ஆப்ரேஷன் சிந்தூர்: ``இந்தியா மீது பாகிஸ்தானின் வெற்றி" - அமெரிக்கா கருத்தும் காங்கிரஸ் கேள்வியும்

ஜம்மு-காஷ்மீரின் பஹல்காமில் 26 பேர் கொலை செய்யப்பட்டதற்காக மே 7-ம் தேதி இந்தியா 'ஆபரேஷன் சிந்தூர்' எனும் தாக்குதலைத் தொடங்கியது.

இந்தத் தாக்குதலில் ஜெய்ஷ்-இ-முகமது, லஷ்கர்-இ-தொய்பா பயிற்சி முகாம்கள் தாக்கப்பட்டதாகக் கூறப்பட்டது. மே 10 அன்று போர் நிறுத்தம் செய்யப்பட்டது.

இந்தப் போர் நிறுத்தத்துக்குப் பின்னணியில் அமெரிக்க அதிபர் ட்ரம்பின் தலையீடு இருக்கிறது என அமெரிக்காவும், பாகிஸ்தானும் தொடர்ந்து பேசிவரும் நிலையில், இந்தியா அதை மறுத்து வருகிறது.

இந்த நிலையில், ``மே 7 முதல் 10 வரை இந்தியாவுடனான நான்கு நாள் மோதலில் பாகிஸ்தான் வெற்றி பெற்றது. மேலும் இரண்டு தெற்காசிய அண்டை நாடுகளுக்கு இடையேயான நான்கு நாள் இராணுவ மோதல்களைப் பயன்படுத்தி சீனா தனது ஆயுதங்களின் நுட்பத்தை சோதித்துப் பார்த்து விளம்பரப்படுத்தியிருக்கிறது." என அமெரிக்க-சீன பொருளாதார மற்றும் பாதுகாப்பு மறுஆய்வு ஆணையம் (USCC) தனது சமீபத்திய அறிக்கையில் குறிப்பிட்டுள்ளது.

அமெரிக்காவின் இந்த அறிக்கை இந்தியர்களை அதிர்ச்சிக்குள்ளாக்கியிருக்கிறது. இது தொடர்பாக காங்கிரஸ் செய்தித் தொடர்பாளர் ஜெய்ராம் ரமேஷ் எக்ஸ் பதிவில், `` அந்த அறிக்கையில், 'அமெரிக்க அரசின் இந்த அறிக்கை ஏற்றுக்கொள்ள முடியாதது.

மேலும், அந்த அறிக்கையில் பஹல்காம் தாக்குதல் நடத்தியவர்களை 'கிளர்ச்சியாளர்கள் தாக்குதல்' என விவரித்திருக்கிறது. நான்கு நாள் மோதலில் ‘இந்தியா மீது பாகிஸ்தானின் இராணுவ வெற்றி’ எனக் குறிப்பிடப்படுகிறது.

இந்த அறிக்கை வெளியான சில மணிநேரங்களுக்குப் பிறகு, சவுதி பட்டத்து இளவரசர் கலந்து கொண்ட அமெரிக்க-சவுதி அரேபிய மாநாட்டில் உரையாற்றிய அமெரிக்க அதிபர் ட்ரம்ப் 61வது முறையாக, `இந்தியா மீது 350% வரிகளை விதிக்கப் போவதாக அச்சுறுத்தியே ஆபரேஷன் சிந்தூரை முடிவுக்குக் கொண்டுவந்தேன்' எனக் கூறியுள்ளார்.

பிரதமர் மோடியோ 'ஷெரீஃப் எனக்கு போன் செய்தார்’ எனத் தெரிவித்தார். இந்த அமெரிக்க-சீன பொருளாதார மற்றும் பாதுகாப்பு ஆணையத்தின் அறிக்கையும், அதிபர் ட்ரம்பின் இந்த தொடர் கருத்தும் இந்தியர்களால் ஏற்றுக்கொள்ள முடியாதது.

இதற்கு பிரதமர் மோடியும், வெளியுறவுத்துறையும் தங்கள் ஆட்சேபனைகளையும், எதிர்ப்பையும் பதிவு செய்வார்களா? நமது ராஜதந்திரம் மற்றொரு கடுமையான பின்னடைவைச் சந்தித்துள்ளது" எனக் குறிப்பிட்டிருக்கிறார்.