8 ரன்களுக்கு 6 விக்கெட்; சீட்டுக்கட்டாய் வீழும் பேட்டர்கள்- சரியும் டெல்லி; மாஸ் காட்டும் ஆர்.சி.பி!

"ஈசாலா கப் நம்தே" கோஷம் பெங்களூரு சின்னசாமியில் மட்டுமல்ல, டெல்லி அருண் ஜெட்லி மைதானத்திலும் காது கிழிய ஒலிக்கிறது. 8 ரன்னுக்கு 6 பேர் அவுட் என்றால், அதை 'பேட்டிங் வரிசை' என்பதா அல்லது கால்பந்து ஸ்கோர் போர்ட் என்பதா?

டாஸ் வென்ற கேப்டன் ரஜத் பட்டிதர் பந்துவீச்சை தேர்வு செய்தார். கடந்த போட்டியில் 260 அடித்த தெம்பில் களமிறங்கிய டெல்லிக்கு, முதல் ஓவரிலேயே புவனேஸ்வர் குமார் தன் 'ஸ்விங்' மந்திரத்தால் மரண பயத்தை காட்ட, சாகில் பரக் கிளீன் போல்டாகி வெளியேற, அங்கேயே தொடங்கியது டெல்லியின் சரிவு!

கடந்த போட்டியில் 152 ரன்கள் அடித்து சாதனை படைத்த கே. எல்.ராகுல் இந்த போட்டியில் ஜொலிப்பார் என எதிர்பார்க்க... அவரும் 1 ரன் எடுத்து நடையை கட்டினார்.

புவனேஸ்வர் மற்றும் ஹேசில்வுட் கூட்டணியின் வேகத்தில் டெல்லி பேட்ஸ்மேன்கள் வரிசையாக நிலைகுலைந்தனர்.

ஐபிஎல் வரலாற்றில் குறைந்தபட்ச ஸ்கோர் (49) என்ற 'ப்ளாக் மார்க்' தற்போது பெங்களூரு வசம் உள்ளது. அதை எப்படியாவது இன்று டெல்லி கணக்கிற்கு மாற்றிவிட்டு, அந்தச் சாபத்தை நீக்க வேண்டும் என ஆர்.சி.பி பந்துவீச்சாளர்கள் அனல் பறக்க விடுகிறார்கள்.

பவர் பிளே முடிவில் 11 ரன்களுக்கு 6 விக்கெட்! டெல்லி ரசிகர்கள் தலையில் துண்டை போட்டுக்கொள்ள, ஆர்.சி.பி ரசிகர்கள் 'மொமண்டம்' மழையில் நனைந்து கொண்டிருக்கிறார்கள். 49 ரன்களைத் தாண்டுவதே டெல்லிக்கு இப்போது இமயமலை ஏறுவது போலத்தான். ஆர்.சி.பி சார்பில் புவி 3 விக்கெட்டுகளையும் ஹேசல்வுட் 3 விக்கெட்டுகளையும் வீழ்த்தியிருந்தனர்.