'60 வயதோ, 16 வயதோ' - போதைப் பொருள் விழிப்புணர்வுக்கு விக்ரமின் காணொளியை பயன்படுத்திய கேரளா போலீஸ் !

நடிகர் விக்ரம், அவருடைய 60-வது பிறந்தநாள் அன்று, சமூக வலைதளப் பக்கத்தில் காணொளி ஒன்றை பதிவிட்டிருந்தார். அந்தக் காணொளியைப் துருவ் விக்ரம்தான் படம்பிடித்திருந்தார்.

பிறகு, அந்தக் காணொளியும் சமூக வலைதளப் பக்கங்களில் வைரலானது. அந்தக் காணொளியைக் கேரளா போலீஸார் அவர்களுடைய அதிகாரப்பூர்வப் பக்கத்தில் போதைப்பொருள் பயன்பாட்டிற்கு எதிரான ஒரு விழிப்புணர்வு வீடியோவுக்கு பயன்படுத்தியிருக்கிறார்கள்.

அதில், 'டெய்ஸ் ஐரே' உள்ளிட்ட சில மலையாளப் படங்களில் நடித்த நடிகர் ஜிபின் கோபிநாத் நடித்துள்ளார். நிஜ வாழ்க்கையிலும் இவர் காவல் அதிகாரியாக இருந்தவர் என்பது குறிப்பிடத்தக்கது.

இந்த வீடியோவைப் பார்த்த நடிகர் விக்ரம், அதனைத் தனது இன்ஸ்டாகிராம் ஸ்டோரியில் பகிர்ந்துள்ளார். "நாங்கள் எப்போதும் உங்களைக் கவனித்துக் கொண்டே இருக்கிறோம்" (We keep an eye on you always) என்ற கேப்ஷனுடன் அந்த வீடியோவைக் கேரளா போலீஸார் பகிர்ந்துள்ளனர்.

அத்துடன், "16 வயது அல்லது 60 வயது என்பது பிரச்னையில்லை; போதைப்பொருள் உடல்நலத்திற்குத் தீங்கு விளைவிக்கும்" எனக் குறிப்பிட்டு பதிவிட்டிருக்கிறார்கள்.

மேலும், ரசிகர்கள் பலர் இந்தக் காணொளியை வெவ்வேறு வடிவங்களில் ரீ கிரியேட் செய்து வருகிறார்கள்.