டெல்லி: செங்கோட்டை அருகே கார் வெடிப்பு; 8 பேர் பலி; நெஞ்சை உலுக்கும் வீடியோ - விசாரணை தீவிரம்!

டெல்லி செங்கோட்டைக்கு அருகே உள்ள மெட்ரோ ரயில் நிலையத்தின் நுழைவு வாயில் எண் ஒன்றில் நிறுத்தப்பட்டிருந்த கார் வெடித்துச் சிதறியிருப்பது, பெரும் பரபரப்பை ஏற்படுத்தியிருக்கிறது.

இந்த விபத்தால் அருகே இருந்த நான்கு வாகனங்களும் தீப்பிடித்து எரிந்துள்ளன. பெரும் சத்தத்துடன் நடந்த இச்சம்பவம் அப்பகுதியையே பதற்றத்திற்கு உள்ளாக்கியிருக்கிறது.

தகவல் அறிந்த தீயணைப்பு வீரர்கள் சம்பவ இடத்திற்கு விரைந்து மீட்புப் பணியில் இறங்கியிருக்கின்றனர். இச்சம்பவத்தில் பலரும் பாதிக்கப்பட்டிருக்கின்றனர். பாதிக்கப்பட்டவர்களின் எண்ணிக்கை இன்னும் சரியாகத் தெரியவரவில்லை. இதுவரை 8 பேர் உயிரிழந்திருப்பதாகவும், 24 பேர் படுகாயமடைந்திருப்பதாகவும் முதற்கட்டத் தகவல் தெரிவிக்கின்றன.

பாதிக்கப்பட்டவர்களை அருகே இருக்கும் 'LNJP' மருத்துவமனையில் அனுமதித்து வருகின்றனர். சம்பவ இடத்திற்கு விரைந்து காவல்துறையினர் விசாரணையைத் தொடங்கியிருக்கின்றனர். விசாரணைக்குப் பிறகே இதற்கான முழுமையான காரணம் தெரிய வரும் என்று கூறப்படுகிறது.

பெரும் பரபரப்பும், பாதுகாப்பும் மிகுந்த டெல்லி நகரத்தின் முக்கியமான பகுதியில் கார் வெடித்திருப்பது பல கேள்விகளை எழுப்பியிருக்கிறது. இதனால் டெல்லி நகரம் முழுவதும் உயர்மட்ட பாதுகாப்பு ஏற்படுத்தப்பட்டிருக்கிறது. ரயில் நிலையங்களில் பாதுகாப்பு பலப்படுத்தப்பட்டிருக்கிறது. செங்கோட்டை அருகில் உள்ள மெட்ரோ ரயில் நிலையங்கள் மூடப்பட்டிருக்கின்றன.