்கிறது.

நாம் பார்த்தவரையில் L.B.ரோட்டில் பெட்ரோல் பல்க் அருகே நடைபாதையில் எந்த ஊன்றுதலும் இல்லாமல் கிட்டத்தட்ட 20 அடி உயரத்துக்கு ஒரு பேனரை வைத்திருந்தனர். அடையாறிலிருந்து க்ரீன்வேஸ் சாலைக்குள் நுழைகையில் நான்கு முனையிலும் வாகனங்கள் செல்லக்கூடிய ஜங்ஷனிலும் இப்படியாக எந்த ஊன்றுதலும் இல்லாமல் பேட்ச் வடிவ பதாகையையும் பேனரையும் வைத்திருந்தனர்.

க்ரீன்வேஸ் சாலை முழுவதும் பேனர்மயமே. அங்கிருந்து வெளியே வந்து ஆர்.ஏ.புரத்துக்குள் நுழைகையிலும் சாலை ஓரத்தில் 30 அடிக்கு எந்த சப்போர்ட்டும் இல்லாமல் உதயநிதியின் கட் அவுட் ஒன்றை வைத்திருந்தனர். அதை கடந்து சில மீட்டர் தூரத்திலேயே மீண்டும் நடைபாதையை மறித்து காலண்டர் வடிவில் ஒரு கட் அவுட். கல்வி நிலையங்கள், மருத்துவமனைகள், கடைகள் என எப்போதும் பிஸியாக இருக்கக்கூடிய பகுதியில் ஆபத்தான முறையில் வைக்கப்பட்டிருக்கும் பேனர்கள் மக்களுக்கு அத்தனை இடையூறாக இருக்கிறது.

'எந்த ஆடம்பரமும் இல்லாமல் மக்களுக்கு பயனுள்ள வகையில் பிறந்தநாளை கொண்டாடுங்கள்...' என உதயநிதி செய்தி சொல்லியிருக்கிறார். ஆனால், தொண்டர்களின் புரிதல் வேறாக இருக்கிறது.