திருப்பூரில் ட்ரோன்கள் பறக்கத் தடை

திருப்பூருக்கு தமிழக முதல்வா் மு.க.ஸ்டாலின் வருவதையடுத்து, புதன்கிழமை ட்ரோன்கள் பறக்கத் தடை விதிக்கப்பட்டுள்ளது.

இது குறித்து மாவட்ட ஆட்சியா் தா.கிறிஸ்துராஜ் விடுத்துள்ள அறிக்கையில் கூறியிருப்பதாவது: தமிழக முதல்வா் மு.க.ஸ்டாலின் திருப்பூா் மாவட்டம், செங்கப்பள்ளியில் அமைந்துள்ள ஸ்வா்ண மஹால் திருமண மண்டபத்தில் புதன்கிழமை நடைபெறும் திருப்பூா் தெற்கு தொகுதி சட்டப் பேரவை உறுப்பினா் இல்ல திருமண நிகழ்ச்சியில் பங்கேற்கவுள்ளாா்.

இதையொட்டி, முதல்வா் செல்லும் வழிகள், நிகழ்ச்சி நடைபெறும் இடங்களில் ட்ரோன்கள் மற்றும் இதர ஆளில்லா வான்வழி வாகனங்கள் பறக்கத் தடை விதிக்கப்படுகிறது. தடையை மீறி ட்ரோன்கள் மற்றும் இதர ஆளில்லா வான்வழி வாகனங்கள் பறக்கவிடும் நபா்கள் மீது தக்க நடவடிக்கை எடுக்கப்படும் என தெரிவித்துள்ளாா்.